Balakən rayon Xalatala kənd sakini Ramil Seriyev qışda evini qızdırmaq məqsədilə sobada yandırmaq üçün kəsdiyi ağaclara görə cinayət məsuliyyətinə cəlb olunub. O, Cinayət Məcəlləsinin 259.2.4 (qanunsuz olaraq ağacları, kolları və ya digər yaşıllıqları kəsmə, külli miqdarda ziyan vurmaqla törədildikdə) maddəsilə cəzalandırılıb.
Bizimyol.info xəbər verir ki, 1989-cu il təvəllüdlü Ramil yaşadığı kənddə həm öz ailəsinə, həm də qonşulara və bələdiyyəyə məxsus torpaq sahəsində ümumilikdə 90 ağacı kəsməkdə ittiham olunur. İttihama əsasən, həmin ağacların 86 ədədi qızılağac, 2-si çinar, 2-si isə qovaq ağacları olub. O, bildirib ki, özünə və ailə üzvlərinə məxsus kənd təsərrüfatı təyinatlı torpaq sahəsinin ətrafı hasarlanmadığına görə ağaclar kəsilən hissənin hamısının özlərinə aid olduğunu zənn edib:
“Bizə aid torpaq sahəsindəki ağaclar əsasən qızılağaclardır. Başqa ağaclar da var. Qışda sobada yandırmaq üçün oduna ehtiyacımız var. Buna görə özümüzə məxsus torpaq sahəsindəki ağacları kəsmək qərarına gəldim. Həm də həmin ərazini təmizləmək istəyirdim. Bir neçə gün ərzində ağacları motorlu mişarla kəsdim. Bizim torpaqla başqalarının ərazisini ayıran hansısa hasar, nişan yoxdur. Amma təxmini sərhədləri bilirəm. Ona görə kəsdim. Heç bilməzdim ki, başqasının ərazisinə girmişəm. Kəsdiyim ağacları sobada yandırmışam”.
Ramil növbəti gün torpaq sahəsində olanda polislər gəlib. Ondan ağacları kəsmək üçün icazəsi olub-olmadığını soruşublar. O, bildirib ki, öz mülkiyyətlərində olan kənd təsərrüfatlı təyinatlı torpaq sahəsidir. Buna görə də hər hansı bir qurumdan icazə almayıb. Bir müddət sonra polis əməkdaşları ilə yanaşı, Ekologiya və Təbii Sərvətlər Nazirliyinin yerli idarəsinin əməkdaşları da gəlib.
Bələdiyyə öz ərazisində kəsilən ağaclara görə şikayətçi olsa da, qonşular şikayətçi olmayıb. Onlar bildirib ki, Ramil bilmədən onların ərazisindəki ağacları kəsib. Bu səbəbdən də ona qarşı şikayət və tələbləri yoxdur.
Balakən sakini 7 saylı ərazi Ekologiya və Təbii Sərvətlər İdarəsinə ümumilikdə 20 min 300 manat maddi ziyan vurmaqda ittiham olunub.
Ramil məhkəmədə bildirib ki, vurulmuş zərəri hissə-hissə ödəyəcək. Ona yüngül cəza təyin edilməsini xahiş edib.
Məhkəmə də ona 5 il azadlığın məhdudlaşdırılması cəzası təyin edib. Bu müddətdə o, elektron qolbaqla gəzməli, gecə saat 22.00-dan səhər saat 07.00-a qədər yaşadığı evi tərk etməməlidir.
