“SEPAH-i pasdaranın Azərbaycana qarşı, Azərbaycanın ərazi bütövlüyünə qarşı Azərbaycanın dövlətçiliyi və dövlət müstəqilliyinə qarşı səsləndirdiyi bu sərsəm, açıq hədə sözsüz ki, təsadüfi deyil və çox ciddi təhlükə siqnalıdır və bunun da mahiyyəti açıqdır. Yəni o səsləndirilən hədənin içində o təhdidin mahiyyətini açıq şəkildə görmək olur. Orada biz görürük ki, ifadə olunur ki, tezliklə ayrılmış budağı yenidən doğma vətənə birləşdirəcəyik” ifadəsi birbaşa göstərir ki, yəni bu tarixi saxtakarlıqdan fars molla rejimi əl çəkmək fikrində deyil”.
Savalan Araşdırmalar Mərkəzinin rəhbəri, siyasi şərhçi, GAMAC İdarə Heyətinin üzvü Sadiq İsabəyli Bizimyol.info xəbər portalına açıqlamasında bildirib ki, bu saxtalaşdırılmış tarixi ideoloji əsaslandırmalarla gündəmə gətirirlər: “Bu, açıq-aşkar Azərbaycanın ərazi bütövlüyünə qarşı yönəlmiş təhdiddir və faktiki olaraq yeni rejim bununla həm də elan etmək istəyir ki, Azərbaycana qarşı işğal planı var. Çünki orada konkret olaraq bəlli illəri müəyyənləşdirir. Yəni 2025-ci ildən başlayaraq, belə bir işğal prosesini müxtəlif müstəvilərdə aparmaq və 2040-cı ildə bunu yekunlaşdırmaq, həm ideoloji müstəviyə işarə edir, həm terror təxribatlarına işarə edir, həm birbaşa işğal planının olduğuna işarə edir. Bu, çox ciddi bir təhdidi ortaya qoymuş olur. Çünki bu sadə bir millət vəkili tərəfindən edilən bir təhdid deyil. SEPAH-i pasdaranı hamı tanıyır. Hamı bilir ki, İran İslam Respublikasının ideoloji rejimini qorumaqda mükəlləf olan hərbi ideoloji və siyasi bir struktur. SEPAH-i pasadaran ümumiyyətlə, ölkəni tamamilə öz əlində saxlayır. Hər kəs bilir ki, orada icraedici orqan başında kimin olmasından asılı olmayaraq, qanunverici orqan, məhkəmə orqanları müstəqil orqanlar deyil. Bu gün Məsud Pezeşkianın davranışlarında bunu görürsünüz. Məsələn; Məsud Pezeşkian Azərbaycana səfərində Azərbaycan bayrağını yaxasına taxmır, amma Ermənistana gedəndə Ermənistan və İranın bayrağını yaxasına taxır. Bu mesajı kimin verdiyi bəllidir. Onun mahiyyətində nə durur? Fars molla rejimi demək istəyir ki, "biz illər boyu Ermənistanı hərtərəfli dəstəklədik, bu dəstəyimiz İranın icraedici orqanında və onun başında kimin durmasından asılı olmayaraq yenə də davam edəcək". Bu, bir Məsud Pezeşkian kimi türk də ola bilər. Bir başqa etnikdən də ola bilər, fərq etmir. Ona görə də bunu sadə bir təxribatçı mesaj kimi görmək yanlışdır. Bu, açıq şəkildə Azərbaycan dövlətinə qarşı yönəlmiş işğala çağırışdır və buna ciddi cavab verilməlidir. Çünki bu, regional təhlükəsizlik baxımından ciddi riskləri artırır və İranın bir məqsədi də budur”.
Sadiq İsabəyli qeyd edib ki, Azərbaycan-Ermənistan arasında münasibətlər İkinci Qarabağ savaşından sonra yeni bir mərhələyə gəlib, artıq yeni reallıqları üzə çıxıb: “Bu prosesdə Azərbaycanın təşəbbüskar və sülhə aparan fəaliyyətləri göz qabağındadır. Amerika Birləşmiş Ştatlarının dəvəti ilə “Ağ Ev”də sülh anlaşması paraflandı və bir növ dünyaya mesaj göndərildi ki, Güney Qafqazda sülh, əməkdaşlıq, iqtisadi layihələrin artıq icra olunması, kommunikasiyasının qurulması və dünyanın rifahı üçün yeni planların, yeni layihələrin həyata keçirilməsi nəzərdə tutulur. Bütün bunların hamısı Güney Qafqazda əsas olan məsələlərdəndir və bu prosesi aparılır”.
