Azərbaycan media məkanında uzun illər fəaliyyət göstərən “Space TV” bu gün ciddi maliyyə və idarəetmə böhranı ilə gündəmdədir. Kanal rəhbərliyində baş verən dəyişikliklər və keçmiş rəhbər Vado Korovinin müəmmalı gedişi ətrafında yaranan suallar ictimai müzakirələri daha da gücləndirib. “Space TV” ətrafında baş verənlər artıq adi idarəetmə problemi deyil - bu, Azərbaycan media məkanında məsuliyyətsiz rəhbərliyin hansı nəticələrə gətirib çıxardığının açıq nümunəsidir.

Reyting.az xəbər verir ki, mətbuatda və media dairələrində səslənən iddialara görə, kanalın 3 milyona yaxın borc yükü formalaşıb. Xüsusilə vergi öhdəlikləri, sosial müdafiə fonduna və digər dövlət qurumlarına ödənişlərlə bağlı problemlərin olduğu qeyd edilir. Əgər bu məlumatlar təsdiqini tapsa, haqlı olaraq bir sual yaranır: kanalın reklam və kommersiya gəlirləri hansı istiqamətdə istifadə olunub?

Bir televiziya kanalının illərlə reklam gəliri əldə etməsinə baxmayaraq bu vəziyyətə düşməsi ya total səriştəsizlikdən, ya da çox ciddi idarəetmə pozuntularından xəbər verir. Hər iki halda məsuliyyət daşıyan şəxslər cavab verməlidir.

Maliyyə intizamının bu dərəcədə pozulması təkcə idarəetmə zəifliyi deyil, eyni zamanda ciddi məsuliyyət doğuran məsələ kimi qiymətləndirilə bilər. Cəmiyyətin gözləntisi ondan ibarətdir ki, aidiyyəti qurumlar bu məsələləri tam şəffaf şəkildə araşdırsın və əgər qanun pozuntuları aşkarlanarsa, hüquqi qiymət verilsin.

Vado Korovinin rəhbərliyi dövrü bu gün media cameəsində ən uğursuz idarəçilik nümunələrindən biri kimi müzakirə olunur. Strateji media qurumunun peşəkar televiziya idarəçiliyi təcrübəsi olmayan şəxsin ixtiyarına verilməsi əvvəldən yanlış qərar idi və nəticəsi də göz qabağındadır.

Digər tərəfdən, hazırkı vəziyyət “Space TV”-yə rəhbərlik etmək istəyən potensial yeni komanda üçün də ağır miras yaradır. Çünki kanala gələcək hər bir yeni rəhbərlik ilk növbədə mövcud borc yükü, dağılmış maliyyə strukturu və itirilmiş reputasiya ilə üzləşməli olacaq.

Bir çox media ekspertlərinin fikrincə, peşəkar televiziya idarəçiliyi təcrübəsi olmayan şəxslərin strateji media qurumlarına rəhbər təyin olunması belə böhranların əsas səbəblərindən biridir. Media sektoru şəxsi münasibətlər və təsadüfi seçimlərlə deyil, peşəkarlıq, strateji idarəetmə və şəffaflıq prinsipləri ilə idarə olunmalıdır.

“Space TV” ətrafında baş verənlər təkcə bir kanalın problemi deyil - bu, ümumilikdə media idarəçiliyi sahəsində hesabatlılıq və peşəkarlıq məsələsini yenidən gündəmə gətirir. Media idarəçiliyi şəxsi münasibətlərin, təsadüfi təyinatların və qeyri-peşəkar yanaşmanın sınaq meydanı deyil.

Reytinq.az