Əməkdaşlarımız Şəmkirin sabiq başçısı Aslan Aslanovun oğlunu öldürməkdə təqsirləndirilən Lamiyə Quliyeva və keçmiş nişanlısı Vüqar Əliyevin ailəsində olub. “Yeni Müsavat”ın reportyor qrupu Ruslan Aslanovun qətlinin təfərrüatlarını yerindəcə araşdırıb. Hər iki ailə başına gələn müsibətləri “Yeni Müsavat”a danışıblar.
“Vüqarla Ruslanın münasibəti yaxşıydı, hətta...”
Ondan başlayaq ki, hadisəyə qədər Vüqar Əliyevlə Ruslan Aslanovun yaxşı münasibəti olub. Atası İbrahim İsmayılov danışır ki, hətta Vüqarın xahişi ilə Ruslan bu ailəyə “Şəmkir” stadionundan ayrıca elektrik xətti verib. Həmçinin, İ.İsmayılovun A.Aslanovdan xahişi əsasında magistral su kəmərindən ayrıca xətt də verilib:
* İbrahim İsmayılov Aslanovla torpaq mübahisəsi olmadığını deyir
“Yəni bizim Aslanla, onun oğlu ilə heç bir problemimiz olmayıb. 2003-cü ilin aprelin 3-də Vüqarla Lamiyə nişanlandı. Biz sonradan bilmişik ki, bundan sonra Ruslan Lamiyə ilə münasibətləri haqda orda-burda danışırmış. Deyirmiş ki, qızın bakirəliyini pozub. Bu söhbət Vüqara çatandan sonra məsələni Ruslandan soruşub. O da əvvəlcə təkzib edib, sonra Vüqara deyib ki, Lamiyə ilə üzləşmək istəyir. Bu məsələ üstündə başlanan mübahisədən xəbərimiz olmayıb”.
Apreldə nişanlanan gənclərin arasında mübahisələr may ayına qədər davam edib. İ.İsmayılovun sözlərinə görə, mayın 8-dən 9-na keçən Ruslanın təklifi ilə görüşüblər: “Ruslan öz maşını ilə Vüqarı mənim meyvə-tərəvəz piştaxtamın yanından götürüb. Ordan Lamiyəgilin evinə gediblər. Lamiyə də maşına oturub və həmin “SMU-28” deyilən əraziyə gediblər.
Ora həmin vaxt gözdən iraq bir yer idi. Maşının qabaq oturacağında Vüqar, arxada isə Lamiyə əyləşib və sözügedən ərazidə mübahisə başlayıb. Ruslan Şəmkirdə intim əlaqədə olduğu qızların adlarını sadalayarkən onlardan birinin də Lamiyə olduğunu deyəndə, bu zaman Lamiyə arxadan Ruslana iki bıçaq zərbəsi vurub. Ruslan maşından düşüb qaçmağa başlayıb və 17 metr irəlilədikdən sonra qarşıdakı kol-kosun arasına, Morul kəndinə gedən kanala yıxılıb. Sonradan onun meyitini kanalda aşkarlamışdılar”.
Anası: “Aslanov məni, qardaşımı və bacılarımı tutdurdu”
* Vüqarın ailəsi həbslərdən söz açır
Vüqarın anası Məlahət İsmayılovanın dediklərindən: “Vüqarla Lamiyənin aprelin 3-də nişanı oldu. Mayda da bu iş başımıza gəldi. Heç kimin də bu işdən xəbəri olmayıb. Həmin gün bizim mağazaya getmişdim, gördüm, Vüqar orda yoxdur. Sonra Ruslanın dostları gəlib Vüqarı soruşdular. Dedim, Vüqar yoxdur.
Gecə yarısı hərbi polis rəisi və Ruslanın cangüdəni bizə gəldi. Gecə saat iki olardı, icra nümayəndəsi Tariyel Quliyev bizə gəldi. Dedi, başçı tapşırıb ki, uşaqları yığ, Ruslanın harda olduğunu soruş. Hadisədən sonra da Vüqar gəlib evə, yatıb və bizə də heç nə deməyib.
Evdə narahatlığı da hiss olunmurdu. Gecə yarısı Vüqarı gəlib apardılar. Biz ertəsi günün axşamı xəbər tutduq ki, Lamiyə bu işi görüb. Ondan sonra Aslanov bütün ailəmizi həbs etdirdi. Mayın 10-da oğlum Eynuru, 12-də yoldaşım İbrahimi tutdular.
İyunun 14-də məni və iki bacımı tutdular. Bizi üç ay Gəncə istintaq təcridxanasında saxladılar. Guya əvvəlcədən cinayəti bilib məlumat verməmişik. Qanunda bu maddənin ailə üzvlərinə şamil edilməsi yoxdur. Bizi avqustda sərbəst buraxdılar. O da Andreas Qrossun hesabına oldu, həmin ərəfədə Gəncəyə gəlmişdi və bizi azad etdilər”.
Vüqarın anası bildirir ki, Ruslan onların evinə heç zaman gəlməyib: “Amma Vüqarla əlaqəsi yaxşıydı. Bir-birinə hörmət edirdilər. Biz Ruslandan bir pislik görməmişdik. Ancaq atası onun hərəkətlərini görüb vaxtında yığışdırmalıydı. Aslan Aslanov isə ailəmizdə kim var, hamını həbsə atdırdı. Yoldaşımı, oğlumu, bacılarımı, qardaşımı tutdurdu. Bu zülmü Allah götürməz. Bacımla iki ay bir kamerada yatırdıq. Sonra iki bacıma 2 il şərti cəza verildi”.
