Bakı Ağır Cinayətlər Məhkəməsində “Birlik-İnşaat” Məhdud Məsuliyyətli Cəmiyyətin (MMC) dələduzluqda təqsirləndirilən vəzifəli şəxslərinin cinayət işi üzrə məhkəmə hökmündə zərərçəkmiş kimi tanınmış Qasımova Gülşən İbrahim qızı şirkətin direktoru Elman Tağıyevin vəzifəsindən sui-istifadə edərək dələduzluq yolu ilə onun həyat yoldaşından 36 min manat pulu alaraq mənimsədiyini iddia edir. Zərərçəkənin bildirdiyinə görə, valideynlərilə birlikdə Ağdam şəhərinin işğalından sonra Bakı şəhərində məskunlaşıblar.
2004-cü ildə Qasımov Sənan İsmayıl oğlu ilə birgə nikaha daxil olan G.Qasımova 2004-cü ildən 2010-cu ilə qədər qayınanası ilə birlikdə yaşayıb. Mənzil şəraitlərini yaxşılaşdırmaq məqsədilə “Birlik İnşaat” MMC-nin direktoru ilə yeni tikdikləri binadan mənzil almaq barəsində razılığa gəliblər: Bundan sonra mənzilimizi sataraq 2010-cu il aprelin 28-də həyat yoldaşım Qasımov Sənan İsmayıl oğlu və onun İsmayıl adlı dostunun iştirakı ilə 36 min manat pulu “Birlik İnşaat” MMC-nin direktoruna verərək, aramızda “Birlik İnşaat” MMC-nin Bakı şəhəri, R.Məmmədov küçəsi 20 saylı ünvanda inşa etdiyi 15 mərtəbəli binanın birinci mərtəbəsində 86,7 kvadratmetr yaşayış sahəsi olan 7 saylı mənzilin bizə verilməsi barədə müqavilə bağlandı”.
İki azyaşlı övladından birinin ürək qüsurlu doğulduğunu və bu səbəbdən də müalicəyə ehtiyacı olduğunu bildirən G.Qasımovanın sözlərinə görə, mənzillərini satdıqdan sonra həyat yoldaşı Rusiyaya işləməyə gedib: “Mən isə iki azyaşlı uşağımla Bakının Nərimanov rayonundakı Əlyar Əliyev küçəsi, 26 A ünvanında yerləşən “Taxıl Məhsulları Kombinatı”nın “Tikinti Quraşdırma” İdarəsinin yataqxanasında məskunlaşan anamgilə köçərək bir otaqda 5 nəfərlə birlikdə yaşamağa məcbur olduq. Fikirləşirdik ki, müvəqqəti çətinlikdən sonra tezliklə təzə mənzilimizə köçəcəyik. Amma “Birlik İnşaat” MMC-nin direktoru rəsmi müqavilə ilə üzərinə götürdüyü öhdəliyi icra etməyərək, onu kobud şəkildə pozdu. Hətta sonra məlum oldu ki, o, bizə satdığı mənzili daha iki şəxsə satıb. O gündən ailəmiz pərən-pərən düşüb”.
G.Qasımova qeyd etdi ki, “Birlik İnşaat” MMC-nin vəzifəli şəxsləri tərəfindən dələduzluq yolu ilə pulları mənimsənilən vətəndaşlar aidiyyəti dövlət qurumlarına şikayət ediblər. Nəticədə, 2012-ci ildə Baş Prokuror yanında Korrupsiyaya Qarşı Mübarizə İdarəsində “Birlik-İnşaat” MMC-nin vəzifəli şəxsləri barəsində cinayət işi başlanıb. Həmin ilin oktyabr ayında Baş Prokuror yanında Korrupsiyaya Qarşı Mübarizə İdarəsində “Birlik-İnşaat” Məhdud Məsuliyyətli Cəmiyyətinin vəzifəli şəxsləri tərəfindən aldatma yolu ilə külli miqdarda özgə əmlakının ələ keçirilməsi faktına görə Cinayət Məcəlləsinin 178.3.2 (dələduzluq) və 308.2-ci (vəzifə səlahiyyətlərindən sui-istifadə) maddələri ilə başlanmış cinayət işinin istintaqı tamamlanıb.
Müəyyən edilib ki, cəmiyyətin təsisçisi və direktoru, baş mühasibi Roza Minaçaeva, həmçinin MMC-də qeyri-rəsmi işləmiş Soltan Məhərrəmov, Eyvaz Fərəcov və Çingiz Əzimov özgənin külli miqdarda əmlakını aldatma yolu ilə ələ keçirmək məqsədilə qabaqcadan əlbir olaraq cəmiyyət tərəfindən paytaxtın Xətai rayonu ərazisində inşa olunan çoxmərtəbəli yaşayış binasında 210 mənzili və 1041 kvadratmetr qeyri-yaşayış sahəsini saxta müqavilələr tərtib etməklə 543 nəfərə təkrar sataraq əldə edilmiş 15 milyon 416 min 964 manat vəsaitin 4 milyon 780 min 593 manatını inşa edilən binanın tikintisinə sərf edib, qalan 10 milyon 636 min 371 manat məbləği isə dələduzluq yolu ilə talayıblar.
