"Araşdırılmasına ciddi ehtiyac duyulur..." "DİA-AZ" xəbər verir ki, bunu özünün sosial şəbəkə hesabında yazan tanınmış hüquq müdafiəçisi, Neftçilərin Hüquqlarının Müdafiəsi Təşkilatının NHMT sədri Mirvari Qəhrəmanlı əlaqədar qurum və şəxslərə müraciət edərək, onlardan izahat tələb edir.

NHMT sədri neftçilərdən birinin yolladığı fotodəlillərlə yanaşı, onun müraciətini də ictimailəşdirib.

Beləliklə, neftçi yazır və sual edir ki:
"Şəkillərdə gördüyünüz yer “Neft Daşları” NQÇİ-nin idman zalıdır.
Məlumata görə, bu zal sonuncu dəfə “Neft Daşları”nın rəisi Balaəli Cəfərovun rəhbərliyi dövründə əsaslı təmir olunub. Lakin son üç il ərzində idman zalının vəziyyəti olduqca pisləşib və hazırda baxımsız vəziyyətdədir.
Məlumata görə, bir neçə ay əvvəl “Azneft” İB-nin bir neçə rəhbər əməkdaşı — “Neft Daşları”na səfər edərək işçilərin sosial-məişət şəraitini yoxlamaq məqsədilə yataqxanaya baxış keçiriblər.
Deyilənə görə həmin baxış zamanı “Neft Daşları” NQÇİ-nin əməyin mühafizəsi və təhlükəsizlik üzrə məsul şəxsi Bəhlul Eyyubovun idman zalına məxsus bəzi inventar və avadanlıqları öz otağına gətirərək istifadə etdiyi müəyyən edilib. ✅Həmçinin onun otağında əlavə elektrik qızdırıcısı, yemək bişirmək üçün elektrik sobası və digər avadanlıqlardan istifadə etdiyi, özünə xüsusi şərait yaratdığı bildirilir.
Əgər bu məlumatlar doğrudursa, ortaya çox ciddi suallar çıxır:
-İdman zalına məxsus avadanlıqlar hazırda haradadır?
-Bu avadanlıqlar hansı əsasla başqa otaqlara aparılıb?
-Bununla bağlı rəsmi akt və ya icazə varmı?
-Yataqxanaya baxış keçirən şəxslər bu məsələ ilə bağlı rəhbərliyə məlumat veriblərmi?
-Əgər məlumat verilməyibsə, bunun səbəbi nə olub?
-SOCAR rəhbərliyinə bu məsələlərlə bağlı tam və obyektiv məlumat təqdim olunubmu?
Əgər aşağı səviyyədə olan problemlər rəhbərliyə olduğu kimi çatdırılmırsa, bu, təkcə ayrı-ayrı əməkdaşların deyil, bütövlükdə idarəetmə və nəzarət sisteminin problemidir.
SOCAR rəhbərliyindən xahiş edirik ki, “Neft Daşları” NQÇİ-nin idman zalının hazırkı vəziyyəti, zala məxsus avadanlıqların taleyi və yuxarıda qeyd olunan digər məsələlərlə bağlı obyektiv araşdırma aparılmasını təmin etsin
Bizim məqsədimiz kimisə əsassız şəkildə ittiham etmək deyil. Məqsədimiz “Neft Daşları”nda çalışan neftçilərin sosial-məişət şəraitinin, onlara ayrılmış əmlak və avadanlıqların vəziyyətinin, eləcə də müəssisədə idarəetmə və nəzarətin necə həyata keçirildiyinə aydınlıq gətirilməsidir.
Qeyd:
9 oktyabr 2022-ci ildə “Neftçilər Günü” və “Neftçi” Peşəkar Futbol Klubunun 85 illiyi münasibətilə “Neft Daşları”-da “Neftçi” PFK ilə neftçilər arasında mini-futbol üzrə yoldaşlıq görüşü keçirildi. Görüşdə iştirak etmək üçün SOCAR prezidenti Rövşən Nəcəf, BP şirkətinin Azərbaycan, Gürcüstan və Türkiyə üzrə regional prezidenti Qəri Counz və digər rəsmi şəxslərdən ibarət nümayəndə heyəti “Neft Daşları”na səfər edib və neftçilərlə birlikdə futbol da oynadılar. Bu zaman ən diqqətçəkən məqam isə həmin tədbirdə təhlükəsizlik məsələsinə yanaşma ilə bağlıdır. Deyilənlərə görə, “Neft Daşları” NQÇİ-nin baş mühəndisinin əməyin mühafizəsi və təhlükəsizlik üzrə müavini Bəhlul Eyyubov meydançaya futbol oynamağa çıxan idmançılara kaska taxmağı tapşırıb. Fotolara diqqətlə baxdıqda, bəzi iştirakçıların meydançaya dəbilqə ilə çıxdığını görmək mümkündür.
Yəqin ki, bu mühəndisin öz peşəsinə bağlığı ilə də ola bilər.Belə ki, bu halda idman avadanlığını otağında , neftçinin isə sağlamlığını oyun zamanı "kaska" geyinmə tələbi ilə qoruyur..."