Azərbaycan ictimaiyyətinə bir daha müraciət edərək bildirirəm ki, uzun illər ərzində HDQ Komandanı kimi məsul postda əyləşərək yaratdığı qanunsuz mafioz qruplaşma ilə birlikdə külli miqdarda dövlət əmlakını talamaqla məşğul olmuş Şahin Sultanov və onun dəstə üzvlərinin qanunazidd, cinayətkar əməllərini davamlı şəkildə ifşa edəcəyəm. Həbsdə olan Ş.Sultanovun rəhbərliyi və təşkilatçılığı ilə hərbi gəmilərin təmiri zavodunun rəisi Ə.Muradxanov dövlət əmlakını milyon manatlarla mənimsəmişlər.
Belə ki, HDQ-nə aidiyyatı olmayan xarici şirkət gəmilərinin, habelə Azərbaycanın müxtəlif dövlət qurumlarına məxsus gəmilərin təmirinin həyata keçirilməsindən qeyri-rəsmi yollarla milyon manatlarla vəsait əldə olunmuş, eləcə də gəmilərə aid dəyəri milyon manatlarla avadanlıqların alınması yolu ilə yaratdığı saxta MMC-lərdən alınması göstərilməklə və saxta MMC-lərə pul köçürülməsi yolu ilə rəsmiləşdirilərək külli miqdarda vəsait mənimsənilmiş, bundan başqa HDQ-yə məxsus emalatxanalardan milyon manatlarla dəyərində dəzgahların yerli və xarici şirkətlərə qanunsuz, qaçaqmalçılıq yolu ilə satılması ilə külli miqdarda dövlət vəsaiti mənimsənilmişdir.
Bundan başqa, Şahin Sultanov Polşa dövlətinin istehsalı olan və Azərbaycan Ali Hərbi Dənizçilik məktəbinin müdavimlərinin şturman təlim-tədris təcrübəsi praktikası üçün keçirməsi nəzərdə tutulan dəyəri milyon manata yaxın olan P-215 katerinin bütün tədris otaqlarını sökərək özü, ailəsi və sabiq müdafiə naziri Səfər Əbiyev üçün istirahət otaqlarına, qəbul otaqlarına çevirməklə dövlətə külli miqdarda ziyan vurmuşdur - budurmu Şahin Sultanovun sadə həyat tərzi?
Bundan başqa, Şahin Sultanov HDQ-nin xəritə çəkmə və hidroqrafiya şöbəsinin rəisi Qasım Quliyev əlbir olaraq saxta möhür əldə edərək saxta MMC-lərə pul köçürülməsi və müxtəlif şirkətlərə məxsus, eləcə də xarici şirkətlərə məxsus gəmilərə xidmət göstərməsi adı altında milyon manatlar dəyərində dövlət əmlakını mənimsəmişlər.
Bundan başqa, Şahin Sultanovun təşəbbüsü və təşkilatçılığı ilə Azercell şirkəti tərəfindən qanunauyğun olaraq edilmiş müraciəti əsasında HDQ-nin Xəzər dənizi ərazisindəki inzibati ərazisində qoyulmuş ötürücü və qəbuledici antenaların yerləşdirilməsi ilə əlaqədar külli miqdarda yüz min manatlarla dövlət əmlakını mənimsəmişdir.
Bundan başqa, Şahin Sultanovun təşkilatçılığı və təşəbbüsü ilə 1965-ci ilin istehsalı olan gəmilərin üzərinə bir neçə qurğu və avadanlıqlar quraşdırmaq yolu ilə külli miqdarda dövlət əmlakını mənimsəmişdir.
Bundan başqa, Şahin Sultanovun təşkilatçılğı və təşəbbüsü ilə gəmilərin təmiri zavodunun direktoru Əsəd Muradxanov vasitəsilə 4-5 il bundan qabaq istismarı dayanmış gəmini fəaliyyətdə olan gəmi kimi qeydiyyatda göstərməklə və dövlət əmlakını milyon manatlarla mənimsəmək məqsədilə həmin gəmiyə qeyd olunan müddətlər ərzində yanacaq və sürtkü yağlarının verilməsi adı altında cinayət əməli törətmişdir.
