“Azərbaycan dövləti dünyada tanınmasının qarşısını almaq üçün İran əlindən gələni edəcək. Azərbaycan dövləti diplomatik və təhlükəsizlik müstəvisində hazırlıqlı olmalı və fəaliyyətlər aparılmalıdır. Türkiyə dövləti bu məsələdə aktiv rol almalıdır. İran fars molla rejiminin, SEPAH-i pasdaranın bu işğalçı təhdidkar davranışlarına son qoymaq üçün Türkiyə İran rejiminə ciddi xəbərdarlıq etməlidir. Çünki bu ümumilikdə region üçün təhdiddən xəbər verir. Yəni sırf Azərbaycana işğal təhdidi kimi dəyərləndirilməməlidir. Burada regional bir təhdiddən və Türk dünyasına yönəlik bir təhdiddən söhbət gedir".
Savalan Araşdırmalar Mərkəzinin rəhbəri, siyasi şərhçi, GAMAC İdarə Heyətinin üzvü Sadiq İsabəyli Bizimyol.info xəbər portalına açıqlamasında bildirib ki, həqiqətdə fars molla rejimi və SEPAH-i pasdaran Azərbaycana qarşı bu təhdidlərini gerçəkləşdirə bilməz, bunu bilməlidir: “Güney Azərbaycanda milli azadlıq hərəkatı dediyimiz çoxmilyonlu bir hərəkat var və bu mahiyyət olaraq azərbaycançılıq əsasında formalaşan bir hərəkatdır. Bizim vətənimiz Azərbaycan, bizim milli siyasi hədəflərimizin mahiyyətində azərbaycançılıq durur və bu azərbaycançılığı təmsil edən Azərbaycan bayrağıdır. Bu, fars molla rejiminin uydurduğu ideoloji deyil, saxtalaşdırdığı tarix deyil. Onun saxtalaşdırdığı bayraq deyil.
Sadiq İsabəyli bildirib ki, fars molla rejiminin Azərbaycan dövlətinə açıq təhdidi bütövlükdə bütöv Azərbaycana yönəlmiş bir təhdiddir və sözsüz ki, bizim millətimiz, bu təhdidlərə boyun əyməyəcək.
“Güney Azərbaycanda artıq hər şeyin fərqindədirlər, fars molla rejiminin bütün mahiyyətini bilir, düşmənçilik siyasətinin səbəblərini və məqsədlərini bilir. Apardığımız milli azadlıq hərəkatı çox ciddi şəkildə irəliləyişlərə sahibdir və biz bütün proseslərdə bunu görürük. Əgər fars molla rejimi və SEPAH-i pasdaran bu kimi təhdidləri reallaşdıra biləcəyini düşünürsə, onlar bilməlidir ki, bu təhdid onların özünə yönələcək və bundan heç də qazanclı çıxmayacaq. Uduzan tərəf İranın fars-molla rejiminin özü olacaq.
Çox çalışırlar ki, Quzey və Güney Azərbaycan arasında parçalanma yaratsınlar. Bunlar çox çalışırlar desinlər ki, Quzey Azərbaycan İsrailin maraqlarına xidmət edir. İran İsrailə qarşı formalaşdırdığı düşmənçilik siyasətini Azərbaycana qarşı yönəltməyə çalışır.
Bütün bunların hamısı artıq iflasa uğrayan bir siyasətdir. Tribunalardan bir zamanlar səsləndirirdilər ki, “İsrail dövləti 25 il sonranı görməyəcək” biz gördük ki, nəhayətdə İsrail onları 12 gün ərzində, necə deyərlər, elə bir vəziyyətə qoydu ki, hələ də ondan qurtara bilmirlər. Yəni təkcə İsrailin 12 günlük hücumları nəticəsində vurulan maddi ziyan 30 milyard dollarla ölçülür. Fars molla rejiminin 2025-ci ildən 2040-cı ilə qədər bir işğal planı var. Fars molla rejimi və SEPAH-i pasdaran bunu sadəcə reallaşdıra bilməyəcək, təhdid edə bilər, amma reallaşdıra bilməyəcək. Çünki bir çox proseslər var ki, heç bu rejimin yatsa yuxusuna da gəlməz ki, necə aparılacaq və nə kimi məsələlər olacaq. Elə o birdən görəcək ki, qəfildən bir şey oldu və bitdi”-deyən Sadiq İsabəylinin fikrincə, zamanla biz görəcəyik ki, proseslər heç də fars molla rejiminin iddia etdiyi proses deyil və tamamilə gerçəklik fərqlidir.
