Bugünlərdə sosial şəbəkələrdə yayılan və keçmiş məcburi köçkünə aid olduğu bildirilən səs yazısı uzun illər əvvəl zəbt olunmuş mənzillərlə bağlı problemi yenidən gündəmə gətirdi.

Bizimyol.info xəbər verir ki, Qaçqınların və Məcburi Köçkünlərin İşləri Üzrə Dövlət Komitəsi səs yazısının Qubadlı rayonunun Muradxanlı kəndindən keçmiş məcburi köçkünə məxsusdur.

Mehriban Hüseynova 32 il əvvəl Qubadlıda yaşadığı evdən məcburi köçkün düşəndən sonra Sumqayıtda – Vəkil Verdiyevə məxsus 4 otaqlı mənzildə məskunlaşıb. Onillər boyu o, həmin mənzildə yaşadığı halda, əmlakın sahibi olan Verdiyevlər ailəsi yataqxanada əzab-əziyyət içində gün keçirməli olub. O, günü bu gün də həmin evdən çıxmaq istəmir. Səs yazısında da ev sahibindən onun mənzilini tərk etmək üçün pul tələb edir: “Öyrənmişik, bu evin qiyməti 120 mindir. Hərəmizə 10 min verirsənsə, çıxırıq. Dar ayaqda mənə 8 min, baldızıma 10 min...”

Verdiyevlər ailəsindən Bizimyol.info xəbər portalına bildirilib ki, Mehriban Hüseynovanın mənzildən könüllü şəkildə çıxmadığını görüb, onu məhkəmə yolu ilə çıxarmaq qərarına gəliblər. Təxminən 20 il əvvəl Sumqayıt Şəhər Məhkəməsi məcburi köçkünlərin mənzildən çıxması barədə qərar çıxarıb. Lakin həmin qərar icra olunmayıb.

1956-cı il təvəllüdlü Vəkil Verdiyev qərarın icrası üçün Qaçqınların və Məcburi Köçkünlərin İşləri Üzrə Dövlət Komitəsinə də üz tutub. O, Komitəyə əlindəki məhkəmə qətnaməsini təqdim edib. Bundan sonra onun mənzilində yaşayan məcburi köçkünlərə Biləsuvarda məcburi köçkünlər üçün qəsəbədə ev təklif olunub. Lakin onlar Sumqayıtdan getmək istəməyib: “Bizə də deyirdilər ki, gedin, nə istəyirsiniz, eləyin. Kimə istəyirsiniz, şikayət edin, çıxmırıq. Beləcə, 32 ildir onlar bizim evimizdədir, çıxmırlar”.

Sumqayıtda bu cür problemlə üzləşən təkcə Verdiyevlər ailəsi deyil.

Əslən Cəbrayıldan olan, lakin Sumqayıtda şüşə zavodunda işləyən 1941-ci il təvəllüdlü Vaqif Əliyev 1993-cü ildə mənzilin orderini alıb, həmin ərəfədə yaxın qohumu vəfat etdiyinə görə təcili rayona gedib. Qayıdanda isə mənzilinin Qubadlıdan olan məcburi köçkünlər tərəfindən zəbt olunduğunu görüb.

1996-cı ildə işlədiyi zavodda bir əlinin 4 barmağı kəsilən və I qrup əlil olan mənzil sahibi o vaxta qədər kirayə qalıb, pulunu birtəhər ödəsə də, sonra buna da imkanı çatmayıb. Evindən məcburi köçkünləri çıxara bilməyən, kirayə pulunu da ödəməyə maddi baxımdan gücü çatmayan Vaqif Əliyev məcburiyyət qarşısında Sumqayıtda şüşə zavodunun ərazisindəki anbara sığınıb.

Vaqif Əliyevin həyat yoldaşı Sara Əliyeva məcburi köçkünlərin çıxması üçün ardıcıl bir neçə dəfə öz evinə gedəndə orada yaşayanlar onu döyüblər.

Bu ailə də 9 mərtəbəli binanın I mərtəbəsində yerləşən 2 otaqlı mənzilindən məcburi köçkünlərin çıxarılması üçün məhkəməyə müraciət edib. Məhkəmə də onların xeyrinə qərar verərək, mənzilin boşaldılması barədə qətnamə çıxarıb. Lakin onların da mənzili ilə bağlı məhkəmə qərarı icra olunmayıb.

Qeyd edək ki, Bakıda və Sumqayıtda mənzili məcburi köçkünlər tərəfindən zəbt olunan, məhkəmə qərar çıxarsa da, icra olunmamasından narazı qalan onlarla mülkiyyətçi var. Onlar məhkəmə qərarının icra olunmamasından da şikayət ediblər. Lakin şikayətləri bu günə qədər nəticəsiz qalıb.