Son günlər bölgə bazarlarında ətin qiyməti 2 manata qədər bahalaşıb.

Bu artım əhalidə məhsullarda ümumi qiymət artımının yaranacağı ilə bağlı narahatlıq yaradıb.

Xüsusilə sentyabrın ənənəvi olaraq “qıtlıq ayı” hesab edilməsi fonunda toyuq, balıq və meyvə-tərəvəz məhsullarında da bahalaşma ola biləcəyi ehtimal olunur.

Bəs ətlə yanaşı digər bazar məhsullarının qiymətində artım gözlənilirmi?

Mövzu ilə bağlı “Cebheinfo.az”-a açıqlama verən iqtisadçı-ekspert Xalid Kərimli bildirdi ki, meyvə-tərəvəz məhsullarının qiyməti mövsümə görə dəyişir:

“Toyuq, balıq və meyvə-tərəvəz məhsullarının qiymətində xüsusi artım gözlənilmir. Meyvə-tərəvəz məhsullarının qiyməti isə sezon bitdikcə artır.
Hansı meyvə və tərəvəzin sezonu başa çatırsa, onun qiymətində artım müşahidə oluna bilər. Bu qiymətlər əvvəlki sezon dövründəki göstəricilərdən daha yüksək olsa da, bu təbii və normal haldır”.

Ekspert qeyd etdi ki, ətin qiymətində yenidən artım ola bilər:

“Ümumi şəkildə isə yaxın gələcəkdə ətin qiymətinin bahalaşacağı proqnozlaşdırılır. Bunun səbəbi heyvanların saxlanma xərclərinin artması və qiymət yüksəlməsinə baxmayaraq ətə olan tələbatın azalmamasıdır. Əhali baha olsa belə, ət almağa davam edir.

Son illərdə ətin istehlakı 20-25 % artıb ki, bu da tələbatın çoxalması ilə bağlıdır. Eyni zamanda saxlanılan heyvanların sayının azalması da göstərir ki, yaxın gələcəkdə qiymətlər tədricən artacaq”.