ZİYANLILAR “RAFİQ ƏLİYEV TƏHLÜKƏSİNƏ” QARŞI
Bakı Dövlət Universitetinin bir qrup müəllimi Azərbaycan Ziyalılar Forumuna qarşı birgə müraciət qəbul edib.
Rəsmi dövlət qəzeti “Azərbaycan”da müraciət “Bakı Dövlət Universitetinin bir qrup ziyalısının Azərbaycan ziyalılarına müraciəti” adı altında, 50-yə yaxın imza ilə dərc olunub. Ümumilikdə müraciəti 245 nəfərin imzaladığı göstərilib.
Müraciətin mətnini "Media forum" saytının oxucularının da diqqətinə çatdırırıq:
“Hörmətli həmkarlar!
Bakı Dövlət Universitetinin ağsaqqal ziyalıları adından bütün Azərbaycan ziyalılarına müraciət edirik. Biz şübhə etmirik ki, siz də bizim kimi ölkəmizin bugünkü sabitliyini ən böyük dəyərimiz hesab edirsiniz. Yaxşı xatırlayırıq ki, cəmiyyət həyatının bütün sahələrində ön mövqedə olan Azərbaycanın inkişaf prosesinə öz töhfələrini verən ziyalılar ötən əsrin 80-ci illərinin sonlarında ölkəmizə qarşı yürüdülən ədalətsiz siyasətə etiraz olaraq, xalqı öz ətrafında birləşdirməyə nail oldular. Lakin sonralar hərəkatın rəhbərliyindən ziyalıların sıxışdırılması, idarəçiliyin, tədricən, qaragüruhun əlinə keçməsi milli mücadiləmizin uğursuzluğuna gətirib çıxardı. Nəticədə müstəqillik uğrunda mübarizənin mahiyyəti dəyişdi, hakimiyyət uğrunda savaşlar, vətəndaş qarşıdurmaları, 20 Yanvar faciəsi kimi olaylar baş verdi, üstəlik Qarabağ hadisələrində ardıcıl məğlubiyyətlərlə üzləşdik. Əlbəttə, bu gün artıq həmin dövr deyil. Təəssüf ki, bu gün adını ziyalı qoyan 20-30 nəfərin toplumundan əmələ gələn və “Ziyalılar forumu” adlanan qurumun nümayəndələri bütün Azərbaycan ziyalıları adından bəyanatlar verərək minlərlə ziyalının gördüyü həqiqətləri başqa rəngdə çatdırmaq, şəxsi mənafeləri naminə təkcə Azərbaycan xalqını deyil, bütün dünya ictimaiyyətini çaşdırmaq istəyirlər.
Lakin Azərbaycan dünyada nüfuzu olan, iqtisadi inkişaf dinamikasına görə fərqlənən, BMT Təhlükəsizlik Şurasına üzv seçilən, Avropanın mədəniyyət mərkəzi kimi “Eurovision” yarışmalarına ev sahibliyi edən, bölgənin enerji tranzit mərkəzinə çevrilən... və bir çox başqa uğurları olan ölkədir. Biz belə hesab edirik ki, bu uğurlar hər bir Azərbaycan ziyalısının fəxr və qürur mənbəyi olmaqla bərabər, həm də onların dövlətə, dövlətçiliyə sədaqətli xidmətinin nəticəsidir. Bu gün kimsənin bu uğurları əlimizdən almağa, düşmən xarici ölkənin mətbuatında tez-tez səsləndiyi kimi, “ərəb təcrübəsinin tətbiq olunmasına” şərait yaratmağa ixtiyarı yoxdur! Həqiqi ziyalılar antiazərbaycan şəbəkənin ölkəmizdə axtardığı istinad nöqtələri ola bilməz. Xaricdən düşmən qüvvələrin ayırdığı qrantları şəxsi maraqları naminə dövlətimizin əleyhinə çevirməyə çalışanlar siyasi münasibətlərin fövqündə dayanan ziyalılardan istifadəyə cəhd göstərməməlidirlər.
