Türkiyənin Azərbaycandakı Xidmət Qrupunun komandanı təyin edilib. Məlumata görə, həmin vəzifəyə general Soner Orucoğlu təyinat alıb. Qeyd edək ki, o, bu vəzifədə general Bəxtiyar Ərsayı əvəzləyib.
Bəs general Bəxtiyar Ərsayın vəzifədən getməsi siyasi qərardırmı?
Siyasi şərhçi Kənan Novruzov Moderator.az-a açıqlamasında bildirib ki, Türkiyənin Azərbaycandakı Xidmət Qrupunun komandanı general Bəxtiyar Ərsayın vəzifədən kənarlaşdırılması və Türkiyəyə geri çağırılması ilə bağlı müəyyən dezinformasiya kampaniyaları aparılırdı və məsələni siyasiləşdirməyə çalışanlar var idi.
Onun sözlərinə görə, bu məsələyə Türkiyə-Azərbaycan münasibətləri kontekstində yanaşanlar belə bir fikir yaratmaq istəyirdilər ki, guya bu, iki ölkə arasında maraqların toqquşmasının göstəricisidir:
“Ancaq açıq şəkildə görünən odur ki, sadəcə olaraq Bəxtiyar Ərsayın yerinə yeni bir hərbçi təyin edildi. General Soner Orucoğlu eyni vəzifəyə gətirildi. Bu isə göstərdi ki, Bəxtiyar Paşanın geri çağırılması siyasi məsələ deyil. Türkiyə-Azərbaycan münasibətlərinin dinamikası baxımından da bu hadisəyə xüsusi siyasi təhlil vermək düzgün deyil. Sadəcə olaraq, Bəxtiyar Paşanın xidməti dövrü başa çatdı və yeni bir xidmət mərhələsi başladı.
Ümumiyyətlə, bu cür hərbi vəzifələrdə xidmət müəyyən müddət – altı ay, bir il kimi dövrlərlə həyata keçirilir. Hərbçi gəlir, həmin vəzifəni icra edir və sonra geri dönür. İstisna deyil ki, gələcəkdə də Soner Paşanın yerinə başqa bir general təyin ediləcək.
Hər halda, Türkiyə-Azərbaycan münasibətləri ən yüksək səviyyədədir və strateji müttəfiqlik hərbi sahədə də özünü açıq şəkildə göstərir. Buna heç kimin şübhəsi olmamalıdır. Türkiyəli generalların Azərbaycanda yüksək vəzifələrdə olması da bunun bariz nümunəsidir və göstərir ki, Türkiyə daim Azərbaycanın yanındadır. Bu, həm də siyasi bir mesajdır”.
Siyasi şərhçi hesab edir ki, indiyə qədər Bəxtiyar Paşanın xidməti dövründə olduğu kimi, bundan sonra da Türkiyə ilə Azərbaycan arasında hərbi əməkdaşlıq və əlaqələr əvvəlki qaydada davam edəcək:
“Burada hansısa ciddi yenilik və ya xüsusi dəyişiklik gözləməyə dəyməz, çünki bu vəzifə elə bir müstəsna post deyil ki, hər hansı dəyişiklik böyük siyasi anlam daşısın. Bütün hallarda Bəxtiyar Paşanın geri çağırılması siyasi qərar deyil və yalnız xidməti dövrün bitməsi ilə bağlıdır”.
