“İcra nümayəndəsi Rəşad Hacıbalayev barəmdə işlətdiyi nalayiq ifadələrə görə qanun çərçivəsində cavab verəcək. Mənə nəsə olsa, bunun günahı icra nümayəndəsi Hacıbalayevdə olacaq. Məni özünəqəsd həddinə çatdırıb”.

Bunu “Facebook” hesabında Xaçmazın Fərzəlioba kənd sakini Ülkər Bayramova yazıb.

Ülkər Bayramova həm də həmin məktəbin müəllimidir.

Fərzəlioba kəndi İnzibati Ərazi Dairəsi üzrə Köhnə Xudat icra nümayəndəliyinin tərkibindədir. Bayramovanın şikayəti də Köhnə Xudat icra nümayəndəsi Rəşad Hacıbalayevdəndir. Xanımın iddiasına görə, icra nümayəndəsi 5 ildən çoxdur ki, ona qarşı qərəzlidir:

“Mən təkcə müəllimə deyiləm, həm də kəndimizin ziyalısı olaraq kənddəki problemləri dilə gətirirəm, aidiyyəti qurumlara yazıram, kömək istəyirəm, tələb edirəm. Kənddə yol, mavi yanacaq problemi var, ictimai nəqliyyatın fəaliyyəti bərbaddır, işıq dirəkləri 60-cı illərdən qalıb, külək əsəndə adamın üstünə aşır. Məktəbdəki qızdırıcı da elektriklə işləyir, işıq sönəndə müəllim, şagird – hamımız soyuqdan donuruq. Mən bunları niyə dilə gətirməməliyəm? Vətəndaş olaraq vergi ödəyicisi kimi normal şərait tələb etmək haqqım var. Bütün bunlara görə də icra hakimiyyətindən tutmuş bütün aidiyyəti qurumlara yazıb göndəririk və bütün bu yazışmaları mən təşkil edirəm. İcra nümayəndəsi də bundan qıcıq olur”.

Ülkər Bayramova deyir, hələ 5 il əvvəl icra nümayəndəsi ona dərs dediyi məktəbdə hücum edib:

“Dərsdən çıxanda şagirdlərin, müəllimlərin, valideynlərin gözü qarşısında mənə hücum etmişdi ki, sən müxalifətçisən, aranı qarışdırmaqla məşğulsan. Bunu yuxarı orqanlara da yazmışdı ki, müəllimə müxalifətçidir, kənddə təxribatla məşğul olur. Araşdırıb gördülər ki, YAP-çıyam. Çağırdılar, soruşdular, dedim, məgər yaşadığım yerin problemlərini dilə gətirmək üçün mütləq müxalifətçi olmaq lazımdır? Mən vergi ödəyən bir vətəndaş olaraq rahat şərait, yol, qaz, işıq, ictimai nəqliyyat tələb edirəm. Hər haqqını tələb edən müxalifətçi olur ki?”.

Ülkər Bayramova deyir, icra nümayəndəsi onu təkcə müxalifətçi adlandırmır, həm də bir qadın olaraq ünvanına nalayiq ifadələr işlədir:

“Mən kəndin problemlərinin aradan qaldırılmasını tələb edirəm, o isə orda-burda arxamca ünvanıma nalayiq, əxlaqsız ifadələr işlədir. Kiçik kənddir, ağızdan bir söz çıxanda beş dəqiqəyə yayılır. Mən tək anayam, üç övlad böyüdürəm, qızım ali məktəbdə təhsil alır, digər övladlarımı da oxudub bir tərəfə çıxarmağa çalışıram. Bu adamsa sağda-solda ünvanıma demədiyi söz buraxmır. Gəlib xəstə atamın qulağına çatır, vəziyyəti pisləşir. Oğlanlarım böyüyür, qız anasıyam, onun nə ixtiyarı var ki, mənim barəmdə olmazın əxlaqsız sözlər danışsın? Dəfələrlə polisə də müraciət etmişəm, bu aralar yenə təkrar müraciət etmişəm, prokurorluğa da yazmışam. İcra nümayəndəsi məni o həddə çatdırıb ki, az qalıram özümü öldürüm”.