Bundan başqa, Şahin Sultanovun birbaşa göstərişi əsasında HDQ-nin sabiq rabitə rəisi, ehtiyatda olan II dərəcəli kapitan Natiq Əsgərov 50.000 manata yaxın dəyərdə catel telefonlar alaraq idarə üçün istifadə etmək adı altında alınmış catel telefonlarını özünün, yaxınlarının və Şahin Sultanovun yaxınlarının və ailə üzvlərinə verməklə külli miqdarda dövlətə ziyan vurmuşdur.
Bundan başqa, HDQ-nin sabiq rabitə rəisi Natiq Əsgərov vasitəsilə saxta MMC-lərə külli miqdarda yəni 100. 000 manatlarla dəyəri olan 8.000 metr kabel almaq adı ilə külli miqdarda dövlət əmlakını mənimsəmişdir.
Bundan başqa, Şahin Sultanovun göstərişi əsasında əmisi oğlu Elçin Sultanov xidmət etmədiyi halda adını ştat cədvəlinə yazdırmaq yolu ilə əmək haqqı almaqla, HDQ-yə məxsus ərzaq anbarından gizli və açıq şəkildə ərzaqları oğurlayaraq Bakı şəhərində yerləşən müxtəlif dükan və marketlərə paylamaq yolu ilə 100.000 manatlarla dövlət əmlakını mənimsəmişlər.
Qeyd etdiyim cinayət faktlarından və oğurlanmış külli miqdarda dövlət əmlakının miqdarından da bəllidir ki, Şahin Sultanov və onun əlaltıları heç də vəkil Adəm Məmmədovun düşündüyü və dediyi qədər də sadə həyat tərzi keçirməyiblər.
Digər tərəfdən, atalar məsəli var: "örkən nə qədər uzun olsa, gəlib doğanaqdan keçir”. Ay hörmətli Şahin Sultanov! Bəs məni şərləyərək tutduranda, tabeçiliyinizdə xidmət edənləri, öz doğma əminiz oğlunu yalandan üzümə durduranda, məni tanımadığınız halda guya sizdən hədə-qorxu ilə pul tələb etdiyimi iddia edəndə, 8 ay müddətində məhkəmə çağırışlarına məhəl qoymayanda, hərbi hissədə xidmət edən qızımı ölümlə hədələyəndə, Azərbaycan mentalitetinə zidd şəkildə qız uşağı ilə mübarizə aparanda, heç bir qüvvədə olan məhkəmə qərarı olmadan, köçürülmələrinin barəsində Bakı şəhər İcra hakimiyyətinin heç bir sərəncamı olmadığı halda tərəfinizdən zor güc tətbiq edilməklə küçəyə atılan 28 zabit ailəsini evsiz-eşiksiz qoyanda, heç bir əsas olmadan və sizin qanunsuz əmrinizi yerinə yetirməyən, yaşadığı mənzildən çıxmadığına görə, tutduğu vəzifəsindən az maaşlı vəzifəyə keçirməklə Ali Hərbi Dənizçilik məktəbinə göndərdiyiniz II dərəcəli kapitan Emin Əzizova qarşı haqsızlıq edəndə həyat yoldaşı S.Əzizovanı vaxtından əvvəl təqaüdə göndərəndə, HDQ-nin sabiq rabitə rəisi Natiq Əsgərov vasitəsilə 1993-1996-cı illərdə Naxçıvaniski adına Hərbi liseydə təhsil almış və Bakı Ali Hərbi Dənizçilik məktəbinin, suüstü gəmilərdə rabitə və radio texnika üzrə mühəndisi təhsilini almış kapitan-leytenant Acalov Sərxan Səyyad oğlunu 16 (on altı) il qüsursuz xidmətdən sonra ləkələyərək ordudan təxris etməyinizi, sonda həmin şəxsin zabit olmasına baxmayaraq, bir tikə çörəkdən ötrü Türkiyədə fəhləlik etməyə məcbur olması, kapitan-leytenant Elşən Cəbrayılovun sabiq Müdafiə naziri S.Əbiyevin oğlundan nizamnaməyə uyğun xidmət aparmasını tələb etdiyinə görə və Samir Quliyev kimilərini nəyə görə haqsızlıq edilib ordudan təxris edən zaman niyə qanunlara riayət etmirdiniz?
