Sabunçu rayonu, Ramana qəsəbəsinin əsas magistral yolu qəzalı vəziyyətə düşüb. 2016-cı ildə salınan Ramana-Maştağa avtomobil yolunun (Firidun bəy Köçərli küçəsi) böyük bir hissəsi 2022-ci ildə "Azərsu" tərəfindən sıradan çıxarılıb. Bu qurumun Ramananın su təchizatı və kanalizasiya sisteminin yenidən qurulması üçün tenderdə qalib edərək 8,2 milyon manat ödədəyi şirkət nəinki kanalizasiya xətti çəkməyib, asfalt örtüyünü də qazaraq bərbad hala salıb və bərpa işləri aparmayıb. .
Sakinlərin şikayəti üzərinə əraziyə baş çəkdik və asfalt örtüyünün böyük bir hissəsinin qazılaraq, yararsız hala salındığını müşahidə etdik. Yağış və qrunt suları da yoldakı boşluqlara dolduğundan böyük gölməçələr yaranmışdı. Qazılarkən məqsəd həm də kanalizasiya sistemi olsa da, əraziyə ümumiyyətlə kanalizasiya xətləri çəkilməyib. Nəticədə bir neçə gün əvvəl yağan yağış sularının yolun ortasında yaratdığı gölməçə qalmaqdadır.
Qeyd etdiyimiz kimi, 2022-ci ildə qəsəbənin su və kanalizasiya xətləri çəkilərkən yolun müxtəlif hissələrindən asfalt örtük kəsilib, lakin sonradan əsaslı bərpa əvəzinə yülgülvari yamaq vurulub. Magistral yol tam şəkildə bərpa edilməyib. Hazırda magistralın kənarları elə bərbad vəziyyətdədir ki, nəqliyyat hərəkət edə bilmir və yol daralıb.
Qısacası, uzunluğu 11 kilometr olan, 2016-cı ildə tikintisinə 2,5 milyon manat ayrılan avtomobil yolu cəmi 6 il sonra sıradan çıxıb. Halbuki sakinlər, zamanında Azəravtoyol tərəfindən magistral yolun asfalt örtüyünün yüksək səviyyədə çəkildiyini deyirlər.
Sakinlər yolun bu durumuna düşməsində konkret olaraq "Azərsu"nu günahlandırırlar: "Su təchizatı və kanalizasiya sisteminin bərpası üçün aparılan işlər çərçivəsində asfalt yol qazılaraq, xətlərin çəkilməsi prosesi aparıldı, lakin iş bitdikdən sonra yenidən normal şəkildə bərpa olunmadı. Yolda yaranan iri çuxurlar yağış suları nəticəsində sıradan çıxıb. Qazılan asfalt örtüyünün yerinə sadəcə qırla yamaq vurublar".
Qeyd edək ki, bu işləri “Arko Təmir Tikinti Şirkəti” MMC aparıb. Belə ki, şirkət 2022-ci ildə Ramana qəsəbəsinin su təchizatı və kanalizasiya sisteminin bir hissəsinin yenidən qurulması üçün 8 202 558 manatlıq tenderi qazanıb. Üzərindən 3 il keçməsinə baxmayaraq, su xətti çəkildə də kanalizasiya xətti ümumiyyətlə çəkilməyib. Sakinlər deyir ki, Ramana qəsəbəsində kanalizasiya sistemi yerli-dibli yoxdur. Üstəgəl bu vəsaitdən yolun qazılan hissəsinin bərpası da həyata keçirilməyib.
Xatırladaq ki, 2016-cı ilin dekabrın 8-də əsaslı şəkildə yenidən qurulan Ramana-Maştağa avtomobil yolunun açılışında prezident İlham Əliyev də iştirak edib. Cəmi 6 il sonra "Azərsu" 8 milyon vəsaitlə sadəcə su xətti çəkmək üçün yolları məhv etməklə qalmayıb, vəsaitin böyük bir hissəsini havaya sovurub, tenderdə nəzərdə tutulan kanalizasiya sistemini tamamilə siyahıdan çıxarıb.
Mövzu ilə bağlı Azərbaycan Dövlət Su Ehtiyatları Agentliyinə sorğu göndərdik və mövzunu davam etdirəcəyik.
