SAMUXDAN İMİŞLİYƏ MƏSLƏHƏT: В«VİLYAM HACIYEVDƏN EHTİYATLI OLUNВ»
DİA.AZ: - Məlum olduğu kimi, şənbə günü prezident İlham Əliyev bir neçə şəhər və rayonun icra hakimiyyəti başçılarını işdən azad edib və onların yerinə yeni təyinatlar həyata keçirib. Bildirək ki, Tofiq Hüseyn oğlu İbrahimov Lənkəran şəhər İcra hakimiyyətinin başçısı vəzifəsindən azad edilib. Onun yerinə bu vəzifəyə Taleh Azay oğlu Qaraşov təyin olunub. T. Qaraşov indiyə qədər Astara rayonu İcra Hakimiyyətinin başçısı vəzifəsində çalışıb.
Rafiq Həbibulla oğlu Niftəliyev Ağdaş rayon İcra Hakimiyyətinin başçısı vəzifəsindən çıxarılıb. Onun yerinə Tofiq Hüseyn oğlu İbrahimov təyin edilib.
Niyazi Müzəffər oğlu Bayramov Mingəçevir şəhər İcra Hakimiyyətinin başçısı təyin olunub.
Əlibaba Nəcəf oğlu Əliyev Bakı şəhəri Sabunçu rayon İcra Hakimiyyətinin başçısı vəzifəsindən çıxarılıb. Onun yerinə Adil Ənvər oğlu Vəliyev təyin edilib.
Qəzənfər Arif oğlu Ağayev Masallı rayon İcra Hakimiyyətinin başçısı vəzifəsindən kənarlaşdırılıb. Onun yerinə Rafil İsrafil oğlu Hüseynov təyin olunub. Qəzənfər Ağayev isə Astara rayon İcra Hakimiyyətinin başçısı vəzifəsinə gətirilib.
Əbülfəz Yusif oğlu Ağayev İmişli rayon İcra Hakimiyyətinin başçısı vəzifəsindən azad edilib. Onun yerinə Samux rayon İcra Hakimiyyətinin başçısı vəzifəsindən azad edilmiş Vilyam Fəhralı oğlu Hacıyev təyin olunub.
Onu da bildirək ki, bütün bu proses əslində aha çox yerdəyişməyə bənzəsə də, bir sıra yeniliklər də müşahidə olunub. Məsələn, Mingəçevir şəhərinə icra başçısı təyin edilən Niyazi Bayramov dünənə qədər Fövqəladə Hallar Nazirliyinin Sumqayıt regional Mərkəzinin sədri vəzifəsində çalışıb. Bu isə o deməkdir ki, FHN şefi Kəmaləddin Heydərov Mingəçevirə nəzarət rıçaqlarını ələ keçirib. Ümumiyyətlə, onu deyə bilərik ki, Mingəçevir buna qədər də bir neçə dəfə əl dəyişdirib. Məsələn, əvvəlki icra başçısı, yəni Qubadakı 1 Mart olaylarının ardından sözügedən rayona rəhbər göndərilən Mübariz Ağayev əslən Ucar rayonundan olmaqla yanaşı, həm də həmyerlisi nəqliyyat naziri Ziya Məmmədovun adamı hesab olunurdu. Mübariz Ağayevdən əvvəl Mingəçevirə rəhbərlik edən, hazırda isə Zərdab rayon icra hakimiyyətinin başçısı postunu tutan Lütvəli Babayev Bütün Qafqazın Şeyxi Hacı Allahşükür Paşazadəyə yaxın bir fiqur kimi Mingəçeviri zamanında yönəldib. Amma bütün bunlara rəğmən enerji şəhəri olması səbəbindən hər zaman Mingəçevirdə В«AzenerjiВ» ASC-nin prezidenti Etibar Pirverdiyevin payı olub. Sadəcə olaraq, bu pay zaman-zaman artıb və azalıb. Bu isə Pirverdiyevin hakimiyyət içindəki mövqeyi ilə düz mütənasib olub.
Sabunçu rayonunun icra başçısı postuna təyin edilən və bu mövqedə Əlibaba Nəcəf oğlu Əliyevi əvəzləyən Vəliyev Adil Ənvər oğlu isə məhkəmə sistemindən transfer olunub və bir zamanlar o, Bakı şəhər məhkəməsinin xalq iclasçısı görəvində çalışıb.
Onu da bildirək ki, bu yerdəyişmələr içində daha çox diqqətçəkəni Samux rayon icra hakimiyyəti başçısı Vilyam Hacıyevin İmişliyə - Əbülfəz Ağayevin yerinə təyin edilməsi olub. Artıq bu məsələ Samux rayonunda əməlli-başlı hərəkətlənmə yaradıb. DİA.AZ redaksiyasına rayondakı qaynaqlardan ötürülən məlumatda deyilir ki, samuxlular Vilyam Hacıyevdən canlarının qurtarılmasına bir yandan sevinsələr də, İmişli camaatının gələcəyindən yana narahatdırlar. Samux sakinlərinin redaksiyamıza bildirdiklər: В«Vilyam Hacıyevin Samuxda çıxardığı oyunlar hər kəsə məlumdur. Neçə-neçə sahibkarın haqqını yeyən, vətəndaşlara zülm edən Vilyam Hacıyev əslində həbs olunmalı idi. Amma onu İmişliyə bir bəla kimi göndərdilər. Yəqin İmişlidəki həmvətənlərimiz bu adamın kimliyindən xəbərdardırlar və ehtiyatlı olmaları məsləhətdirВ».
Daha bir dəyişiklik - Masallının icra başçısı Qəzənfər Ağayevin Astara rayonuna transferi də kifayət qədər cəlbedici bir olaydır. Bu o deməkdir ki, hakimiyyət adı mətbuatda bir çox qalmaqallarda hallandırılan Qəzənfər Ağayevdən asanlıqla imtina edən deyil və ona daha bir neçə illik vəzifə şansı tanındı. Bildirək ki, Qəzənfər Ağayevin yerinə təyin edilən Rafil İsrafil oğlu Hüseynov isə birbaşa olaraq Prezident Administrasiyasının rəhbəri Ramiz Mehdiyevin kadrı hesab olunur və bu adam dünənə qədər PA-da Ağcabədi rayonu üzərə kurator vəzifəsində çalışıb.
Hər halda, bu faktları özü belə təsdiqləyir ki, oliqarx-məmurlar hələ də güclüdürlər və onlar baş verən kadr islahatlarında öz dəst-xəttlərini qoruma iqtidarını itirməyiblər.
