Xırdalan şəhərində kafedə qadınlar arasında dava olub.

Demokrat.az xəbər verir ki, hadisə Xırdalan şəhəri, 28-ci məhəllədə yerləşən “Bakı gecələri” kafesində baş verib.

Şirvan şəhər sakini, 1993-cü il təvəllüdlü Aydan həmin kafedə işıqları söndürərək rəqs edən zaman Gülnarənin (adlar şərtidir – red.) kafenin işıqlarını yandırmasını bəhanə edib və heç bir əsaslı səbəb olmadan ictimai yerdə ictimai qaydanı kobud surətdə pozan hərəkətlərə yol verib.

Aydan masanın üzərində olan boşqabı götürərək Gülnarəyə tərəf atıb. Bu zaman boşqab Gülnarənin ayağına dəyməsi nəticəsində xəsarət alıb. Bu hərəkətləri ilə o, həmçinin kafe sahibi Dilarəyə 40 manat dəyərində əmlakının məhv edilməsi ilə nəticələnən ziyan vurub.

İstintaq orqanı tərəfindən Aydanın barəsində Cinayət Məcəlləsinin 221.3-cü (silahdan və ya silah qismində istifadə olunan əşyalardan istifadə edilməklə törədilməsi zərər çəkmiş şəxsə zor tətbiq olunması ilə, yaxud özgənin əmlakının məhv edilməsi və ya zədələnməsi ilə müşayiət olunan xuliqanlıq törətmək) maddəsi ilə ittiham elan edilib.

İş üzrə ifadə verən təqsirləndirilən Aydanın sözlərinə görə, məlum hadisə gün, saat 20 radələrində Mahir ilə birlikdə tez-tez oturub istirahət etdikləri “Bakı gecələri” kafesinə gedib, orada birlikdə spirtli içki qəbul edib:

“Daha sonra əyləndiyimiz vaxt mahnı sifariş etdim və işıqları söndürərək Mahir ilə birlikdə oynamağa başladım. Həmin vaxt kafedə təxminən 10-12 müştəri olub. Biz oynayan zaman kafeyə sonradan müştəri kimi gələn adını bilmədiyim bir qadın mənə heç nə bildirmədən işığı yandırdı. Mən həmin şəxsə irad tutdum. Həmin qadın iradıma fikir vermədən çiyini ilə məni itələyərək etinasız şəkildə yanımdan keçərək getmək istədi”.

Təqsirləndirilən şəxs deyib ki, daha sonra adını Gülnarə kimi bildiyi həmin xanım onu itələdikdən sonra o da onun üzərinə doğru gedib: “Həmin vaxt bir-birimizin yaxamızdan tutaraq dartışdırsaq da, kafedə olan müştərilər bizi ayırdı və sakitləşdirdilər. Lakin həmin qadın yerinə keçdikdən sonra məni nalayiq ifadələrlə təhqir etdiyi üçün masanın üzərində olan boşqab və külqabını ona tərəf atdım. Bundan sonra aramızda mübahisə yenidən başladı. Gülnarə mənə, mən də ona masanın üzərində olan əşyaları atdım. Bundan sonra müştərilərin bəziləri qorxularından çıxaraq getsələr də, zalda qalan şəxslər bizi sakitləşdirdilər. Sakitlik yarandıqdan sonra kafeyə nə qədər ziyan dəyməsi ilə bağlı kafeni işlədən Dilarədən soruşdum. O, ziyanın 30 manat olduğunu dedi. Mahir isə Dilarəyə 40 manat pul verdi”.

Təqsirləndirilən şəxs bildirib ki, əməlindən peşmandır, heç kəsə zərər vermək niyyəti olmayıb, içkili olduğu üçün Gülnarənin işığı söndürməsi ona xoş olmayıb, nəticədə həmin hadisə baş verib.

Abşeron Rayon Məhkəməsinin hökmü ilə Aydan 2 il 6 ay 3 gün müddətinə azadlıqdan məhrum edilib. Onun cəzasını ümumi rejimli cəzaçəkmə müəssisəsində çəkməsi müəyyən edilib.