Yuxarıda qeyd etdiyim və istintaq sirri olduğundan hələlik qeyd etmədiyim cinayət faktları barədə sabiq müdafiə naziri S.Əbiyevin, MN-nin keçmiş hərbi inspeksiyasının rəisi M.Beydullayevin, nə qədər qəribə olsa da, hələ də nazirliyin hüquq idarə rəisi olan Rauf Kişiyevin, hərbi hissənin keçmiş hüquqşünası Rauf Zeynalovun xəbəri olmuş, lakin adları çəkilən bütün şəxslər öz şəxsi maddi maraqları naminə bütün bu cinayət faktlarını ört-basdır etmişlər.
Qanunamüvafiq tədbir görülmədiyi halda növbəti müraciətlərimdə Rauf Kişiyevin Şahin Sultanovla işbirliyindən əldə etdiyi oğurluq pullarla alınmış Quba, Qusar rayonlarında və digər yerlərdə yerləşən biznes obyektlərinin ünvanlarını ictimailəşdirəcəyəm. Odur ki, həmkarım Adəm Məmmədova müraciət edərək bildidirəm ki, Şahin Sultanova tərif yağdırmaqla onu təmsil etməsinin əvəzinə ən qatı cinayət törətmiş cinayətkarı müdafiə etməsini üstün sayardım. Çünki, bildiyimə görə Adəm Məmmədov çox gözəl ailədə tərbiyə alıb, atası uzun illər məhkəmə orqanlarında hakim olmasına baxmayaraq, şəhidlik zirvəsinə yüksəlib, özü isə uzun müddət dövlətin adından çıxarılmış məhkəmə qərarlarının icrası ilə məşğul olmuş şəxsdir və belə bir ailədən çıxmış adam Azərbaycan SQ tarixində qara yara olan Şahin Sultanovun mafioz qruplaşmasının müdafiəsinə qalxmamalı, dövlətçilik mövqeyində dayanmaqla haqqın müdafiəsində durmalı və kimi müdafiə etməsinin fərqində olmalıdır.
Adəm Məmmədovun bəzi şirnikləndirici vədlər müqabilində belə təxribat xarakterli və ictimaiyyəti çaşdırmağa yönəlik açıqlamaları davam edəcəyi halda onu təkrarən mətbuat konfransına dəvət edərək çoxsaylı jurnalist və media nümayəndələri qarşısında təkzibedilməz sübut və faktları bütün çılpaqlığı ilə bəyan edəcəyəm, bu isə onun karyerasının sonu olmaq deməkdir.
Respublika Hərbi Prokurorluğuna müraciət edərək, təkidlə xahiş edirəm ki, bütün səslənmiş faktlar çox ciddi şəkildə araşdırılsın və onlara hüquqi qiymət verilsin.
Redaksiya: Oxuduqlarınızı hüquq müdafiəçisi Bəxtiyar Məmmədov qələmə alaraq redaksiyamıza təqdim edib. Mətbuat olaraq vətəndaşın yazdıqlarına toxunmadan olduğu kimi dərc etdik. Amma yazıda adları çəkilən şəxslərin də mövqe bildirmək hüququnu tanıyırıq. \\ gundelik-baki \\
