“Azercell Telekom” MMC (“Azercell”) 16 noyabr 2025-ci ildən etibarən bir sıra tariflər üzrə qiymətləri artıracaq.
Yeniavaz.com xəbər verir ki, bu barədə məlumatı İqtisadiyyat.az saytı yayıb.
Bildirilir ki, qiymət artımı “Azercellim”, “Bölgə”, “GəncSim”, “Hər Yerə” və “Bizimkilər” tariflərini əhatə edəcək.
Yeni qərara əsasən, “Hər Yerə” tarif paketi üzrə qiymət 3 manatdan 3,89 manata, digər tariflər üzrə isə 2 manatdan 3,89 manata qaldırılacaq.
Qeyd edək ki, Yeniavaz.com məsələ ilə bağlı “Azercell Telekom”dan münasibət öyrənməyə çalışsa da, şirkətin mətbuat xidmətindən zənglərə cavab verməyiblər.
Xatırladaq ki, bir neçə ay əvvəl də “Azercell” fakturasız nömrələr (“SimSim”) üçün yeni şərtlər tətbiq etmiş və bu qərar ictimaiyyət arasında ciddi narazılıq doğurmuşdu.
Belə ki, “SimSim” nömrələrin balansına 1 manat yükləndiyi zaman nömrənin aktiv qalma müddəti cəmi 1 gün olub. Halbuki bir neçə ay əvvəl bu müddət 5 gün, ondan əvvəl isə 7 gün təşkil edirdi.
Müqayisə üçün qeyd edək ki, dünyanın əksər ölkələrində, o cümlədən qonşu dövlətlərdə fakturasız nömrələrin aktiv qalma müddəti Azərbaycanla müqayisədə xeyli uzundur.
“Vodafone” (Türkiyə) – 180 gün
“Turkcell” (Türkiyə) – 185 gün
“Magticom” (Gürcüstan) – 60 gün
“Megafon” (Rusiya) – 90 gün
“Telecom Armenia” (Ermənistan) – 90 gün
“Azercell” (Azərbaycan) – 1 gün