Tarixin bütün kəşməkəşlərini görən biz ağsaqqallar başa düşürük ki, yaşı 20 il olan gənc dövlətimizin tərəqqisi ilə yanaşı, hələ həll edə bilmədiyi problemlər də mövcuddur. Bu problemləri dövlət başçısı da, hər bir ziyalı da görür və onların həlli yolunda aparılan işlər bir an da səngimir. Əminik ki, ziyalının yeganə fəaliyyət amalı xalqın mənafeyini düşünən, onun sabahını prioritet hesab edən, dövlətin, dövlətçiliyin qorunmasına xidmət göstərən əsl vətəndaşlıq mövqeyidir. Həmin mövqe bütün haqsızlıqlara, ədalətsizliklərə qarşı olub və olmalıdır da.
Biz “Ziyalılar forumu”nun mövqeyini düzgün və ədalətli hesab etmirik. Onun xalqımızın, dövlətimizin əleyhinə olan qüvvələrin əlində vasitəyə çevrilməsini istəmirik. Uğurlarımız artdıqca, bizə qarşı yönələn təxribatların reallaşması üçün ziyalılardan istifadə olunmasını qəbul etmirik. Ümumiyyətlə, forma xatirinə forum formalaşmamalıdır. Azərbaycanın hər hansı forum olmadan da aydın mövqeyi, açıq fikri, təəssübkeş qəlbi olan ziyalıları kifayət qədərdir. Tarix göstərib ki, milli maraqlara əsaslanmayan yol heç bir dövlətə şərəf, heç bir xalqa xoşbəxtlik gətirməyib.
Dünyanın bərkini-boşunu görmüş, tarixin sınaqlarının şahidi olmuş biz ziyalı ağsaqqallar da bütün bunları nəzərə alaraq, yanlış mövqe tutanlara bu yoldan çəkinməyi tövsiyə edirik.
Akademik Abel Məhərrəmov
Akademik Vasim Məmmədəliyev
Akademik Bəhram Əsgərov
Akademik Cəlal Allahverdiyev
Akademik Fikrət Əliyev
AMEA-nın müxbir üzvü, professor Tofiq Hacıyev
AMEA-nın müxbir üzvü, professor Məhəmməd Mehdiyev
AMEA-nın müxbir üzvü, professor Vasif Babazadə
AMEA-nın müxbir üzvü, professor Rəfiqə Əliyeva
AMEA-nın müxbir üzvü, professor Azad Nəbiyev
AMEA-nın müxbir üzvü, professor Yaqub Mahmudov
AMEA-nın müxbir üzvü, professor Məsumə Məlikova
AMEA-nın müxbir üzvü, professor Volodya Tahirov
Professor Abuzər Xələfov
Professor Qulu Məhərrəmli
Professor Karlen Xudaverdiyev
Professor Məmməd Yaqubov
Professor Musa Bayramov
Professor Oqtay Əkbərov
Professor Akif Quliyev
Professor Neymət Qasımov
Professor Əli Əliyev
Professor Qara Mustafayev
Professor Şövqi Göyçaylı
Professor Həbibə Sultanova
Professor Qara Namazov
Professor Yusif Seyidov
Professor Lalə Quliyeva
Professor Tofiq Vəliyev
Professor Əsmət Muxtarova
Professor Ağalar Abbasbəyli
Professor Xəlil İsmayılov
Professor Əli Əliyev
Professor Elşad Qurbanov
Professor Əli Əhmədov
Professor Çingiz Həsənov
Professor İzzət Rüstəmov
Professor Sənubər Abdullayeva
Professor Məmməd Çıraqov
Professor Pərvin Darabadi
Professor Cəfər Quluzadə
Professor Əyyub Əzizov
Professor Ağavəli İbrahimov
Professor Rahib Abışov
Professor Tapdıq Həsənov
Professor Mikayıl Cəfərov
Cəmi 245 imza”.
