“Azərbaycan D-8-də nisbətən kiçik ölkə olsa da, böyük potensiala malikdir”.
Bunu Yenicag.az-a açıqlamasında D-8 platformasının Azərbaycan üçün perspektivlərindən danışan Milli Məclisin deputatı, Böyük Azərbaycan Partiyasının (BAP) sədri Elşad Musayev deyib.
Onun sözlərinə görə, enerji resurslarını çıxmaq şərtilə Azərbaycan indiyə qədər iqtisadi baxımdan dar çərçivədə fəaliyyət göstərib:
“Bu resursların ixracı, xüsusilə yaxın ərazilərə – Rusiya və digər qonşu ölkələrə yönəlib. Enerji resurslarının xaricə ixracı ilə yanaşı, iqtisadi əlaqələrin genişləndirilməsi ölkəmiz adına mühüm əhəmiyyət kəsb edir. D-8 isə iqtisadi və insan resursları baxımından böyük ölkələri əhatə etdiyi üçün geniş imkanlar vəd edir. Azərbaycan burada nisbətən kiçik ölkə olsa da, böyük potensiala malikdir. Burada qardaş ölkə Türkiyənin dəstəyi xüsusi qeyd edilməlidir. D-8 üzvlüyü Azərbaycanın iqtisadi əlaqələrinin inkişafı və yeni bazarlara çıxışında mühüm rol oynaya bilər. Biz də bu böyük bazarın əsas iştirakçılarından biri olmaq niyyətindəyik”.
BAP sədri əlavə edib ki, müasir dövrdə iqtisadi inteqrasiya hər bir sahədə böyük əhəmiyyət daşıyır:
“D-8 ölkələri arasında Türkiyə ilə yanaşı, digər böyük potensiala malik ölkələr də mövcuddur. Əsas məqsəd bu inteqrasiyanın bir hissəsi olmaqdır. Üzv olduqdan sonra iqtisadi inkişaf üçün yeni imkanlar və əlaqələr yaranır. Biz bu əlaqələrdən səmərəli istifadə etməliyik və edəcəyik. Son 500 ildə dünyanı Qərb idarə edir. İqtisadi baxımdan dünya Qərbdən asılı vəziyyətdədir. Dünyada əsas məzənnənin dollar olması bunu deməyə əsas verir. Avropa İttifaqına, Ümumdünya Ticarət Təşkilatının öz maraqları var”.
“Sadalanan amillər nəzərə alındıqda , xüsusilə müsəlman ölkələri öz iqtisadi maraqlarını qorumaq üçün ayrıca platformalar qurmaq məcburiyyətindədirlər. Növbəti mərhələdə diqqətimizi daha geniş iqtisadi arenaya yönəltməliyik. Bu platformalarda aktiv iştirak etməliyik ki, milli maraqlarımızı qoruyaraq beynəlxalq iqtisadi sistemdə öz yerimizi möhkəmləndirək”, – deyə deputat bildirib.
