"İran və Rusiyadan hər cür təxribat gözləmək olar. Ancaq bu məsələ artıq qloballaşıb. Amerikanın Zəngəzur dəhlizinə nəzarət etməsi artıq istənilən bir təxribatın həm də Amerikaya qarşı yönələcəyini anlamına gəlir. Ona görə də düşünürəm ki, Rusiya ilə İran Ermənistana və Azərbaycana qarşı hər hansı bir təxribat addımı atanda artıq iki dəfə düşünəcəklər. Burada qarşılarında təkcə Azerbaycan və Ermənistan olmayacaq, həm də ABŞ olacaq. Azərbaycanın Türkiyə kimi də bir müttəfiqi var. ABŞ olmasa belə İran və ya Rusiya Azərbaycanda bu və ya digər təhdidlər, təxribatlar və yaxudda hər hansı radikal addımlar atarkən ciddi şəkildə düşünərdilər. Amma hər halda ABŞ-ın da prosesə qoşulması vəziyyəti daha da çətinləşdirib".

Bu sözləri Sitat.info-ya açıqlamasında Ağ Partiya başqanı Tural Abbaslı deyib.

O bildirib ki, bu ölkələr ilk reaksiya olaraq çox ehtiyatla bəyanatlar verdilər: "Hətta birinci şəxslər səviyyəsində demək olar ki, reaksiya vermədilər. Amma əvvəllər "qırmızı xətt" deyirdilər, daha kəskin danışırdılar. Əsasən də İran… Amerikanın bu prosesə qoşulması nisbətən onları neytrallaşdırıb. Mən Azərbaycana və Ermənistana təzyiq olacağını istisna eləmirəm. Mütləq ki, olacaq. Azərbaycan və Ermənistan arasında zəif bənd Ermənistan olduğu üçün Rusiyanın Ermənistana daha çox siyasi, iqtisadi baxımdan təzyiqlər ola bilər".

T.Abbaslı hesab edir ki, İran da Azərbaycana təsir imkanlarını işə salmağa çalışacaq: "Əsasən din pərdəsi adı altında mümkündür ki, yatmış hücrələrini oyatsın. Düşünürəm ki, Azərbaycan hüquq-mühafizə orqanları bu məsələləri nəzarətdə saxlayırlar. Eyni zamanda artıq bu dəhliz beynəlxalq layihədir. Burada İranın və Rusiyanın hər hansı addımı beynəlxalq reaksiyalara səbəb olacaq. Odur ki, bir o qədər narahat olmağa dəyməz. Təbii ki, ehtiyatı da əldən vermək olmaz”.