“Bu kuklalar üzümə durdu”
Vüqarın atası əlavə edir ki, ailə üzvlərinin həbsindən sonra A.Aslanov onun təhsil şöbəsinin qarşısındakı obyektlərini yerlə-yeksan etdirib: “Hazırda “Abidələr parkı” olan yerin 5 sotu sənədlərlə mənə məxsusdur. Bu gün də həmin sənədlər məndədir.
Həmin 5 sot torpağı və üzərindəki tikililəri mən “Aşıq Teymur” adına müəssisədən balans dəyərini ödəməklə almışdım. Orada meyvə-tərəvəz piştaxtası qoymuşdum. Vüqar da oradakı tikilidə maşın təmir edirdi.
Yolun əks tərəfində Qönçə Lətifovanın meyvə-tərəvəz dükanı vardı. Həmin dükan piyada səkisinin üstündə idi. Bu hadisə baş verəndən sonra Aslan Aslanov ora gəlib Qönçə ilə söhbət etmişdi.
* Bıçağı satan Arzu Sadıqov
Demişdi ki, əgər İbrahim İsmayılovun üzünə durmasan, obyektini şumlayıb dağıdacağam.
Qönçəni öyrətmişdilər desin ki, guya İcra Hakimiyyətindən əraziyə gəlib deyiblər, İbrahimin obyekti plana düşüb və söküləcək.
Guya həmin vaxt mən gələnlərə demişəm ki, əgər obyektim sökülsə, mən Aslan Aslanovu və ya onun oğlunu öldürtdürəcəyəm. Əslində belə bir hadisə, söhbət olmayıb. Qönçə Lətifova Ağır Cinayətlər Məhkəməsində üzümə dayandı və dükanını xilas etdi. Qönçədən başqa Aslan Aslanov üzümə İcra Hakimiyyətində işləyən, özünün tabeçiliyində olan xeyli canlı kuklanı da saxlamışdı. Onların da ifadələri Qönçənin ifadələrindən fərqlənmirdi”.
İ.İsmayılov üzünə duran şəxslərin adlarını açıqlayır: “Şəmkir icra başçısının 1-ci müavini Tariyel Məmmədov, Şəmkir torpaq şöbəsinin müdiri Rüstəm Rüstəmov, mərkəzi poçtun müdiri Vilayət Cabbarov, şəhər sovetinin sədri Hacımurad Həsənov, gənclər şöbəsinin rəisi Nizami Əhmədov, İcra Hakimiyyətində şöbə müdiri işləyən Vahid Əkbərov, İcra Hakimiyyəti işçisi Mustafa Mustafayev, Şəmkir hərbi komissarı Həsrət İsmayılov, Şəmkir İH-də şöbə müdiri Sultan Məmmədov bir-bir üzümə durdular”.
“Guya Aslanovu dəfələrlə döymüşəm, halbuki...”
Onun sözlərinə görə, Şəmkir İH-dən adı şahidlər siyahısına salınan bələdiyyələrlə iş şöbəsinin müdiri Abdulla Sadıqov da olub: “Lakin özünün vicdanını, şərəfini vəzifəsinə dəyişmədi. O, Aslanovun uydurma söhbətlərini sona qədər təsdiqləmədi.
Baxmayaraq ki, Aslanov onu təhqir edib işdən qovmuşdu, həmin adam yalan ifadə vermədi. Üzümə dayananlardan biri də “kor Kamil” kimi tanınan Kamil Yusifov oldu. O, regional torpaq şöbəsinin müdiri idi. O dedi ki, guya onun yanında Aslanova demişəm ki, pay torpağımı verməsən, səni və ya oğlunu öldürəcəyəm. Bu adamları yalan ifadələri ilə məni cinayətin sifarişçisi kimi təqdim etməyə nail olmaq istəyirdilər”.
* Aslanovun oğlunun meyiti burada aşkarlanıb
İ.İsmayılov deyir ki, üzünə duran şəxslər onun A.Aslanovun kabinetinə dəfələrlə gələrək orada döydüyünü söyləyiblər: “Halbuki camaat onun kabinetinə düşmək mümkün deyildi. Aslanın qapısında polis dayanırdı, 1 nəfər kişi və qadın köməkçisi da vardı. Gəlib üzümə qarşı həyasızcasına yalan ifadə verdilər.
Məhkəmələr də onlara qulaq asdı. Onların yalan ifadələri ilə cinayətin əsl mahiyyətini gizlətməyə, pərdələməyə çalışırdılar. Bu işin Ruslan Aslanovun Lamiyəyə qarşı təcavüzü zəminində baş verdiyini gizlətmək üçün Aslan min hoqqadan çıxdı.
Guya oğlunun qətli sifarişini Elpərəst Həsənli, Şahbaz Süleymanov, Arif Səməndərov verdiyi barədə Vüqarı döyə-döyə ifadə almaq istəyirdilər. Xəyyam Vəliyev adlı əməliyyatçı oğlumun dişlərini sındırmışdı. Halbuki bu adamların hər biri ilə Aslan Aslanovun özünün şəxsi konflikti vardı”.
V.Əliyevin atası xatırladır ki, Ruslanın qətlindən sonra ona 3 maddə ilə ittiham elan olunub. Ona Cinayət Məcəlləsinin 307.3 - xüsusilə ağır cinayət barəsində xəbər verməmə, 188-ci - torpaq üzərində mülkiyyət hüququnu pozma, 134-cü öldürməklə və ya sağlamlığa ağır zərər vurmaqla hədələmə maddələri ilə ittiham irəli sürüb həbs ediblər.
Qeyd edək ki, növbəti reportajda Lamiyənin anasının, onu zorlamaqda ittiham edilərək həbs olunan xalası oğlunun, Vüqarın tutulan dayısının açıqlamalarını təqdim edəcəyik.
ardı var...
“Yeni Müsavat”
