Bu il iyulun 1-nə Azərbaycanda vaxtı keçmiş kreditlərin məbləği 719,4 milyon manat təşkil edib.

Mərkəzi Bankın (AMB) məlumatına görə, bu, iyunun 1-i ilə müqayisədə 13,2 % çoxdur. Ölkədə problemli kreditlərin məbləği ilin əvvəlinə nisbətən 37,1 %, son 1 ildə isə 36,4 % artıb.

İyunun sonuna vaxtı keçmiş kreditlərin ümumi kredit portfelində xüsusi çəkisi 2,1 % təşkil edib. Bu nisbət mayın sonuna da 1,9 %, ötən ilin sonuna 1,6 %, ötən il iyunun sonuna isə 1,7 % olub.

Vətəndaşların kreditləri qaytarmaqda çətinlik çəkməsinə hansı amillər təsir edir?

Mövzu ilə bağlı “Cebheinfo.az”-a açıqlamasında iqtisadçı-ekspert Əkrəm Həsənov bildirib ki, mövcud iqtisadi vəziyyət problemli kreditlərin artmasını qaçılmaz edir:

“Problemli kreditlərin artmasının əsas səbəbi ölkədəki iqtisadi vəziyyət, iqtisadi artımın zəifləməsidir. Bunu artıq hamı etiraf edir. İlin birinci yarısı ərzində iqtisadi artım demək olar ki, olmayıb. İqtisadi artımın olmaması insanların real gəlirlərinin azalması deməkdir.

Eyni zamanda, sahibkarların da gəlirləri azalır.Bir tərəfdən gəlirlər azalır, digər tərəfdən isə qiymətlər və xərclər artır. Məhz buna görə də həm vətəndaşlar, həm də sahibkarlar kreditlərini ödəməkdə çətinlik çəkirlər, nəticədə problemli kreditlərin həcmi artır”.

Ekspert təəssüf hissi ilə qeyd edib ki, problemli kreditlərin artımı davam edəcək: “Çünki yaxın illərdə iqtisadi artımın hansı mənbələr hesabına təmin olunacağı bəlli deyil. Buna görə də hər kəs ehtiyatlı olmalıdır.

Lazımsız kreditlər götürməsinlər, maliyyə imkanlarını düzgün qiymətləndirsinlər. Mövcud vəziyyət göstərir ki, indiki şəraitdə kreditlərin geri qaytarılması getdikcə daha da çətinləşir”.