“Zəhmət-Ruzi” MMC-nin adı ilk dəfə səslənmir. İlk dəfə Standartlaşma, Metrologiya və Patent üzrə Dövlət Komitəsinin sədri Ramiz Həsənovun “kolbasa və ya sosis üçün müəyyən edilmiş standart şərtlərində göstərilir ki, bu məhsula donuz piyi vurulmalıdır. Əgər bu vurulmursa, o zaman həmin məhsul standarta uyğun hesab olunmur. O zaman da həmin məhsulun buraxılmasına biz imkan vermirik. Belədə “halal” standarından hansı söhbət gedə bilər?” açıqlaması ilə insanların diqqətini cəlb etdiyi müəssisə “Sab” sosis və kolbasalarını istehsal edir.
Qafqaz Müsəlmanları İdarəsinin nəyə əsaslandığı bilinməyən sertifikatı ilə halal ticarətlə məşğul olduğunu iddia edən şirkət həm də ölkənin toyuq monopoliyasına nəzarət edir.
Belə ki, Azərbaycana xaricdən gətirilən toyuq məhsulları bu şirkətin bazasından paylanmaqdadır.
Halal kəsimi şübhə doğuran ABŞ və Braziliya toyuqları satan müəssisə bunun da yolunu tapıb. Belə ki, “Zəhmət-Ruzi” MMC-yə məxsus ərazidə “Ozon” MMC adlı başqa bir firmaya yer verərək, halal şirkət halal kəsildiyi şübhə doğuran toyuqları bu yolla satır.
Nizamnamə kapitalı 10 manat olan “Ozon” MMC Nəsimi rayonu, Mirzə İbrahimov küçəsi 10 ünvanında hüquqi qeydiyyatda olsa da, fəaliyyət yeri “Zəhmət-Ruzi” MMC-nin ərazisidir.
Şahin Cəfərov adlı şəxsin adına qeydiyyatdan keçən “Ozon”un başqa bir xüsusiyyəti bütün hesablaşmaların Azərbaycan manatı ilə deyil, dollarla aparılmasıdır. Azərbaycanda alış-veriş manatla olduğu halda “Ozon” MMC ticarətini dollarla aparır və manatla iş görmək istəyənlərə isə ABŞ dollarını yüksək faizlə satır. Yəni, şirkət Azərbaycan manatına hörmətsizlik etməklə yanaşı həm də dolları yüksək satmaqla fərqdən də “pul tutur”.
Azerinfo.org-un araşdırmalarına görə, müştəri məmnuniyyətinin sıfır olduğu “Ozon” MMC-dən dəfələrlə istehlakçıların hüquqlarının pozulduğuna dair onlarla fakt həm Azad İstehlakçılar Birliyinə, həm də İqtisadi İnkişaf Nazirliyi yanında Antiinhisar Siyasəti və İstehlakçıların Hüquqlarının Müdafiəsi Dövlət Xidmətinə ünvanlanmışdır. Lakin şirkət hər dəfə bu qurumların “könlünü almağı bacarmışdır”.
Bu səbəbdən də, “Ozon” MMC-nin satış mərkəzində müştərilərlə olduqca kobud rəftar edilir. Məsələn, Azerinfo.org-un Araşdırma Qrupunun üzvü müştəri kimi getdiyi bu müəssisədən “istehlakçı hüquqlarına hörmətlə yanaşmalarını” tələb etdiyi üçün qovulmuşdir. “Sənə mal satmırıq” deyə, “Ozon” MMC-nin rəhbərliyi absurd şəkildə özünü müştəri kimi təqdim edən əməkdaşımızı satış mərkəzindən çıxarmışdır.
Xatırladaq ki, istehlakçı hüquqları az insan hüquqlarından biridir ki, bu şikayətlərə Avropa məhkəməsəində də baxılır. İstehlakçı hüquqlarının pozulması ilə bağlı iddiaya görə isə məhkəmə rüsumu tələb olunmur. Azərbaycanda qüvvədə olan В«İstehlakçıların hüquqlarının müdafiəsi haqqındaВ» Qanunda malın keyfiyyəti, istehlakçının aldadılması və onun hüquqlarının pozulması kimi məsələlərə istehsalçının deyil, satıcının cavabdeh olduğu birmənalı qeyd olunub. Bu səbəbdən satıcının istehsalçı ilə müqaviləsində hər iki tərəfin məsuliyyəti dəqiq müəyyən edilməlidir. İstehlakçının hüquqlarının pozulduğu bütün hallara satıcı cavabdehdir. 2012-ci ilin mart ayında İnzibati Xətalar Məcəlləsi və Cinayət Məcəlləsinə edilən dəyişikliklərdən sonra satıcının məsuliyyəti daha da artırılıb. Belə ki, keyfiyyətsiz xidmətə görə satıcının cəriməsi 3000 manatdan 5000 manatadək müəyyən edilib. Hətta istehlakçıya düzgün informasiya verməməyə görə satıcı qanun qarşısında cavabdehlik daşıyır. İstehlakçıların hüquqları kütləvi pozulduğu təqdirdə isə, maddi məsul şəxs 3 il müddətinə həbs cəzasına məhkum edilə, yaxud 5000 manatdan 9000 manatadək cərimələnə bilər.
Lakin halallıqdan bəhs etdiyi halda həyətində halal kəsildiyi bəlli olmayan məhsul satılan “Zəhmət-Ruzi” MMC-nin “icarəçisi” “Ozon” MMC qanunlara məhəl qoymur.