Qadının sözlərinə görə, bu yaxınlarda o, yenə kəndin ictimai nəqliyyat problemini dilə gətirib. Növbəti dəfə icra nümayəndəsi tərəfindən təhqirə məruz qalıb:

“Kəndimizə avtobus işləmir. Oğlum Xudat şəhərindəki məktəbdə təhsil alır. Gedib-gəlmək çox çətindir. Buna görə də rayon icra nümayəndəsi Fuad Şahbazovdan xahiş etmişəm ki, kəndə marşrut xətti açılsın. Müəllimlərin və kənd camaatının adından müraciət etmişəm. Fuad müəllim də mənə normal şəkildə cavab verdi, bildirdi ki, sakinlərlə səyyar görüş keçiriləcək, orada bu təklif müzakirə olunacaq, rayon rəhbərliyi çalışacaq ki, kəndin ictimai nəqliyyat problemi həll etsin. Bu məsələ icra nümayəndəsini özündən çıxarıb”.

Bayramovanın sözlərinə görə, kənddə kiçik tutumlu avtobusu olan bir nəfər var, icra nümayəndəsinə yaxın adamdır. Bekar vaxtlarında – əlavə məşğuliyyət kimi kənd sakinlərinə avtobus xidməti göstərir. Bu isə kənd sakinlərini qane etmir:

“Bizə daimi və dəqiq rejimlə xidmət göstərən ictimai nəqliyyat lazımdır, kiminsə kefiylə avtobus sürən yox… Mənim məktəbli oğlum niyə kefinə düşəndə avtobusunu xəttə çıxaran, kefinə düşməyəndə evdə yatan birindən ötrü küçələrdə, yollarda qalmalıdır? Müraciətim həm o avtobus sahibinin, həm də icra nümayəndəsinin xoşuna gəlməyib. İcra nümayəndəsi minib avtobusa, orada da sərnişin kənd camaatı olub. Ünvanıma çox ağır söyüşlər söyüb, deyib ki, yenə ora-bura yazır, avtobus tələb edir, sürücü də qoşulub ona, ünvanıma, şəxsimə nalayiq ifadələr işlədib. Avtobusda şagirdlərim də olub. Onlar bunu evdə öz valideynlərinə, valideynləri isə mənə dedi. İcra nümayəndəsi bu hərəkətləriylə mənim şagirdlərimin yanında özgüvənimi sarsıtmağa, məni aşağılamağa çalışır. Bu isə artıq dediyim kimi, məni intihar həddinə çatdırıb”.

Ülkər Bayramova deyir ki, aidiyyəti qurumlar şikayətinə baxmazsa, kəndin icra nümayəndəsi tərəfindən şagirdləri və valideynlər yanında qəsdən aşağılanan, təhqir olunan bir müəllimə kimi Prezidentə müraciət edəcək.

Meydan TV Rəşad Hacıbalayevlə də əlaqə saxlayıb. İcra nümayəndəsi müəllimənin ona böhtan atdığını deyir:

“Bu yaxınlarda mənə “Whatsapp” üzərindən kənddə yol kənarında texnikaların dayanmasıyla bağlı mesaj göndərmişdi. Özü də elə tonla tələb edirdi ki, “sənə deməmişəm filankəs orda texnika saxlamasın?” O filankəs də bunun keçmiş ərinin əmisi oğludur. Deyirəm, ay xanım, bu, adamın kənd təsərrüfatı texnikasıdır, lapetdir, otbiçəndir, kotandır. Adam qapısında saxlayıb. Ona necə deyə bilərəm ki, apar texnikanı başqa yerdə saxla?”.

“Demişəm, get, o yolun xəritəsi bələdiyyədədir, xəritədəki piyada yolunu tutursa, o başqa məsələ. O iş qaldı yarımçıq… İkinci məsələ də kəndin avtobus məsələsidir. İdrisoba, Fərzəlioba kəndlərinə avtobus işləyir. Şıxzaman adlı kişinin avtobusudur, yaxşı işləyir, hamı da razılıq edir. Gündə iki reys məktəb uşaqlarını və müəllimləri daşıyır. 10-12 gün əvvəl yolda saxlamışam, minmişəm, kənd adamlarından soruşmuşam ki, bir narazılığınız var, yoxdu? Razılıq ediblər. Orada heç bunun adı çəkilməyib. Kimsə gedib yalandan deyib ki, guya sürücüylə mən ünvanına söyüş söymüşük”, – icra nümayəndəsi bildirib.

Rəşad Hacıbalayev deyir, Ülkər Bayramovanın polisə, prokurorluğa etdiyi şikayətlərlə əlaqədar dəvət olunub və izahat yazıb.