Fasiləsiz yağan yağışlar “makler evləri”nin və dəyəri süni şəkildə şişirdilmiş tikililərin əsl üzünü ortaya çıxardı.

Bu sözləri Tribuna.az-a iqtisadçı Günay Hüseynova yağışdan zərər görən ərazilərdə əmlak qiymətlərinin necə dəyişə biləcəyindən danışarkən deyib.

Ekspert bildirib ki, baş verənlər ev almaq istəyən vətəndaşlar üçün ciddi xəbərdarlıq oldu:

“Uzun illərdir gölməçələr qurudulur, üzəri torpaqla doldurulur və həmin ərazilərdə evlər tikilir. Bu cür torpaqlar illərdir bələdiyyələr tərəfindən satılır. Amma diqqət edilmir ki, həmin ərazidə tikinti aparmaq ümumiyyətlə uyğundur, yoxsa yox.

Bu hadisə ev almaq istəyən vətəndaşların gözünü açdı. Hazırda keyfiyyətsiz şəkildə inşa edilən ‘makler evləri’nin əksəriyyətini su basıb. Su çəkilib, evlər quruyan kimi həmin tikililər yenidən sürətlə satışa çıxarılacaq.

Ev almaq istəyən vətəndaşlar mənzilə və əraziyə məhz yağışlı və ya qarlı havada baxsalar, daha düzgün qərar verərlər. Bu halda aldanmaz, problemi əvvəlcədən görə bilərlər.

Çünki belə evlərdə və həyətlərdə olan nəmişliyi gizlətmək üçün adətən müştəri gəlməzdən əvvəl həyəti isladırlar ki, guya təzəcə yuyulub. Halbuki bu, sırf nəmişliyi gizlətmək və alıcını aldatmaq məqsədi daşıyır”.

G. Hüseynovanın sözlərinə görə, bu hadisədən sonra “makler evləri”nə maraq da azala bilər:

“Düşünmürəm ki, bu hadisədən sonra həmin evlərə tələbat artsın.

Əksinə, vətəndaş artıq bu cür halları gördükdən sonra özü ev tikdirməyə daha çox maraq göstərəcək.

Ancaq əsas məsələ isə odur ki, tikinti materiallarının qiymətində müəyyən artımlar ola bilər. Çünki yağışın fəsadları ilə bağlı təmir-bərpa işlərinin həcmi artacaq”.