Suraxanı rayonu ərazisində yerləşən FHN-in xidməti binasında 2013-cü ildə nazirliyin əməkdaşlarına təqdim olunan mənzillərlə bağlı narazılıqlar barədə redaksiyamıza məlumat daxil olub.

Tribunainfo.az-a şikayət ünvanlayan vətəndaşlar bildiriblər ki, sözügedən mənzillərin geri alınmasına başlanılıb və ilkin mərhələdə 7 ailənin evdən çıxarılması tələb olunur.

Sakinlərin sözlərinə görə, bu mənzillər həmin dövrdə dönəmin rəhbərliyi, general-leytenant Faiq Tağızadə və general-leytenant Etibar Mirzəyev tərəfindən çıxışlarında mənzilləri işçilərə “hədiyyə” kimi təqdim ediblər.

Maraqlıdır ki, ARB kanalı mövzu ilə bağlı anons versə də, süjet efirə verilməyib.

Şikayətçilər bildirirlər ki, artıq 20 ildən çox qüsursuz xidmət göstərmiş, medallarla təltif olunmuş hərbçilər və mülki müdafiə əməkdaşları belə, evsiz qalma təhlükəsi yaşayır.

Eləcə də, digər binalarda hədiyyə olaraq verilmiş mənzillərdə yaşayan digər dövlət işçiləri (mülki müdafiə) də məsələ ilə bağlı redaksiyamıza müraciət edib. Onlar deyirlər ki, bu prosesdən ciddi narahatdırlar və təmir etməyə belə qorxurlar, çünki gələcəkdə özlərinin də evdən çıxarılmasından narahatdırlar.

Hadisə ilə bağlı FHN-in mətbuat xidməti ilə əlaqə saxlasaq da, onlardan cavab verilməyib.