Bundan başqa, “Birlik-İnşaat” MMC vergi ödəyicisi kimi qeydiyyatdan keçdikdən sonra direktor 2006-2011-ci illərdə mənzil tikintisi ilə məşğul olarkən sadələşdirilmiş vergi ödəyicisi kimi 157 min 365 manat məbləğində vergiyə cəlb olunacaq dövriyyəni vergi bəyannamələrində göstərməməklə 6 min 294 manat sadələşdirilmiş vergini, həmçinin əlavə dəyər vergisinə cəlb olunan dövriyyənin 1 milyon 877 min 471 manatını bəyannamələrdə az göstərməklə 343 min 879 manat məbləğində vergini büdcəyə ödəməkdən yayınıb.
İstintaqın gedişində 456 nəfər zərərçəkmişlə tikintini davam etdirən “Birlik-İnşaat” MMC və “Həyan-E” MMC arasında yeni müqavilələr bağlanılmaqla onların pozulmuş mənzil hüquqları bərpa edilib. Bundan başqa, digər 87 zərərçəkmişə vurulmuş zərərin ödənilməsinin təmin edilməsi məqsədilə təqsirləndirilən şəxslərin adlarına qeydə alınmış 3 milyon 830 min manat məbləğində daşınar və daşınmaz əmlakların üzərinə həbs qoyulub.
İş üzrə təqsirləndirilən şəxslər qismində cəlb edilmiş direktor və Roza Minaçaevaya Cinayət Məcəlləsinin 178.3.2, 213.2.2-ci (külli miqdarda vergi ödəməkdən yayınma), 308.2 və 313-cü (vəzifə saxtakarlığı), Soltan Məhərrəmov, Çingiz Əzimov və Eyvaz Fərəcova isə 178.3.2, 308.2 və 313-cü maddələrində nəzərdə tutulan ittihamlar elan edilib.
Cinayət işi üzrə istintaq tamamlanaraq baxılması üçün aidiyyəti üzrə Bakı Ağır Cinayətlər Məhkəməsinə göndərilib.
Bakı Ağır Cinayətlər Məhkəməsində “Birlik-İnşaat” Məhdud Məsuliyyətli Cəmiyyətin (MMC) dələduzluqda təqsirləndirilən təsisçisi və direktoru Eyvaz Fərəcov və digərlərinin cinayət işi üzrə məhkəmə prosesi 2014-cü il mayın 30-da başa çatıb.
Hökmə əsasən, Soltan Məhərrəmov, Eyvaz Fərəcov və Çingiz Əzimov 14 il müddətinə azadlıqdan məhrum edilib. Barələrində həbs-qətimkan tədbiri seçilməyən direktor və Roza Minaçaeva barəsində də 14 il müddətinə azadlıqdan məhrumetmə hökmü çıxarılıb. Məhkəmə zalında olan Roza Minaçaeva həbs edilib, E.Tağıyev isə məhkəməyə gəlmədiyi üçün həbs olunaraq təcridxanaya göndərilməsi barədə qərar qəbul edilib...
Amma onun barəsində seçilmiş həbs qəti-imkan tədbiri sonradan nə səbəbdənsə ev dustaqlığı ilə əvəzlənib. Təqsirləndirilən Eyvaz Fərəcov isə təcridxanada müəmmalı şəraitdə dünyasını dəyişib. İttiham aktından və məhkəmə prosesinin gedişatından da tam sübuta yetirilib ki, 543 nəfərin təxminən 95-96 faizi pullarını birbaşa direktora, 3-4 faizi baş mühasib işləmiş Roza Maniçayevaya, 1 faizi isə barəsində həbs qəti-imkan tədbiri seçilmiş üç nəfərə verib.
Hazırda anasıgildə darısqal, şəraitsiz bir otaqda ağır köçkün həyatı yaşadığını, ağır ürək qüsurlu övladının əziyyət çəkdiyini bir daha xatırladan G.Qasımova onların və digər vətəndaşların milyonlarını mənimsəyən tikinti şirkətinin vəzifəli şəxsləri haqqında çıxarılan və məhkəmələrdə dolaşan hökmün tezliklə icrasına başlanılacağını ümidlə gözləyir. G.Qasımovanın təqdim etdiyi Bakı Ağır Cinayətlər Məhkəməsinin “Birlik-İnşaat” Məhdud Məsuliyyətli Cəmiyyətin (MMC) dələduzluqda təqsirləndirilən vəzifəli şəxslər barədə çıxardığı hökmdə o, həqiqətən zərərçəkmiş kimi tanınıb.
