Abşeron Rayon Məhkəməsində qəsdən sağlamlığa yüngül zərər vurmada təqsirləndirilən Nailə Yusifovanın (adı, soyadı şərtidir) cinayət işi üzrə məhkəmə istintaqı yekunlaşıb.
Pravda.az-ın əldə etdiyi məlumata görə, hakim Vaqif Həsənovun sədrliyi ilə keçirilən prosesdə hökm oxunub.
Məhkəmənin hökmü ilə icraat materialına xitam verilib və o, cinayət məsuliyyətindən azad edilib.
İş materiallarına əsasən, hadisə 2026-cı ilin iyun ayında təqsirləndirilən şəxsin yaşadığı evdə baş verib.
Belə ki, hadisədən bir gün əvvəl ər-arvad arasında kişinin telefonda yüksək səslə danışması səbəbindən mübahisə yaranıb. Ertəsi gün isə həmin narazılıq yenidən alovlanaraq ailədaxili münaqişəyə çevrilib.
Mübahisə zamanı Nailə əri, zərərçəkmiş İslam Yusifovun (adı, soyadı şərtidir) hər iki bazu nahiyəsini dişləyib, daha sonra onun sol əlinə, döş qəfəsinin ön hissəsinə və sağ kürəkaltı nahiyəsinə əl zərbələri endirib.
Məhkəmə-tibbi ekspertizasının rəyinə görə, zərərçəkmiş şəxsdə sağ bazu nahiyəsində hərəkət məhdudluğu ilə müşayiət olunan geniş sahəli qançır və şişkinlik, sol bazuda səthi yara, sol əl nahiyəsində qançır, döş qəfəsinin ön səthində və sağ kürəkaltı nahiyədə sıyrıqlar aşkarlanıb. Həmin xəsarətlər sağlamlığın qısa müddətə pozulmasına səbəb olan qəsdən yüngül bədən xəsarəti kimi qiymətləndirilib.
Məhkəmə iclasında Nailə Yusifova ona elan olunmuş ittiham üzrə özünü təqsirli bildiyini deyib.
O söyləyib ki, həyat yoldaşı İslam Yusifovla 2020-ci ildə rəsmi nikaha daxil olub və bu evlilikdən bir qız övladları dünyaya gəlib. Ailə qurduqdan təxminən iki ay sonra münasibətlərində problemlər yaranmağa başlayıb. Hətta bir dəfə boşanmaq üçün məhkəməyə müraciət etsələr də, sonradan bundan imtina ediblər. Hazırda isə onların boşanması ilə bağlı başqa bir məhkəmə prosesinin davam etdiyini bildirib.
Təqsirləndirilən şəxsin ifadəsinə görə, hadisədən bir gün əvvəl İslam evdə yüksək səslə telefonda danışarkən buna etiraz edib və aralarında mübahisə yaranıb. Ertəsi gün isə paltarını dəyişmək istədiyi üçün həyat yoldaşından otaqdan çıxmasını xahiş etsə də, əri otağı tərk etməyib. Bu səbəbdən yenidən mübahisə başlayıb.
Qadın bildirib ki, mübahisə zamanı həyat yoldaşı ona təpik vurub, daha sonra onu itələyərək sıxışdırıb, üzünə tüpürüb və nalayiq ifadələr işlədib. Həmin vəziyyətdən çıxmaq üçün İslamın qolunu dişləyib. Bundan sonra kişi geri çəkilib və o, Daxili İşlər Nazirliyinin "102" xidmətinə zəng edərək hadisə barədə məlumat verib.
Nailə Yusifova mübahisə zamanı ərini söydüyünü və qolundan dişlədiyini etiraf etsə də, onu yumruq və ya başqa formada vurmadığını deyib.
Məhkəmədə təqsirləndirilən şəxs zərərçəkmiş şəxslə barışdıqlarını, dəymiş zərərin aradan qaldırıldığını və ərinin artıq ona qarşı heç bir şikayət və tələbinin olmadığını deyərək cinayət işi üzrə icraata xitam verilməsini xahiş edib.
Araşdırma zamanı zərərçəkmiş şəxsin də təqsirləndirilən şəxslə barışdığı, ona qarşı hər hansı şikayət və ya tələbinin qalmadığı müəyyən edilib.
