Türkiyənin ana müxalifət partiyası olan Cümhuriyyət Xalq Partiyasında (CHP) baş verən son hadisələr ölkə siyasətində yeni gərginlik mərhələsi yaradıb. Ankara Bölgə Ədliyyə Məhkəməsinin qərarı ilə partiyanın hazırkı sədri Özgür Özəlin vəzifədən uzaqlaşdırılması və keçmiş sədr Kamal Kılıçdaroğlunun yenidən rəhbərliyə qaytarılması CHP daxilində ciddi qarşıdurmaya səbəb olub. Partiya qərargahı ətrafında yaşanan gərginlik, polis müdaxiləsi, etiraz yürüşləri və tərəflər arasında qarşılıqlı ittihamlar Türkiyə ictimaiyyətində geniş rezonans doğurub. Baş verənlər təkcə CHP daxilində hakimiyyət uğrunda mübarizə kimi deyil, həm də Türkiyədə müxalifətin gələcəyi və siyasi balans baxımından mühüm proses kimi qiymətləndirilir.

AĞ Partiyanın sədri Tural Abbaslı “Sherg.az”a söyləyib ki, Türkiyədəki demokratiyanın, məhkəmə azadlığının, ədalətli məhkəmə prosesinin tərkib hissəsi kimi görür:

“CHP daxilində baş verən proseslər nədir? Bir CHP-linin başqa CHP-lilərdən şikayətinə baxılıb, məhkəmə qərar verib və iki ildən artıq əvvəl baş vermiş bir qurultayda saxtakarlıqlara görə həmin qurultayın qərarını ləğv edib. Qərara görə də köhnə rəhbərlik geri qayıdıb. Əslində istənilən siyasi hakimiyyət üçün belə bir qərarın verilməsi daha böyük problem yaradar. Məsələn, mən sizə əmin edirəm ki, bu qərarın verilməsi AK Partiyaya daha böyük problem yaradacaq, nəinki məhkəmə qurultayı qüvvədə saxlasaydı. Çünki məhkəmə qərar verdi, Özgür Özəl dedi ki, biz bunu saymırıq, çıxmırıq. Nəticədə ana müxalifət daxilində gərginlik yarandı, bütün dünya mediası bu xəbəri yaydı. Yəni dolayısı ilə AK Parti bu məsələdə daha çox itirir. Hansı ki, özünə aid olmayan bir məsələdir. Şikayət verənlər CHP-lilərdir, şikayət olunanlar CHP-lilərdir, baxılan məsələ CHP daxilindədir, gedən də CHP-lilərdir, gələn də CHP-lilərdir. Amma bunun neqativ təsirlərini AK Parti iqtidarı çəkir. Yəni burada bir daha sübut olunur ki, məhkəmələr ədalətlidir, məhkəmələr azaddır. Baxın, CHP-nin son qurultayından sonra müxtəlif konfranslarla bağlı ayrı-ayrı müraciətlər olmuşdu. Onların bəzilərinə rədd, bəzilərinə isə müsbət cavab verilib. Bu da o deməkdir ki, iqtidar məhkəmə prosesinə qarışmır və məhkəmələr özləri sərbəst şəkildə qərar verirlər. Bu, çox önəmlidir”.

Partiya sədri qeyd edib ki, ikinci məsələ dövlətin öz məhkəmə qərarlarına yanaşdığı hörmətdir:

“İndi siz sual verirsiniz ki, məsələn, polisin CHP binasına basqını. Əslində, bu basqın deyil. Məhkəmə tərəfindən rəsmi sədr kimi tanınan Kılıçdaroğlunun dövlət qurumlarına məhkəmə qərarının icrası ilə bağlı müraciətindən sonra bu addım atılıb. Kılıçdaroğlu müraciət edib ki, gəlin məhkəmə qərarını icra edin, məni öz kabinetimə, öz binama buraxmırlar. Dövlət də öz polisi və məhkəmə icraçıları vasitəsilə məhkəmə qərarını icra edib. Hətta dirəniş göstərənlər, polisin və məhkəmə icraçılarının qanuni qərarlarına müqavimət göstərənlər barədə cinayət işi açılması müzakirə olunur. Niyə? Çünki məhkəmə qərarını icra etmək həm iqtidarın, həm müxalifətin, həm də sadə vətəndaşın borcudur. Ona qarşı dirənmək olmaz. Yenə də burada şikayət tərəfi də CHP-dir, şikayət olunan tərəf də CHP-dir. Bu baxımdan, bunun özü də mənə görə demokratiyanın göstəricisidir”.

T.Abbaslının sözlərinə görə, CHP-nin gələcəyi necə olacaq, parçalanacaq, parçalanmayacaq -bunu zaman göstərəcək:

“Burada partiya daxilində rəqabət də var, demokratiya da var. Baxın, məsələn, məhkəmənin qərarından sonra demək olar ki, Özgür Özəlin bütün komandası vəzifəsiz qaldı və Kılıçdaroğlunun köhnə komandası hakimiyyətə gəldi. Möhür də onların əlindədir və istədikləri adamları çıxara, istədiklərini müxtəlif vəzifələrə təyin edə bilərlər. Amma CHP-nin deputatlarının əksəriyyəti, belə deyək, 130-140 deputatdan 80-ə yaxını Özgür Özəli dəstəklədiyini bəyan etdi və partiya rəhbərini yox, məhz Özgür Özəli Deputat Qrupunun rəhbəri seçdilər. Yəni əslində, bu gün CHP-nin əsas gücü olan parlament fraksiyasına Özgür Özəl rəhbərlik edəcək. Düşünürəm ki, bu proses bir az vaxt aparacaq. Kılıçdaroğlu mövqelərini möhkəmləndirməyə, sonra həmin deputatları razı salmağa çalışacaq. Təbii ki, Özgür Özəl də paralel olaraq parlamentdəki statusundan istifadə edərək, deputat qrupuna rəhbərlik etməklə CHP-nin rayon təşkilatlarının rəhbərləri ilə görüşəcək və hər kəs öz tərəfdarlarını artıraraq yeni reallıqlar yaratmağa çalışacaq. Hətta Özgür Özəl çalışacaq ki, tərəfdarlarını çoxaltsın və Kılıçdaroğlunu tez bir zamanda yeni qurultay keçirməyə məcbur etsin ki, özü yenidən partiyanın başına keçsin. Kılıçdaroğlu isə çalışacaq ki, yeni qurultay məsələsi uzansın, ən azı bir-iki il davam etsin və həmin müddətdə Özgür Özəlin dayaqlarını zəiflədərək növbəti qurultaya daha güclü və ya alternativsiz namizəd kimi çıxsın. Yəni bu bir mənada partiya böhranıdır, müəyyən qədər Türkiyə daxilində siyasi böhran da sayıla bilər. Amma hər halda bunun özünün mövcudluğu belə demokratiya nümunəsidir. Mən bunu müsbət hal kimi qarşılayıram. Çünki yenə deyirəm, bu o deməkdir ki, istər müxalifətdə, istər iqtidarda hər kəs sözünü deyə , mövqeyi uğrunda mübarizə apara bilir və bunun üçün platforma var. Hər nə olur-olsun, Türkiyəmizə xeyirli-uğurlu olsun. Əsas olan budur”.