Laçında fəaliyyət göstərən zavodda fəhlənin betonqarışdıran qurğunun içində faciəli şəkildə ölməsi ilə bağlı araşdırmalar yekunlaşıb. Hadisə Laçının Pircahan kəndində “Falcom” şirkətinə məxsus müəssisədə baş verib. Bu müəssisə işğaldan azad edilmiş ərazilərdə tunellərin və körpülərin tikintisi və bu tikintilərə tələb olunan betonun təmin edilməsi üçün beton istehsalı ilə məşğul olur.

Bizimyol.info xəbər verir ki, hadisə nəticəsində dünyasını dəyişmiş Laçın rayonunun Qarakeçdi kənd sakini Elgün Əhmədov ali təhsilli olub, jurnalistika fakültəsini bitirib. Orada bir neçə gün imiş ki, fəhlə işləyirmiş.

Bədbəxt hadisə 2024-cü il avqustun 15-də səhər saat 10 radələrində baş verib.

Bu hadisəyə görə “Falcom” MMC-də operator işləyən Kərim Kərimov cinayət məsuliyyətinə cəlb olunub. İttihama əsasən, o, beton qarışdırıcı qurğunun içində kiminsə olub-olmadığını yoxlamadan, orada təmizlik işləri aparan fəhlələrin işlərini bitirib-bitirmədiyinə əmin olmadan kompüter vasitəsilə əmr verərək, qurğunu işə salıb. Nəticədə qurğunun pərləri (şnekləri) hərəkətə gəlib və sürətli şəkildə fırlanaraq, həmin vaxt qurğunun içərisində təmizlik işləri görən Elgün Əhmədovun ölümünə səbəb olub.

Neftçala sakini olan 1989-cu il təvəllüdlü Kərim Kərimov özünü təqsirli bilir. O, ifadəsində deyib ki, əvvəllər ayrı-ayrı yerlərdə fəhlə işləyib, ailəsini dolandırıb. Hadisə günü səhər saat 6 radələrində Elgün Əhmədov və daha iki fəhlə ilə yeməkxanada birlikdə yemək yeyiblər. Saat 7-yə qalmış onlar zavoda gedib, orada müəyyən işlər görüblər: “Saat 8-9 radələrində mən beton verdim, bundan sonra otağa gəldim. Fəhlələrdən Elgün və Yaqubun beton qarışdıran qurğunu təmizləmək üçün getməsindən mənim xəbərim olmayıb. Onlara mən deməmişdim ki, beton qarışdıran qurgunu təmizləsinlər. Bu səbəbdən Elgün və Yaqubun beton qarışdıran qurgunun içində olduğunu bilməmişəm, buna fikir verməmişəm. Çay içdim, evlə danışdım, sonra otağa girdim. Qurğu təmizlənəndə orada xəbərdarlıq düyməsi basılır, qırmızı işıq yanır. Qırmızı işığın yanmasını görməmişəm. Ona görə də təmizləmə niyyəti ilə düyməni vurdum. Yaqubun qışqırıq səsini eşitdim, deyirdi ki, “saxla”. Dərhal düyməni söndürüb, “rubilniki” ayırdım. Qaçıb gedib hadisəni görəndə qışqırıb kömək istədim. Bundan sonra həkim gəldi, dedi ki, Elgün Əhmədovu müayinə edərək onun artıq dünyasını dəyişib”.

Elgün Əhmədovun qardaşı Elmir Əhmədov isə məhkəmədə dindirilərkən narazılıq edib. Zərərçəkmişin hüquqi varisi qismində ifadə verən Elmir Əhmədov bildirib ki, qardaşının ölümü ilə bağlı cinayət işi obyektiv və hərtərəfli araşdırılmayıb. Hadisənin qəsdən törədildiyini iddia edərək, işin yenidən araşdırılması üçün prokurorluğa qaytarılmasını istəyib.

Elmir Əhmədovun sözlərinə görə, qardaşı müvəqqəti fəhlə işləyirdi, ali təhsilli və bilikli olduğuna görə ona şirkətin Laçındakı başqa bir zavodunda operator vəzifəsinə keçirilməsi söz verilmişdi. Hesab edir ki, bunun qarşısını almaq istəyənlər olub: “Qardaşım təhlükəsizlik düyməsini basandan sonra qurğunun içinə girib. Deyirlər ki, yox, düymə basılmayıb”.

Beton qarışdırıcı aparatın ön sağ küncündə “bloklayıcı qəza siqnal” (stop) düyməsi var. Onu basıb aktiv edəndən sonra operatorun otağındakı kompüterin monitorunda bununla bağlı xəbərdaredici işıq yanır. Ekspertiza rəy verib ki, həmin düymə aktiv olduğu müddətdə qurğunu kompüterdən işə salmaq mümkün deyil. İstintaq zamanı zavodda eksperiment keçirib, bu məsələni əyani şəkildə də yoxlayıblar. Sonda istintaq belə nəticəyə gəlib ki, fəhlələr Elgün Əhmədov və Yaqub təmizlik işləri görərkən həmin düyməni aktiv vəziyyətə gətirməyiblər. Yoxsa operator Kərim Kərimov qurğunu işə sala bilməzdi.

Bu hadisə ilə əlaqədar əvvəl Cinayət Məcəlləsinin 124.1 (ehtiyatsızlıqdan adam öldürmə) maddəsi ilə cinayət işi başlanıb. Bir müddət sonra isə Cinayət Məcəlləsinin 162.2-ci (əmək mühafizəsi qaydalarını pozma, ehtiyatsızlıqdan ölümə səbəb olduqda) maddəsinə tövsif olunub. Bir neçə gün əvvəl məhkəmənin hökmü ilə Kərim Kərimov bu maddə ilə təqsirli bilinərək, 4 il azadlıqdan məhrum edilib. Lakin bu cinayət ehtiyatsızlıqdan törədilmiş cinayətlər kateqoriyasına aid olduğuna görə o, cəzasını məntəqə tipli cəzaçəkmə müəssisəsində çəkəcək.