Naxçıvan taksilərinə Türkiyənin Iğdır vilayətinə sərnişin daşımaq qadağan edilib. Bu qadağanı Türkiyə tərəfi bir neçə həftədir tətbiq etməyə başlayıb. Yeni qaydanı pozan sürücülər cərimələnir, avtomobillərinə isə 15 günlük həbs cəcası verilir. Bu haqda “Gündəlik Naxçıvan”a taksi sürücüləri məlumat veriblər.

Sürücülər bildirirlər ki, jandarma onları gömrüyü keçdikdən sonrakı 20 kilometrlik nəzarət zonasında yoxlayırlar.

Jandarma avtomobillərin taksi olub-olmadığını yoxlamaq üçün sürücülərdən sərnişinlərin ad-soyad və təvəllüdlərini soruşurlar. İmtahandan keçə bilməyən sürücülər cərimələnir, avtomobillər isə, cərimə meydançasına göndərilirlər.

Taksi sürücüsü Gündüz Məmmədov da bir neçə gün əvvəl eyni üsulla cərimələndiyini deyir:

“İllərdir Türkiyəyə sərnişin daşımaqla çörək pulumuzu çıxarırıq. Son zamanlar oraya da 15 gündən bir buraxmağa başlamışdılar. İndi də Türkiyə tərəfi çörəyimizi tamilə kəsdi. Biz həm 3-4 nəfər qonum-qonşunu, başqa sərnişinləri aparıb-gətirərək benzin pulunu çıxarırıq, həm də evimizə alış-veriş edirik. İndi də sərnişin apardığımız üçün Türk polisi bizə göz verib, işıq vermir. Cərmələyirlər, avtomobilimizə həbs qoyurlar. Bunu Iğdır Dlucu keçid məntəqəsi arasında taksi kimi işləyən mikroavtobus sürücülərinin şikayəti əsasında etdiklərini deyirlər. Bildirirlər ki, naxçıvanlı sürücülər sərnişini gömrüyə kimi gətirməli, ordan İğdıra isə türkiyəli taksi sürücüləri aparmalıdırlar. Bu necə qardaşlıqdır? qardaş-qardaşa dar gündə kömək edər. Bunlar isə dar gündə bizi daha da sıxışdırırlar.”

Digər sürücü Nazim Məmmədov da eyni problemlə üzləşdiyini bildirir:

“Əvvələr belə şeylər olmurdu, biz də, onlar da Naxçıvan- İğdıra- Naxçıvan istiqamətində sərnişin daşıya bilirdik. Sonra 15 gündən bir getməyə icazə verdilər. İndi də deyirlər ki, Naxçıvan taksilərinə Türkiyə ərazisinə müştəri gətirmək olmaz. Naxçıvan gömrüyünə kimi gətirin, oradan verin Türkiyə taksilərinə. Nə edəcəyimizi bilmirik. Vəziyyətimiz onsuz da ağırdır. Çörək pulunu çıxara bilmirik. Heç olmasa ayda 2 dəfə gedib-gələ bilirdik. İndi nə edəcəyimizi bilmirik.”

Sürücülərin bildirdiyinə görə, hazırda 10-larla Naxçıvan taksisi Türkiyədə həbsdədir.