2025-ci ilin IV rübündə “Unibank”ın ticarət və investisiya qiymətli kağızları üzrə faiz gəlirləri 3 milyon 738 min manat təşkil edib.

Bu göstərici 2024-cü ilin eyni dövrü ilə müqayisədə 953 min manat və ya 20,31% azdır.

Yenicag.az xəbər verir ki, bu azalma bankın aktivlərindən əldə etdiyi gəlirlərin zəiflədiyini və maliyyə alətlərinin əvvəlki dövrlərlə müqayisədə daha aşağı gəlirlilik verdiyini göstərir. Faiz gəlirlərindəki bu geriləmə fonunda xərclərin kəskin artması bank üçün ciddi struktur problemi yaradır.

Hesabat dövründə bank müştərilərə depozitlər üzrə 75 milyon 814 min manat faiz ödəyib. Bu, ötən illə müqayisədə 12 milyon 840 min manat və ya 20,39% artım deməkdir. Daha narahatedici məqam isə cəlb edilmiş kreditlər üzrə ödənilən faizlərin 10 milyon 363 min manatdan 19 milyon 929 min manata yüksəlməsi, yəni faktiki olaraq ikiqat artmasıdır.

Bu rəqəmlər göstərir ki, “Unibank” likvidliyi qorumaq üçün vəsaiti getdikcə daha baha qiymətə cəlb edir. Resursların bahalaşması bankın əsas gəlir mənbəyi olan kreditləşmədə faiz marjasını daraldır və gələcək dövrlərdə mənfəətə birbaşa təzyiq yaradır.

Depozitlərin ümumi həcmi 1 milyard 377 milyon 937 min manat təşkil edib. Fiziki şəxslərin depozitləri 1 milyard 89 milyon manat, hüquqi şəxslərin depozitləri isə 288 milyon 870 min manat olub. Müvafiq olaraq, bu göstəricilər 13,87% və 16,38% artım göstərsə də, artımın əsas səbəbi bazar şərtləri deyil, yüksək faizlər hesabına depozit cəlbidir. Bu isə bank üçün uzunmüddətli və baha öhdəliklər deməkdir.

2025-ci ilin hesabat dövründə bank 25 milyon 781 min manat xalis mənfəət açıqlayıb ki, bu da əvvəlki illə müqayisədə 26,4% artım deməkdir. Lakin bu mənfəət artımı bankın dayanıqlılığının gücləndiyini deyil, xərclərin artım tempinə baxmayaraq hələlik balansın qoruna bildiyini göstərir. Əsas problem odur ki, bu balans çox kövrəkdir.

Bankın ümumi faiz xərcləri 30,45% və ya 23 milyon 785 min manat artaraq 101 milyon 921 min manata çatıb. Bu, gəlirlərin artım tempini açıq şəkildə üstələyir. Qeyri-faiz xərcləri isə 5,7% artaraq 219 milyon 462 min manat olub ki, bu da bankın əməliyyat yükünün hələ də ağır qaldığını göstərir.

“Unibank”ın maliyyə hesabatı bir məqamı açıq şəkildə ortaya qoyur: bank daha çox qazanmaq üçün daha bahalı resurslardan istifadə etməyə məcbur qalır. Faiz gəlirləri azalarkən faiz xərclərinin kəskin artması klassik marja riski yaradır.

Əgər yaxın dövrlərdə:

• Kreditlər üzrə faiz gəlirləri artırılmasa,

• Problemli kreditlərin həcmi yüksəlsə,

• Bazar faizləri daha da bahalaşsa,

o zaman indiki mənfəət göstəriciləri sürətlə əriyə bilər.

Mövcud göstəricilər “Unibank” üçün “gizli risklər dövrü”nün başlandığını deməyə əsas verir. Kağız üzərində mənfəət artımı olsa da, xərclərin strukturu və resursların bahalaşması bankı orta müddətli risk zonasına sürükləyir. Əgər bu tendensiya dəyişməzsə, “Unibank” yaxın dövrlərdə mənfəəti qorumaqda ciddi çətinliklərlə üzləşə bilər.