Son aylarda yaşanan hadisələr Kremlin Azərbaycana qarşı məqsədyönlü düşmənçilik siyasətini daha da aydın göstərir. Ukraynanın Odessa istiqamətində Azərbaycan neftinin də ixrac olunduğu qaz kəmərinə hücum, SOCAR-ın yanacaqdoldurma məntəqələrinin dəfələrlə hədəfə alınması, səfirliyimizin yaxınlığındakı ərazilərə raket zərbələri Moskvanın planlı təxribatının bariz nümunəsidir. Ötən ilin sonunda mülki sərnişin daşıyan təyyarəmizin vurulması, Yekaterinburqda baş verən hadisələr və MDB çərçivəsində nümayiş olunan soyuqluq da bu münasibətin davamı kimi dəyərləndirilir. Bu təxribatların fonunda Vaşinqtonda Azərbaycan Prezidenti İlham Əliyevlə ABŞ Prezidenti arasında baş tutan tarixi görüş, iki ölkə arasında strateji tərəfdaşlığın möhkəmlənməsi və Cənubi Qafqazda sülhə yönəlik yeni imkanların açılması Moskvanın narahatlığını daha da artırıb. Rusiya regionda sabitliyi istəmir, Azərbaycanın müstəqil xarici siyasətini və ABŞ-lə güclənən əməkdaşlığını isə açıq şəkildə qısqanır.
Rusiyanın Azərbaycana qarşı düşmənçilik siyasəti və səbəblərini şərh edən Məhəmməd Əsədullazadə region ölkələrinin müstəqil xarici siyasət kursunun Kreml üçün qəbuledilməz olduğunu deyib. O "Sherg.az"a açıqlamasında Azərbaycanın regional və beynəlxalq siyasətdə özünü müstəqil aktor kimi təsdiqlədiyini vurğulayıb:
"Türkiyə ilə koordinasiyalı fəaliyyət, hərbi, siyasi və iqtisadi sahələrdə strateji müttəfiqlik Kreml üçün balansın dəyişməsi deməkdir. Ermənistanla birbaşa ikitərəfli danışıqlar Moskvanın vasitəçilik monopoliyasını zəiflədib, onu regiondakı əsas arbitr rolundan kənarlaşdırıb. Qərblə enerji və təhlükəsizlik əməkdaşlığı Azərbaycanın Rusiya orbitindən çıxması istiqamətində mühüm addım kimi dəyərləndirilir. Rusiyanın məqsədi Azərbaycanı öz təsir dairəsində saxlamaqdan ibarətdir. Moskva, Azərbaycanın Ukrayna müharibəsində neytrallığını qəbul etmək istəmir, onu Belarus kimi açıq dəstək mövqeyinə çəkməyə çalışır. Bu isə birmənalı olaraq Azərbaycanın milli və dövlət maraqlarına ziddir. Balanslaşdırılmış siyasət ölkəmizin beynəlxalq mövqelərinin əsasını təşkil edir. Rusiya Azərbaycanı regional vassal kimi görmək istəyir, halbuki Bakı çoxvektorlu siyasət yürütməklə həm Qərb, həm də Şərq ilə münasibətləri tarazlaşdırır".
Moskvanın Azərbaycanı təzyiq altında saxlamaq üçün müxtəlif vasitələrdən istifadə etdiyini vurğulayan M.Əsədullazadə qeyd edib ki, AZAL təyyarəsinin vurulması diplomatik gərginliyi artırmaq və təhlükəsizlik siqnalı göndərmək məqsədi daşıyırdı. Ukraynadakı Azərbaycan səfirliyinə raket hücumu isə Azərbaycana siyasi mesaj ötürmək xarakterini özündə ehtiva edir. Ukrayna ərazisindəki SOCAR anbarlarının və yanacaqdoldurma məntəqələrinin vurulması isə Azərbaycana iqtisadi ziyan vurmaq, guya bizi "cəza"landırmaq planının tərkib hissəsidir və birbaşa bizə qarşı yönəlmiş düşmənçilik siyasətidir:
"Rusiya regionu özünün "xüsusi təsir zonası" kimi görür, Azərbaycanın müstəqil siyasət yeritməsi isə onun bütün planlarını pozur. Cənubu Qafqaz ölkələrini öz vassalı kimi görmək arzusu Rusiyanın bu bölgədən tamamilə sıxışdırılmasına səbəb oldu. Halbuki region ölkələri müstəqil siyasət yeritmək və Rusiya ilə qarşılıqlı əməkdaş etmək istəyirdilər. Bu prosesdə Qərb dövlətləri və Türkiyə regionda alternativ təhlükəsizlik və iqtisadi əməkdaşlıq mexanizmlərini gücləndirir. Fikrimcə, Rusiya təzyiq taktikasını davam etdirəcək, lakin hərzaman olduğu kimi Rusiyanın anti-Azərbaycan siyasəti iflasa uğrayacaq. Azərbaycan müstəqil siyasəti apararaq həm iqtisadi təhlükəsizliyini, həm də siyasi müstəqilliyini möhkəmləndirir".
