Ötən həftə, fevralın 27-də PKK terror təşkilatının Türkiyədə həbsdə olan lideri Abdullah Öcalan tərəfdarlarına yazılı müraciət ünvanlayyaraq terrorçuları silahı yerə qoymağa çağırıb. İmralı adasında həbs həyatı yaşayan terror təşkilatının başçısı məktubunda PKK-nın sivil yolla qurultay keçirməsini və siyasi mübarizəyə qoşulmasını məsləhət görüb.
“PKK özünü buraxmalı, terror təşkilatı ləğv edilməlidir. 1990-cı illərdə daxili səbəblərdən real sosializmin çökməsi, ölkədə kimlik inkarının aradan qalxması, ifadə azadlığındakı inkişaflar PKK-nın varlığının mənasız olmasına səbəb oldu. Odur ki, mövcud vəziyyət bu qurumun öz həmkarları kimi ömrünü tamamlamasını zəruri edib. Qurultayınızı toplayın və dövlət və cəmiyyətə inteqrasiya üçün qərarlar qəbul edin. Çünki məcburi şəkildə dayandırılmamış hər bir müasir cəmiyyət və partiya bunu könüllü olaraq edəcək: bütün qruplar silahı yerə qoymalı, PKK özünü buraxmalıdır”, - deyə Öcalan terrorçu tərəfdarlarına müraciətində bildirib.
Terror qruplaşmasından bu çağırışa əməl edəcəkləri ilə bağlı cavablar səsləndirilsə də, bir çox analitiklər PKK-nın silahı yerə qoyacağına, terror təşkilatını buraxacağına inamsız yanaşırlar. Ekspertlər hesab edirlər ki, PKK terrorçularının bir hissəsi Öcalanın çağırışına müsbət yanaşsa da, bir hissə terror əməllərinə davam edəcək.
Azərbaycan Demokrat Partiyasının rəhbəri, siyasətçi Sərdar Cəlaloğlu AYNA.AZ-a deyib ki, o da PKK-nın ləğvinə inanmır: “PKK məsələsi 40 ildən artıqdır ki, Yaxın Şərqdəki bütün dövlətlərin inkişafına əngəl törədir. Bu terrorçu təşkilata bağlı qruplar həm İranda, Həm İraqda, həm Suriyada, həm də Türkiyədə fəaliyyət göstərirlər. Nəzərə almaq lazımdır ki, PKK-nın arxasında Qərbdəki müəyyən dairələr dayanır. Əvvəl bu terror təşkilatını SSRİ yaradıb, dəstək göstərib. Sonradan isə PKK-ya Qərb dəstək göstərdi. Bu gün də Qərbdən PKK-ya kifayət qədər maliyyə verilir. Öcalan uzun müddətdir həbsdədir və onu PKK-nın sosial tərkibi formal olaraq, lider kimi qəbul edir. Yəni ki, Öcalan çoxdandır PKK-nın başında real olaraq dayanmır. Bu təşkilata bağlı qruplaşmaların hərəsinin özünün rəhbəri var. Həmin terrorçu qruplaşmaların başçılarının Öcalanın çağırışına müsbət reaksiya verəcəyi şübhəlidir”.
“Hər halda, Öcalanın bu çağırışı müsbət addımdır. Amma bu müraciətə PKK üzvlərinin hamısının müsbət cavab verəcəyinə inanmıram. Çünki onlar müstəqil deyillər. Həmin qruplaşmaları kim maliyyələşdirir, Türkiyəyə qarşı addımlara kim təhrik edir, qruplaşmalar həmin qüvvələrin sözünü eşidirlər. Həmin qüvvələr “dayanın” deməsələr, yüz dənə Öcalan müraciət etsin, onlar yenə də terror fəaliyyətindən əl çəkməyəcəklər”, - siyasətçi vurğulayıb.
S.Cəlaloğlu Öcalanın bir müraciəti ilə PKK terror təşkilatının kökünün kəsiləcəyini düşünmür: “Hesab edirəm ki, sadəlövhlük etmək lazım deyil. Bəli, müsbət addımdır və Türkiyə siyasətinin uğuru sayıla bilər. Amma bununla terrorun kökünün kəsiləcəyini iddia etmək doğru olmazdı”.