Bakı Ağır Cinayətlər Məhkəməsinin 30 may 2014-cü il tarixli (sədr hakim Novruz Kərimov, hakimlər Ramella Allahverdiyeva və Tamila Nəsrullayeva) hökmünə əsasən, zərərçəkmiş şəxs Qasımova Gülşən İbrahim qızı ifadələrində göstərib ki, o, məhkəmədə ona təqsirləndirilən şəxs qismində təqdim olunan şəxslərdən Tağıyev Elman Həsənqulu oğlunu tanıyır: “Həyat yoldaşı Sənan Qasımov uzun illərdir ki, Rusiya Federasiyasında işləyir. Ara-sıra evlərinə gəlib-gedir. 2010-cu ilin aprel ayında Sənan Bakıya gəlib. Həmin vaxt onlar özlərinə mənzil almaq qərarına gəlib, həyat yoldaşı ilə birlikdə müxtəlif yerlərdən bu məsələ ilə maraqlanıblar. Sənanın dostu Xətai rayonu, Rahib Məmmədov küçəsi 20 ünvanında “Birlik-İnşaat” MMC tərəfindən tikilən binadan ucuz qiymətə ev satıldığını deyib. Bundan sonra o, Sənanla birlikdə həmin binanın 1-ci blok, 1-ci mərtəbəsində yerləşən, ümumi sahəsi 86.7 kv.metr olan 7 saylı ikiotaqlı mənzilə baxıb, həmin mənzili almaq qərarına gəliblər. O, 28 aprel 2010-cu il tarixdə Sənan ilə birlikdə “Birlik-İnşaat” MMC-nin Xırdalan şəhərində, İcra Hakimiyyətinin inzibati binasının yaxınlığında yerləşən ofisində həmin şirkətin rəhbəri E.Tağıyevlə görüşüb bir kvadrat metri 415 manat olmaqla, 36 000 manat verib həmin mənzili alıb, bu barədə müqavilə bağlayıb, pulu birdəfəyə olmaqla tam şəkildə E.Tağıyevə ödəyiblər. Həmin vaxt təqsirləndirilən şəxs E.Tağıyev mənzillərini üç aydan sonra təhvil veriləcəyini deyib. Sənan da Rusiyaya qayıdıb. O da tez-tez gedib həmin binadakı tikinti işləri ilə maraqlanıb. 2011-ci ilin sentyabr ayında həyat yoldaşının dostu onlara zəng edib mənzil aldıqları binada evlərin eyni vaxtda bir neçə şəxsə satıldığını deyib. Bundan sonra o, aldığı mənzilin başqa şəxsə satalıb-satılmadığını öyrənmək üçün həmin binaya gedib. Orada bir neçə sakinin binanın qarşısında toplaşdığını görüb və onun aldığı mənzilin onunla birlikdə 4 nəfərə satıldığı məlum olub. Bundan sonra ona “Hasil” MMC-dən mənzil veriləcəyi vəd edilib, onunla bu barədə alğı-satqı müqaviləsi bağlanıb, lakin oradan da ona mənzil verilməyib. Ona 36 000 manat məbləğində zərər vurulub. O da həmin məbləğin təqsirləndiriln şəxslər tərəfindən ona ödənilməsini tələb edir”.
Hökmdə qeyd edilir ki, zərərçəkmiş şəxs Qasımova Gülşən İbrahim qızının “Hasil” MMC ilə mənzil alğı-satqı müqaviləsi bağlaması nəticəsində ona vurulmuş 56 000 manat məbləğində zərərin təqsirləndirilən şəxslərdən tutulub ona ödənilməsi barədə tələbi təmin edilsin.
Qeyd edim ki, bu il noyabrın 18-də Bakı Apellyasiya Məhkəməsində “Birlik-İnşaat” Məhdud Məsuliyyətli Cəmiyyətin (MMC) dələduzluqda təqsirləndirilən vəzifəli şəxslərin cinayət işi üzrə məhkəmə prosesi keçirilib.
Hakim Əmir Bayramovun sədrliyi ilə keçirilən ilkin baxış iclasında bəzi sənədlərin düzgün olmaması müəyyən edilib. Apellyasiya şikayətinin tam müəyyən edilməsi üçün iş yenidən birinci instansiya məhkəməsinə qaytarılıb. Bəzi sənədlərə qeydlər aparılandan sonra apellyasiya instansiyasında işə yenidən baxılacaq.
***
Onu da qeyd edim ki, “indi nə halal evimizi, nə də verdiyim pulu geri ala bilirik...”, - deyən G.Qasımova prezident cənab İlham Əliyevə müraciət ünvanlayıb. Son ümid yeri olaraq ölkə başçısından kömək istəyən G.Qasımova bu cür işlərin yalnız prezidentin müdaxiləsindən sonra ədalətlə həll oluna biləcəyini düşünür.
Salman Bağırov,
hüquqşünas \\ tezadlar.az \\
