"Yəqin ki, tez-tez korrupsiya sözü eşidir və bir çoxlarımız bunu rüşvətlə qarışdırırıq. Hərçənd haqsız da deyilik, rüşvət korrupsiyanın bir elementidir, amma korrupsiya ondan daha geniş anlayışdır. Bəs, konkret olaraq korrupsiya nədir və mən niyə Naxçıvan “tendersatan”ını korrupsiyaya bulaşmaqda ittiham edir, onun dos-yaxınb qohumu Ziya Rəcəbli adlı vətəndaş buna qarşı çıxıb məni jurnalistikanın “qızıl qaydalarını” pozmaqda günahlandırır..." "DİA-AZ" xəbər verir ki, bunu özünün sosial şəbəkə hesabında tanınmış jurnalist Heydər Oğuz qeyd edib.

Jurnalist daha sonra fikrini belə davam edir: "Gəlin, ilk öncə, korrupsiya nədir sualına cavab verək.

Qanunuvericiliyə qörə, korrupsiya vəzifəli şəxslərin öz səlahiyyətlərindən və ya təmsil etdikləri qurumun imkanlarından qanunsuz olaraq şəxsi məqsədlər (maddi və ya qeyri-maddi nemətlər, imtiyazlar, güzəştlər) üçün sui-istifadə etməsidir. Bu anlayış eyni zamanda vəzifəli şəxslərin rüşvət alması, mənimsəmə və ya maraqların toqquşması kimi əməlləri də əhatə edə bilər.

Ötən gün təkrarən yaydığım sənədlərə əsasən, Naxçıvanın indiki rəhbəri, Prezidentin Naxçıvan üzrə xüsusi nümayəndəsi Ceyhun Cəlilov 16 mart 2023-cü ildən 25 aprel 2024-cü ilə qədər Muxtar Respublikanın Əmək və Əhalinin Sosial Müdafiə naziri vəzifəsini icra etdiyi müddətdə 20-dən artıq tender keçirib, ardınca da Naxçıvan MR-ın Baş naziri təyin olunub. Baş nazir təyin olunduqdan sonra ilk imza atdığı sənədlər ƏƏSM naziri işləyərkən keçirdiyi tenderləri bir-bir ləğv etmək olub. 20-dən artıq tenderi öz imzası ilə ləğv edib. Səbəbini isə belə göstərib göstərib: “Tender qanunların müvafiq tələblərinə uyğun keçirilməyib”.

Qanunun müvafiq bəndlərinin pozulması. Xatırladım ki, korrupsiyanın ilk əlamətlərindən biri də elə budur: vəzifəli şəxsin öz səlahiyyətlərindən və ya təmsil etdikləri qurumun imkanlarından qanunsuz olaraq şəxsi məqsədlər üçün sui-istifadə etməsi. İkinci əlaməti isə keçirilən tenderlərin birbaşa özünə bağlı adamların nəfinə sonuclanmasıdır ki, həmin şəxslərin kimliyinə və Ceyhun Cəlilovla yaxınlıq münasibətlərinə yaxın günlərdə bir daha aydınlıq gətirəcəyəm.

Qeyd edim ki, Naxçıvanda keçirilən əksər tenderlərin qalibi olan Xəyal Talıbovun qanunsuz fəaliyyəti barədə bir çox yerli iş adamları dəfələrlə Muxtar Respublika Prokurorluğuna müraciət etsələr də, heç birinin şikayətinə baxılmayıb. İnşallah, onların da müraciətlərini dərc etməyə çalışacağam.

Məni ən çox maraqlandıran isə Ceyhun Cəlilovun Naxçıvan MR-in müxtəlif orqanlarına yerləşdirdiyi qohum-əqrəbaları, yaxın simsarları ilə əlaqədardır. Hələlik sadəcə onu vurğulamaq istərdim ki, Naxçıvan ƏƏSMN-dəki mənbələrdən aldığım məlumata görə, hörmətli “Tendersatan”ın xanımı Xumar Cəlilova nazirliyin Daxili Nəzarət şöbəsinə rəhbərlik edir. Nazirlikdə bütün kadr yerləşdirmələri və tenderlər məhz Xumar xanımın nəzarəti ilə həyata keçirilir. Bu da əslində korrupsiyanın üçüncü mühüm əlamətidir. Hər halda bunu mən yox, “Korrupsiyaya qarşı mübarizə haqqında” Qanunun 7-ci maddəsi deyir:

“Maddə 7. Yaxın qohumların birgə işləməsinə yol verilməməsi

7.1. Vəzifəli şəxslərin yaxın qohumları, seçkili vəzifələr və qanunvericiliklə nəzərdə tutulan digər hallar istisna olmaqla, bilavasitə onun tabeliyində olan heç bir vəzifə tuta bilməzlər.

7.2. Bu Qanunun 7.1-ci maddəsinin tələblərini pozan şəxslər həmin tələblərin pozulması müəyyən edildikdən sonra 30 gün müddətində həmin pozuntunu könüllü olaraq aradan qaldırmadıqları halda tabeliyi istisna edən başqa vəzifəyə keçirilməli, bu mümkün olmadıqda isə həmin şəxslərdən biri tutduğu vəzifədən azad olunmalıdır.

7.3. Bu Qanunun 7.2-ci maddəsində göstərilən əsaslar üzrə vəzifədən azad olunmuş şəxslər digər orqanlarda (qurumlarda) vəzifə tuta bilərlər”.

Yəqin razılaşarsınız ki, qanunvericilik aktları yaxın qohumun tabeçiliyi altında işləməyi korrupsiya əlaməti saymasaydı, bu maddəni də haqqında danışdığım qanuna salmazdı.

Maraqlıdır ki, yaxın qohumun tabeçiliyi altında işləməyi “Dövlət qulluğu haqqında AR qanunu” da qadağan edir. Qanunun 27.2.-ci maddəsində bu barədə deyilir:

“27.2. Hər hansı şəxs dövlət qulluğuna aşağıdakı hallarda qəbul edilə bilməz:

27.2.3. bilavasitə tabeliyində və ya nəzarəti altında işləyəcəyi dövlət qulluqçusu ilə yaxın qohumluq və ya qudalıq (ər-arvadlar, onların valideynləri, qardaşları, bacıları, övladları) əlaqəsi olduqda”.

Ceyhun Cəlilov isə öz fəaliyyətində nə qanuna, nə Prezidentin göstəriş və Sərəncamlarına əməl edir. Onun öz qanunu var - “Muxtar Dərəbəylik qanunu”.."