Kubanın elektrik şəbəkəsində baş verən qismən çökmə ölkənin şərq bölgələrində genişmiqyaslı enerji kəsintilərinə səbəb olub.
Teleqraf xəbər verir ki, hadisə ABŞ-nin tətbiq etdiyi yanacaq blokadası fonunda baş verib və artıq uzunmüddətli elektrik kəsintilərindən yorulan əhalinin narazılığını daha da artırıb.
Kubanın dövlət enerji operatoru UNE bildirib ki, səhər saatlarında baş verən qəza nəticəsində ölkənin şərq hissəsində elektrik enerjisi tamamilə kəsilib. Günün ikinci yarısında bəzi vacib obyektlərə enerji verilişi bərpa olunsa da, Santyaqo-de-Kuba da daxil olmaqla geniş ərazilər işıqsız qalıb.
Məlumata görə, 10 milyona yaxın əhalisi olan Kubada insanlar artıq gündə 20 saatdan çox elektrik enerjisiz qalır. Böhran yay istilərinin başlaması ilə daha da ağırlaşıb.
Qeyd edək ki, vəziyyət ABŞ Prezidenti Donald Trampın yanvar ayında Kubaya yanacaq tədarük edən ölkələrə qarşı tarif və sanksiya hədələrindən sonra kəskinləşib. Bundan sonra Venesuela və Meksika adaya neft göndərişlərini dayandırıb.