Qeyd edək ki, Aydan bundan əvvəl də mühakimə edilib. O, Sumqayıt Ağır Cinayətlər Məhkəməsinin hökmü ilə Cinayət Məcəlləsinin 126.1-ci (qəsdən sağlamlığa zərər vurma) maddəsi ilə təqsirli bilinib və məhkum olunub.

Həmin hökmə əsasən, Aydanın barəsində Cinayət Məcəlləsinin 70-ci maddəsi tətbiq edilib və ona şərti cəza verilib.

Həmin ittihamdan məlum olub ki, Aydan 20 fevral 2023-cü ildə, gecə saat 00:40-da radələrində “Bakı gecələri” kafesinin qarşısında əvvəllər ər-arvad münasibətlərində yaşadığı Mahir ilə arasında kirayə yaşadıqları evin borclu qaldıqları kirayə pulunu ödəməməsi ilə bağlı mübahisəsi yaranıb. O, yaranmış mübahisə zamanı üstündə gəzdirdiyi bıçaqla Mahirin sağ kürək nahiyəsinə bir dəfə zərbə vurub.

Aydan həmin ifadəsində göstərib ki, 8 yaşlı bir oğlu var, lakin evli olmayıb:

“Həmin oğlumun atası qeyri-rəsmi yaşadığım Vüsal adlı şəxsdir. Övladım məndən alınıb, hazırda Vüsalın himayəsindədir. Övladımın yenidən himayəmə verilməsi barədə müraciət etmişəm. Amma övladım mənim himayəmə verilməyib. Mən heç yerdə işləmirəm, Xırdalan şəhərində müxtəlif yerlərdə kirayədə qalmışam”.

Təqsirləndirilən şəxsin ifadəsinə görə, Mahir adlı şəxsi təxminən 1 il olar tanıyır və həmin vaxtdan da onunla birlikdə ər-arvad kimi yaşayır: “Bu müddət ərzində münasibətlərimiz normal olub. Birlikdə
yaşadığım müddət ərzində Masazır qəsəbəsində, Qurtuluş-93 yaşayış kompleksində qalmışıq”.

Aydanın sözlərinə görə, 2023-cü ilin fevralın 1-də Mahir yaşadığı evdə mübahisə edib, onu qısqandığı üçün gecələr kafelərə getməyinə narazılıq edib: “Həmin tarixdə yaşadığım evdən çıxmasını, getməsini tələb etdim. Mahir evdən gedəndə artıq yaşadığımız müddətdə borclu qaldığımız evin kirayə haqqını verməyəcəyini bildirdi. Mən Mahirin borclu qaldığı kirayə pulunu verməyəcəyini bildiyim üçün ona pulu ödəyənə qədər onun evdə olan sənədlərini və əşyalarını verməyəcəyimi dedim. Mahir də dedi ki, fevralın 10-da mənimlə görüşərək pulu ödəyəcəkdir. Fevralın 10-da Mahir dostları ilə birlikdə yaşadığım ünvana gəldi, sənədləri geri istədi. O, mənə kirayə pulunu fevral ayının 19-da geri qaytaracağını bildirdi. Mən də Mahirə inanaraq sənədlərini verdim. Bundan sonra daha Mahir ilə əlaqəm olmadı”.

Aydan qeyd edib ki, məlum hadisə günü, saat 22 radələrində Xırdalan şəhərində ’’Bakı Gecələri” kafesinə gəlib və görüb ki, Mahir dostu ilə birlikdə həmin kafedə oturublar: “Kafedə 3-4 nəfər tanımadığım müştərilər də olub. Mən də həmin kafedə oturaraq özümə pivə sifariş verdim. Mahiri kafedə görən zaman ondan kirayə pulunu nə vaxt verəcəyini soruşdum. O, pulu bir neçə saata ödəyəcəyini bildirdi. Mən yenidən Mahirdən bir neçə saat keçdiyini, pulu nə səbəbə ödəmək istəmədiyini soruşdum. Mahir isə mənə “vermirəm, get nə istəyirsən elə” sözlərini dedi. Mahirin bu sözləri mənə pis təsir etdi. Birgə yaşadığımız müddətdə kirayə pullarını Mahir ödəməyərək mənim üçün borc qoyub. Bundan sonra Mahirin üstünə hücum etdim və onunla əlbəyaxa oldum. Kiçik bıçaqla arxadan kürəyindən bir dəfə vurdum”.