Azərbaycan Respublikası Mədəniyyət Nazirliyinin tabeliyində “Əsaslı Tikinti və Təchizat” Məhdud Məsuliyyətli Cəmiyyəti birmənbədən satınalma metodu tətbiq etməklə Yevlax şəhəri Heydər Əliyev adına Sarayın fasad və tamaşaçı zalının əsaslı təmirinin icrası zamanı nəzərdə tutulmayan abadlıq işləri və layihəyə edilən əlavə işlərin satın alınması üzrə açıq tenderin nəticəsini elan edib. Müsabiqənin qalibi “QARA QAYA” Məhdud Məsuliyyətli Cəmiyyəti seçilmiş və tərəflər arasında 449.977,96 manat məbləğində satınalma müqaviləsi bağlanmışdır. Məlumat satınalmaların portalında 28.10.2025-ci ildə dərc edilib.

Qeyd edək ki, bu “Əsaslı Tikinti və Təchizat” MMC ilə “QARA QAYA” MMC arasında bağlanan ilk satınalma müqaviləsi deyil.

“Əsaslı Tikinti və Təchizat” MMC Füzuli rayonu, Horadiz şəhəri, Heydər Əliyev Mərkəzinin cari təmiri işlərinin satın alınması üzrə 264.580,3 manat dəyərində 05.05.2025-ci ildə, Yevlax şəhəri Heydər Əliyev adına Sarayın fasad və tamaşaçı zalının əsaslı təmiri işlərinin satın alınması üzrə 733.501,53 manat dəyərində 24.09.2024-cü ildə, Füzuli rayonu, Horadiz şəhəri, Heydər Əliyev prospektində yerləşən Muğam Evinin cari təmir işlərinin satın alınması üzrə 345.641,84 manat dəyərində 06.08.2024-cü ildə “QARA QAYA” MMC ilə bağlamışdır.

İndi gəlin görək “Əsaslı Tikinti və Təchizat” MMC-nin satınalmalarda önəm verdiyi “QARA QAYA” MMC kimə məxsusdur və barəsində nə kimi məlumatlar var.

Dövlət Vergi Xidmətinin kommersiya qurumunun hüquqi şəxslərin dövlət reyestrinə daxil edilmiş məlumatlarında “QARA QAYA” (VÖEN: 3200070511) Məhdud Məsuliyyətli Cəmiyyətinin Dövlət Vergi Xidmətinin Bakı şəhəri Lokal Gəlirlər Baş İdarəsində 02.03.2006-cı il tarixdə dövlət qeydiyyatına alındığı bildirilir. Nizamnamə kapitalı 2 manat olan MMC-nin hüquqi ünvanı BAKI ŞƏHƏRİ NƏRİMANOV RAYONU, AĞA NEMƏTULLA, ev 50A, m. 2, qanuni təmsilçisinin isə Əliyarov Aydın Əliyar oğlu olduğu göstərilir. MMC-nin hüquqi ünvanı ilkin olaraq Bərdə şəhəri, Nizami küçəsi, Bərdə Tikinti Filialının binası olub. 10.01.2018-ci ildən MMC-nin hüquqi ünvanı Bakı şəhəri Nərimanov rayonu, 4-cü uzununa, ev 19B-də yerləşir.

Qeyd edək ki, “QARA QAYA” MMC-nin qanuni təmsilçisi Əliyarov Aydın Əliyar oğlu həm də “Əsaslı Tikinti və Təchizat” MMC tərəfindən Tovuz rayonunda yerləşən Mədəniyyət Mərkəzinin əsaslı təmir işlərinin satın alınması üzrə qalib seçdiyi və 380.507,52 manat məbləğində satınalma müqaviləsi bağlamaq istədiyi “TƏMİR-TƏCHİZAT-4” MMC-nin qanuni təmsilçilərindən biri həm də təsisçisidir. Dövlət vergi Xidmətinin reyestr məlumatlarında 2016-05-16-ci il tarixdən 2023-01-31-ci il tarixədək “Təmir-Təchizat-4” MMC-nin qanuni təmsilçisi Əliyarov Aydın Əliyar oğlu olub. Görsənən odur ki, hər iki MMC bir nəfərə məxsusdur, Əliyarov Aydın Əliyar oğluna.

Satınalmalarının portalında yerləşdirilən məlumatlardan aydın olur ki, Mədəniyyət Nazirliyinin “Əsaslı Tikinti və Təchizat” Məhdud Məsuliyyətli Cəmiyyəti son ikiayda bir nəfərə bağlı iki şirkərlə ümumi dəyəri milyon manata yaxın 3 müavilə bağlayıb. Bu müqavilələrin bağlanılması zamanı isə ciddi qanun pozuntularına yol verilib. Qeyd edək ki, Qaradağ rayon İcra Hakimiyyəti Başçısı Aparatının Mənzil-Kommunal Təsərrüfatı İstehsalat Birliyi 2020-2023-cü illərdə “Təmir-Təchizat-4” MMC ilə ümumi olaraq 3 064 212 manat, “Qara Qaya” MMC ilə 794 434 manat məbləğində satınalma müqavilələri bağlanmışdır. MMC-lərin Qaradağ rayon İcra Hakimiyyətinin başçısı Süleyman Mikayılovla yaxınlığı ehtimal edilir və analoji qanun pozuntularına burada da yol verildiyi iddia edilir.

Qeyd edək ki, Mədəniyyət Nazirliyinin tabeliyində təsərrüfathesablı “Əsaslı Tikinti və Təchizat” Məhdud Məsuliyyətli Cəmiyyəti Nazirlər Kabinetinin 15 oktyabr 2022-ci il tarixli qərarı ilə yaradılıb. MMC-nin direktoru Vəliyev Rafiq Mustafa oğludur. O, həm də ölkəmizdə fəaliyyət göstərən yaradıcı şirkətlər, təşkilatlar, assosiasiya və birliklər, yaradıcı fərdləri birləşdirən və müasir iqtisadiyyatın əsas aparıcı sahələrindən biri olan yaradıcı biznes və sənayelərin inkişafı məqsədilə 2021-ci ildə təsis edilmiş Azərbaycan Yaradıcı Sənayelər Federasiyasının üzvüdür. Lakin “Əsaslı Tikinti və Təchizat” MMC-nin direktoru kimi deyil, “FİL AGENCY” MMC-nin direktoru olaraq 2024-cü ilin oktyabr ayına qədər.

Medianın yazdığına görə bu dövrdə “Əsaslı Tikinti və Təchizat” MMC Azərbaycan Yaradıcı Sənayelər Federasiyasının ən bahalı tenderlərini 4-5 şirkətə verib. Onlardan biri də vaxtı ilə Rafiq Vəliyevin rəhbərlik etdiyi “FİL AGENCY” MMC olub.

Aktualinfo.net