“AZƏRENERJİ”DƏKİ MAXİNASİYALAR TƏFTİŞ OLUNUR
“Azərenerji” prezidenti Etibar Pirverdiyevin maxinasiyalari nəhayət ki, rəsmi şəxslər tərəfindən də etiraf edildi. Uzun müddətdir ki, mediada, ictimai qurumlarda bu məsələ müzakirə obyektinə çevrilmişdi. Amma, “Azərenerji” rəhbəri bu özbaşınalıqları adi hal kimi qəbul edir, ittihamları cavabsız qoyurdu. Amma bir neçə gün öncə Milli Məclisdə bu məsələnin qabardılması artıq faktların konkret olduğunu təsdiqlədi. Millət vəkili, tanınmış hüquqşünas Çingiz Qənizadə qurum rəhbərini korrupsiyada və mənimsəmədə suçladı. Deputat Milli Məclisdə Etibar Pirverdiyevin qanunsuz hərəkətlərini konkret faktlar əsasında açıqladı. O bildirib ki, cənab Pirverdiyevin qanunsuzluqlarına son qoyulmalı, yol verdiyi korrupsiya faktları prokurorluq orqanları tərəfindən araşdırılmalıdır.
Çingiz Qənizadə iqtisadi rayonlarda su elektrik stansiyalarının tikintisində “Azərenerji” QSC-nin bir sıra qanun pozuntusuna yol verdiyini bildirib. Onun sözlərinə görə, “Azərenerji” həmin rayonlarda bu obyektlərin tikilməsilə bağlı “Azenko” ilə müqavilə bağlayib. 2011-ci il 30 dekabra qədər həmin obyektlərin açılışı nəzərdə tutulsa da, onların üçündə cəmi 11 faiz iş gedib, qalanlar barədə isə məlumat yoxdur: “Hesab edirəm ki, dövlətin və cənab prezidentin siyasətinin bir təzahürü olardı ki, bu məsələ həll olunsaydı. Buna görə kim məsuliyyət daşımalıdır? Təəssüf ki, bu qanunsuzliqlar barədə Hesablama Palatasının qərarı elə “Azərenerji”yə göndərilib. Lakin Hesablama Palatasının prokurorluqla müqaviləsi var və həmin qərar prokurorluğa göndərilə bilərdi. Çünki burada milyonlarla manat vəsaitdən söhbət gedir. Düşünürəm ki, belə qanun pozuntuları Etibar Pirverdiyevlə “Azenko” nun əməkdaşlığının nəticəsidir ki, milyonlarla manat dövlət vəsaiti mənimsənilir”. Millət vəkili bəyan edib ki, məsələ ilə bağlı Hesablama Palatası və Baş Prokurorluğa müraciət edəcək.
“Azenko” vasitəsilə mənimsənilən milyonlar
Məsələ tam aydındır. Artıq hamı bilir ki, “Azenko” Tikinti Şirkəti birbaşa Etibar Pirverdiyevə məxsusdur. Ona görə də, “Azərenerji”nin bütün tikinti işləri bu şirkət tərəfindən həyata keçirilir. Etibar Pirverdiyev ən iri layihələrin həyata keçirilməsində tender keçirməli olduğu halda, bu prosesi demək olar ki keçirmir. Rəsmiyyətdə əlbəttə ki, “Azərenerji”tenderləri keçirdiyini deyir. Amma, bu tenderdən “Azərenerji”dən başqa heç kimin xəbəri yoxdu. Bütün tenderlər, iri layihələr “Azenko” tərəfindən birbaşa həmin şirkətə verilir və milyonlarla vəsait şirkətin büdcəsinə köçürülür. Sonrası isə məlumdur. Həmin milyonlar adı müstəqil olan bu tikinti şirkətinin balansından silinərək mənimsənilir. Artıq bununla bağlı onlarla konkret fakt mətbuatda dərc edilib. Amma, hələ ki məsələ araşdırılmayıb və “Azərenerji” şefinin fəaliyyəti yoxlanılmayıb. Bundan istifadə edən Etibar Pirverdiyev də əməllərini davam etdirir. İş o yerə çatıb ki artıq məsələ Milli Məclisdə müzakirəyə çıxarılıb.
Pirvderdiyev Bayraq Meydanındakı mənimsəməni necə ört-basdır etdi
Məsələn, “Azenko” Tikinti Şirkəti Bakının Bayraq Meydanının inşasını həyata keçirdi. Bu prosesdə hansı biabırçılıqların baş verməsi də ictimaiyyətə məlum oldu. Milyonlarla manatın ayrıldığı Bayraq Meydanının inşasında baş verən maxinasiyalar çox keçmədi ki, özünü göstərdi. Bayraq Meydanı istifadəyə veriləndən bir ay sonra bayraq laxladı. Bu biabırçı fakt təkcə Azərbaycanda deyil, bütün dünyada məlum oldu. Çünki, Bayraq Meydanında dalğalanan Azərbaycan bayrağı dünyanın ən böyük bayrağı idi və bütün dünyanın diqqəti bu meydanda idi. Bir aydan sonra meydanın tikintisində baş verən nöqsanlar nəticəsində Azərbaycan bayrağının əyilməsi bütün dünyada yayıldı. Əslində bu adi proseslər kimi deyildi. Azərbaycan bayrağının əyilməsi Azərbaycanın beynəlxalq nüfuzuna da mənfi təsir etdi. Dünyanın ən böyük bayrağı olan Azərbaycan bayrağı təhlükə qarşısında qaldı. Bundan istifadə edən, Azərbaycana düşmən kəsilən dövlətlər Etibar Pirverdiyevin şirkətinin bu əməlini əllərində əməlli başlı “bayraq” etdi, Azərbaycana qarşı mənfi imic yaratmağa başladı. Məlum oldu ki, bu prosesdə də külli miqdarda yeyintiyə yol verilib və tikinti işləri olduqca keyfiyyətsiz aparılıb. Ayrılan vəsaitin təyinatı üzrə xərclənməməsi Azərbaycanın büdcəsinə də, nüfuzuna da zərbə vurdu.
