Abşeron Rayon Məhkəməsində qəsdən sağlamlığa yüngül zərər vurmada təqsirləndirilən Mahal Mahmudovun (adı, soyadı şərtidir) cinayət işi üzrə məhkəmə istintaqı yekunlaşıb.

Pravda.az-ın əldə etdiyi məlumata görə, hakim Abusət Qasımovun sədrliyi ilə keçirilən prosesdə hökm oxunub.

Məhkəmənin hökmü ilə icraat materialına xitam verilib və o, cinayət məsuliyyətindən azad edilib.

İttihama görə, hadisə 2026-cı ilin yanvar ayında gecə saat 01:00 radələrində Abşeron rayonu, Masazır qəsəbəsində baş verib.

Belə ki, Mahal Mahmudov ailə üzvləri ilə birlikdə yaşadığı evdə həyat yoldaşı, zərərçəkmiş Kəmalə Mahmudova (adı, soyadı şərtidir) ilə aralarında qısqanclıq və ailə-məişət münasibətləri zəminində yaranmış mübahisə zamanı zorakılıq hərəkətlərinə yol verib.

Mübahisəyə səbəb isə arvadı onun qadınlarla münasibət saxlamaqda şübhələnməsi olub. Bu zaman əsəbiləşən Mahal Kəmalayə hücum edib. O, arvadına əl və yumruq zərbələri endirməklə sifət, baş, sinə və qol nahiyələrinə, həmçinin təpik zərbələri ilə ayaq və bədəninin müxtəlif hissələrinə xəsarətlər yetirib.

Məhkəmə-tibbi ekspertizasının rəyinə əsasən, zərərçəkmişin sol göz nahiyəsində qançırlar, alt göz qapağında əzilmiş-cırılmış yara, gözün ağlı qişasına qansızma, sol süd vəzisi, bud və bazu nahiyələrində çoxsaylı qançırlar aşkar edilib. Bu xəsarətlər sağlamlığın qısa müddətə pozulmasına səbəb olan yüngül bədən xəsarətləri kimi qiymətləndirilib.

Məhkəmə baxışı zamanı zərərçəkmiş qadın ərizə ilə çıxış edərək təqsirləndirilən şəxslə barışdığını bildirib. O, həyat yoldaşına qarşı heç bir şikayət və ya tələbinin qalmadığını, dəymiş ziyanın tam ödənildiyini qeyd edərək məhkəməyədək sadələşdirilmiş icraat üzrə cinayət işinə xitam verilməsini xahiş edib.

Mahal da məhkəməyə təqdim etdiyi ərizədə törətdiyi əməli etiraf etdiyini, özünü təqsirli bildiyini və Kəmalə ilə barışdığını göstərib. O, barəsində aparılan məhkəməyədək sadələşdirilmiş icraat materialına bəraətverici əsaslar olmadan xitam verilməsini məhkəmədən xahiş edib.