"Hindistanın Azərbaycanın Şanxay Əməkdaşlıq Təşkilatına tamhüquqlu üzvlüyünə keçməklə bağlı blok qoymasının arxasında duran bir neçə səbəb ola bilər. Amma əsas görünən odur ki, Pakistan-Azərbaycan dostluğu, qardaşlığı və yaxınlığı Hindistan üçün qəbuledilməzdir. Əslində, Azərbaycanın Hindistanla münasibətlərində əvvəllər ciddi gərginlik olmayıb. Azərbaycanla Hindistan arasında ticarət əlaqələri mövcuddur və hətta bir milyard manata yaxın ticarət dövriyyəsi olub. Bu isə o deməkdir ki, Azərbaycanın Hindistanla bağlı bir problemi yoxdur".

Bu fikirləri Redaktor.az-a açıqlamasında politoloq Samir Hümbətov Hindistanın Azərbaycanın Şanxay Əməkdaşlıq Təşkilatına tamhüquqluüzvlük təklifinə blok qoymasının səbəblərindən danışarkən bildirdi. Onun sözlərinə görə, Hindistanın Ermənistanı müharibə zamanı silahlandırması isə ayrıca məsələdir:

"Hindistanın Azərbaycana qarşı hərəkətində əsas motiv Pakistanın müdafiəsi və haqlı mövqeyinin dəstəklənməsidir. Pakistan da Azərbaycanın mövqeyinə uyğun hərəkət edir və bu, qeyri-adi hal deyil. Əgər Azərbaycan bu işlərə razılıq verməsəydi, Pakistan Ermənistanı tanısa belə, Azərbaycan bu addımı dəstəkləməsə, belə hərəkət etməzdi. Pakistanın Ermənistanı bloklaması Hindistana açıq mesajdır ki, əgər sən Azərbaycanın iştirakını məhdudlaşdırırsansa, mən də sənin tərəf olduğunu bloklayıram. Bu, tərəflər arasında açıq bir siqnal kimi qiymətləndirilir. Bu baxımdan Pakistan Azərbaycan kimi eyni qardaşlıq münasibətlərini davam etdirir. Azərbaycan da öz növbəsində bu münasibətləri qoruyur. Azərbaycan Prezidenti ilə Pakistan Baş naziri Şahbaz Şərif arasındakı görüşdə də bu məsələ müzakirə olunub. Qardaşlıq münasibətləri inkişaf etdirilir və davam etdirilir".

Müsahibimizin fikrincə, Pakistanla Azərbaycan arasındakı qardaşlıq münasibətinin böyük faydaları olacaq:

"Paralel olaraq, Hindistana da bir mesaj verilib: bu cür hərəkətlər Azərbaycan və Pakistanı bir-birinə qarşı yönəltməyəcək, əksinə, bir-birimizin yanında daha sıx və möhkəm dayanmağımıza şərait yaradacaq".