“Azenko”nun biabırçı fəaliyyəti tək bununla bitmir. Ölkənin enerji sistemindəki iri layihələri bu şirkətin həyata keçirməsinin nəticəsidir ki, bu sustem artıq çökmək üzrədir. Hər il dövlət büdcəsindən hərbi sahədən sonra ən çox vəsaitin ayrıldığı bu sahə iflic vəziyyətə düşüb. “Azərenerji” ayrılan vəsait hesabına enerji sistemində problemlərin həll olunduğunu desə də, əslində bu sahədə problem həddindən çoxdur. Ayrılan vəsaitlərin məbləği durmadan artdıqca enerji sahəsindəki problemlər də artır. Çünki, ayrılan vəsaitin əksər hissəsi təyinatı üzrə xərclənmir və problemlərin aradan qaldırılması barədə xərclənmir.
Milyonların mənimsənilməsi Çingiz Qənizadəni ayağa qaldırdı
Elə millət vəkili Çingiz Qənizadəni də danışmağa vadar edən bu cür problemlərdir. O Azərbaycan üçün əhəmiyyətli olan iqtisadi rayonlarda su elektrik stansiyalarının inşasının həddindən artıq ləngiməsindən narahatdır və millət vəkili bunu dövlətin inkişafına təxribat kimi qiymətləndirib. Təsəvvür edin ki, “Azərenerji” həmin iqtisadi rayonlarda su elektrik stansiyalarını 2011-ci ilin sonuna kimi inşa edib təhvil verməli idi. Artıq 2012-ci ilin birinci rübü başa çatsa da, su elektrik stansiyalarından xəbər yoxdur. Çingiz Qənizadənin araşdırmaları zamanı məlum olub ki, “Azərenerji” prezidenti Etibar Pirverdiyev bu məsələdə həddindən artıq nöqsanlara, qanunsuzluğa yol verib. Müəyyən edilib ki, su elektrik stansiyalarınıln tikilib istifadəyə veriləcəyi vaxtdan 4-5 ay keçməsinə baxmayaraq, bu prosesdə cəmi 11 faiz iş görülüb. “Azərenerji” ASC bu işi görmək üçün yalançı tender keçirib və əlbəttə ki, tenderin qalibi “Azenko” şirkəti olub. Həmin şirkət isə işi görmür. İndi ortada nə ayrılan milyonlar var, nə də görülən iş. Milyonlar xərclənib, amma hələ işin 89 faizi görülməyib. Maraqlıdır, dövlət büdcəsindən ayrılan bu qədər vəsait birdən-birə necə yoxa çıxıb? Bu məsələ ilə heç bir aidiyyəti qurum maraqlanmayıb. Millət vəkili isə maraqlananda dəhşətə gəlib və məcburiyyət qarşısında fakt Milli Məclisə çıxarılıb. Çingiz Qənizadə dövlət büdcəsinin milyonlarla manatının birdən-birə mənimsənilməsinə göz yummağın cinayət olduğunu iddia edib və bununla bağlı prokurorluğa müraciət edəcəyini deyib.
Deputatın araşdırması Pirverdiyevi bitirəcək
Etibar Pirverdiyevin deyəsən sonu yaxınlaşır. Bu vaxta qədər ictimaiyyət arasında müzakirə edilən faktlara əhəmiyyət verməyib maxinasiyalarla məşğul olan cənab Pirverdiyev deyəsən bu dəfə pis ilişib. Artıq millət vəkilləri tərəfindən fəaliyyəti araşdırılan “Azərenerji”şefinin bununla da sonunun çatdığını demək olar. Çünki, bu məsələyə Milli Məclis səviyyəsində müdaxilə edilməsi, Etibar Pirverdiyevin qanunsuzluqlarının bu səviyyədə qabardılması adi müzakirə ola bilməz. Cənab Pirverdiyevin artıq narahat olmasına dəyər. Millət vəkilinin müraciətinin prokurorluq orqanları tərəfindən cavabsız qalması, hansısa bir hərəkətin törədilməməsi inandırıcı deyil. Ən azından bu müraciət “Azərenerji” şefinin fəaliyyətinin araşdırılması ilə nəticələnməli və hansısa bir tədbir görülməlidir. Araşdırmalar zamanı isə ortaya daha hansı faktların çıxacağını gələcək göstərəcək.
