“Azərbaycanın xarici ticarətində İran 2-3 faizli payla əhəmiyyətli rol oynayır. İrana uzunmüddətli tətbiq edilən sanksiyalar bu əlaqələrin daha geniş olmasına maneçilik törədib. Azərbaycan bazarı, ərzaq məhsulları, gündəlik istehlak, məişət malları, sənayedə istifadə edilən müəyyən xammal aksessuarları İran bazarından idxal edir. Xüsusilə də kənd təsərrüfatı və gündəlik istehlak, ərzaq, süd məhsullarının İrandan idxalı əhəmiyyətli rol oynayır. İranın rolu yanlız bu məhsulların idxalı ilə yekunlaşmır. İran Azərbaycan üçün ciddi tranzit əhəmiyyətli ölkədir. Şərqlə ticarətdə Şimal-Cənub Nəqliyyat Dəhlizi vasitəsilə idxal mühüm rol oynayır və məhsulların daha qısa zamanda, ucuz çatdırılmasını təşkil edir. Biz İranı təkcə idxal edilmiş məhsulların həcmi ilə yox, həmçinin Azərbaycana təqdim etdiyi tranzit imkanlarının gətirdiyi faydalar kimi müqayisə etməliyik”.
Bu sözləri Pravda.az-a açıqlamasında iqtisadçı Xalid Kərimli deyib.
O bildirib ki, Azərbaycanın Türkiyə, Naxçıvan ilə daha qısa və əlverişli marşrutu İran üzərindən keçir və Orta Dəhlizin tam formalaşmaması, Zəngəzur dəhlizinin də işə düşməməsi də bu konteksdə Azərbaycanın Naxçıvan, Türkiyə ilə qısa əlaqəsinin İran üzərindən gəlib keçməsinə gətirib çıxarır: “İranın tranzit ölkə kimi problem yaşaması, eyni zamanda İrandan gələn idxal məhsulların ölkənin ərzaq, məişət bazarında rolunu nəzərə alsaq, cənub qonşumuzda gedən müharibə ölkəyə gətirilən məhsulların bahalaşmasına gətirib çıxaracaq. Logistik xərclərin artmasına gətirib çıxara bilər. Bir sıra məhsullar, təbii ki, Gürcüstan ərazisindən gələcək, amma bu xəttin də yüklənməsi əlavə risklər yarada bilər. Orta Dəhlizin tam gücü ilə hələlik işləməməsi də İran üzərindən tranzitin alternativi həmin Dəhliz vasitəsilə gətirilməsinin mümkün olmadığını deməyə imkan verir. Orta Dəhlizin tam funksional olmaması sadəcə cüzi miqdar yükün buradan gəlməsinə gətirib çıxarır. Bu baxımdan İran Azərbaycanda tranzit məhsulların, digər ölkələrdən aldığımız məhsulların gəliş istiqamətidir. Həmçinin İrandan gələn bir sıra məhsullar Azərbaycan bazarında qiymət stabilləşdirici və qiymətlərin yüksəlməsinə imkan verməyən rola malikdir. İrandan gələn məhsullar bir qədər ucuz olduğuna görə rəqib məhsulların da bahalaşmasına maneçilik törədirdi”.
