“Ermənistan öz qarşısına Azərbaycanla arasında etimadı damla-damla yaratmaq vəzifəsini qoyub. Etimad olarsa, sülh müqaviləsinə ehtiyac özü-özünə aradan qalxacaq”.

“Cebheinfo.az”-ın məlumatına görə, Ermənistanın Baş naziri Nikol Paşinyan xarici dövlətlərin ölkəsində fəaliyyət göstərən səfirləri və konsulları ilə Qafan şəhərində keçirilən görüşdə belə deyib.

Paşinyan Azərbaycanla sülh müqaviləsinin paraflanmasını qarşılıqlı etimadın gücləndirilməsi istiqamətində mühüm addım hesab etsə də, paradoksal yanaşma nümayiş etdirir. Baş nazirin fikrincə, Ermənistanla Azərbaycan arasında sülh müqaviləsinin imzalanması vacib deyil.

Tərəflərin bir-birinə qarşılıqlı şəkildə etimad göstərməsi münaqişəli vəziyyətə son qoya bilər. Nikol Paşinyanın sözləri ilk baxışdan bəlağətli (ərəbcədən tərcümədə səlis, gözəl danışıq, natiqlik məharəti) səslənsə də, sülh müqaviləsinə ehtiyacın olmaması barədə açıqlaması Ermənistana növbəti dəfə etimadsızlıq yaradır.

Çünki istənilən münaqişənin həlli sülh müqaviləsinin imzalanmasından keçir. Təbii ki, Azərbaycan və Ermənistan cəmiyyətləri arasında real barışığın əldə olunması üçün qarşılıqlı etimadın bərqərar olmasına da ehtiyac var.

Lakin sülh müqaviləsi etimadın əsas hüquqi və siyasi təminatıdır. Bunu beynəlxalq hüquq da tələb edir. Belə ki, müqavilə və beynəlxalq etimad beynəlxalq hüquqda vəhdət təşkil edir. Onlardan birini qəbul edib, digərini istisna etmək olmaz.

Ermənistan Azərbaycan tərəfinin etimadını qazanmaq üçün ilk növbədə, yekun sülh sazişini imzalamalıdır. Sülh müqaviləsi isə yalnız Ermənistan Konstitusiyasında Azərbaycana qarşı ərazi iddialarının çıxarılmasından sonra mümkündür.

Yaxın qonşuluq, mehriban dostluq, qarşılıqlı etimad sülhün və sabitliyin mühüm prinsipləridir. Ermənistan referendum keçirdikdən və müqavilə üzrə Azərbaycan qarşısında hüquqi öhdəliklər götürdükdən sonra etimad bərpa oluna bilər.

Azərbaycan xalqı keçmiş Dağlıq Qarabağ münaqişəsi başlanana qədər ermənilərə daima etimad göstərib, onlarla dinc yanaşı yaşayıb. Ancaq bu etimadın qarşılığı xəyanət oldu.

Ermənilər azərbaycanlılara qarşı soyqırım, terror, etnik təmizləmə törətdilər. Sülh müqaviləsi olmadan ermənilərin gələcəkdə yenidən analoji cinayətlərə əl atmayacağına heç bir zəmanət yoxdur.

Ona görə ki, Azərbaycana və Türkiyəyə qarşı nifrət ideologiyası ermənilər üçün siyasi stereotipə çevrilib. Nikol Paşinyan özü də erməni xalqının şüurunda dəyişiklik etməyin vaxtının çatdığını etiraf edir.

Baş nazir qeyd edib ki, Ermənistan ilk dəfə beynəlxalq hadisələrə uyğunlaşmağa başlayıb. Yəni Ermənistan Azərbaycana qarşı işğalçılıq müharibəsinə başladıqdan sonra beynəlxalq aləmdən təcrid olunmuşdu.

Qonşu dövlətlərə qarşı düşmənçilik və ərazi iddiası müstəqillik dövründə Ermənistanın beynəlxalq siyasi proseslərdən kənarda qalması ilə nəticələnib.

“Ən böyük problemlərimizdən biri bu olub ki, ölkəmizin yaşadığı nəzəriyyələr elita tərəfindən formalaşdırılıb və ictimaiyyətə öyrədilib. İndi bunun əksinin baş verdiyi dövrdə yaşayırıq.

Nəzəriyyələr xalqın şüurunda mayalanır, sonra xalqın nümayəndələri onları onları formalaşdırır və həyata keçirirlər. Bu prosesin üzvi təbiətini tam şəkildə qoruyub saxlamağımız çox vacibdir”, - deyə Paşinyan bildirib.

Nikol Paşinyan erməni cəmiyyətinin siyasi ideologiyasını dəyişməyin vacib olduğunu yaxşı anlayır. “Böyük Ermənistan” xülyası, başqa ölkələrə qarşı ərazi iddiaları kimi faşist ideologiyasına son qoyulmadan Ermənistana etimad göstərilə bilməz.