“Nəinki Azərbaycan xalqı, bütün dünya çox mühüm bir hadisənin - Azərbaycanla Ermənistan arasında Amerika Birləşmiş Ştatlarının şahidliyi ilə birgə bəyannamənin imzalanmasının şahidi oldu və Prezident cənab İlham Əliyevin diplomatik uğurlarına, onun siyasi gedişlərinə bilavasitə inandı. Bu bəyannamənin imzalanması, bilavasitə düşmənçiliyə son qoyulması, iki ölkə arasında münasibətlərin yaxşılaşdırılması Azərbaycan və Ermənistanda sabitliyin, təhlükəsizliyin bərpa olunması, eləcə də Cənubi Qafqazda sülh şəraitində yaşayışın təşkil olunması üçün çox vacib və əhəmiyyətlidir. Cənab İlham Əliyevin uzaqgörən siyasəti bu gün reallıqları bir daha ortaya qoydu və onun bəşəri ideyalarına, sülh və təhlükəsizlik uğrunda mübarizəsinə şahid oldu”.

Bu barədə Bizimyol.info xəbər portalına Milli Məclisin deputatı Tahir Rzayev danışıb. Deputat qeyd edib ki, Amerika Birləşmiş Ştatlarının prezidenti Donald Trampın təşəbbüsü ilə keçirilən bu görüşdə birgə bəyannamənin hazırlanması və bu bəyannamədə əksini tapan müddəalar bu gün nəinki iki ölkənin xalqlarının mənafelərinə uyğundur, eləcə də dünyaya bir mesajdır.

Deputat vurğulayıb ki, sülh şəraitində sabitlik və təhlükəsizlik bölgə xalqlarının birgəq yaşayışı uğrunda mübarizə üçün bir təkandır.

Tahir Rzayev qeyd edib ki, bu bəyannamə gələcəkdə dövlətlərin inkişafına və xalqların rifahının artırılmasına imkan yaratmaqla bərabər, dünya iqtisadiyyatının və regional iqtisadiyyatın inkişafı üçün də önəmlidir.

“Burada Zəngəzur dəhlizinin "Tramp körpüsü" nəqliyyat dəhlizi adlandırılması və bu dəhlizin açılması əlbəttə ki, regional dövlətlərin inkişafında mühüm rol oynamaqla bərabər, dünya ölkələrinin bu dəhlizdən səmərəli istifadə etməsinə şərait yaradacaq və dövlətləri, xalqları birləşdirəcək. Bəyannamədə əksini tapan müddəalar iki dövlət arasında uzun illərdir davam edən münaqişənin aradan qaldırılmasına bir zəmin olmaqla bərabər, həm də gələcəkdə qonşu dövlətlərlə münasibətlərin yaxşılaşdırılmasına da təkan verəcək və xalqların xoşbəxt həyatını təmin edəcək”-deyə deputat bildirib.

“Bu gün Azərbaycan xalqı qürur içərisindədir. Amerikada Azərbaycan bayrağının olması, hegemon aparıcı bir dövlət rəhbərinin, Donald Trampın Azərbaycan prezidenti haqqında söylədiyi xoş ifadələr və cənab İlham Əliyevi dostu adlandırması Prezidentimizin uzaqgörən siyasətinin həm də qazandığı böyük hörmət və ehtiramın ifadəsidir. Azərbaycan prezidenti bu etimadı öz əməlləri ilə qazandı. Çünki cənab İlham Əliyev prezident seçildiyi ilk gündən dünyada sülhün, sabitliyin, təhlükəsizliyin yaradılmasının tərəfdarı olub və bu yolda bütün səylərini ortaya qoyub.

Ermənistan üzərində tarixi qələbə qazanmağımıza baxmayaraq, erməni faşistlərin ayaqlarının torpaqlarımızdan kəsilməsinə baxmayaraq, faşist ölkənin məğlub olmasına baxmayaraq, Azərbaycan prezidenti yenə də sülh, danışıqlar mövqeyində olmuş və bunu dəfələrlə bəyan etmişdi”-deyən deputatın fikrincə, bu görüş bir daha sübut etdi ki, cənab İlham Əliyev öz yolunda inamla irəliləyir.

“Xeyirxahlıq, sülh, sabitlik missiyasını uğurla həyata keçirir və Vaşinqtondakı görüş, həmçinin Prezidentimizin səsləndirdiyi fikirlər - “biz sülhə tərəfdarıq və buna əməl edəcəyik” fikirləri bunu bir daha təsdiqlədi.

Tahir Rzayev qeyd edib ki, bəyanatın imzalanması və Vaşinqton görüşləri Azərbaycan diplomatiyasının, cənab İlham Əliyevin siyasətinin ən böyük uğurlarıdır: “Bu, Azərbaycan vətəndaşında qürur hissi doğurur. Bu gün Azərbaycan dünyaya öz sözünü deyir, öz fikirlərini bildirir və öz amalına sadiq qalır”.