Rusiya Xarici İşlər Nazirliyinin rəsmi nümayəndəsi Mariya Zaxarova Ermənistanın ölkə ərazisində keçirilən “Qartal tərəfdaş-2026” beynəlxalq hərbi təlimlərində iştirakına sərt reakiya verib. Zaxarova qeyd edib ki, Ermənistanın “Qartal tərəfdaş-2026” beynəlxalq hərbi təlimlərinə cəlb edilməsində məqsəd onun Rusiyadan uzaqlaşdırılmasıdır. O, qeyd edib ki, təlimlərdə erməni hərbçilərinə ruslara qarşı döyüşmək öyrədiləcək:
“Erməni hərbçilərə Rusiyaya qarşı döyüşməyi öyrədəcəklər. Bir vaxtlar bunu təsəvvür etmək belə mümkün deyildi”.
Məlumat üçün qeyd edək ki, beynəlxalq sülhməramlı missiyalarda iştiraka hazırlıq məqsədilə iyunun 17-dən 25-dək Ermənistanda “Eagle Partner 2026” illik hərbi təlimləri keçiriləcək. Ermənistanın Müdafiə Nazirliyinin yaydığı məlumata görə, “hərbi təlimlərdə Ermənistan ordusunun sülhməramlı briqadasının (250 iştirakçı), Avropa və Afrikadakı ABŞ ordusunun, həmçinin Kanzas Milli Qvardiyasının (58 iştirakçı), Fransa qüvvələrinin (24 iştirakçı), Yunanıstan qüvvələrinin (11 iştirakçı) hərbçiləri iştirak edəcək”.
Şübhəsiz, Ermənistanın “Qartaş tərəfdaş-2026” beynəlxalq hərbi təlimində iştirakı hər şeydən öncə rəsmi İrəvanın Qərbə inteqrasiya, habelə, ordunun döyüş hazırlığını yüksəltmək istəyinin təzahürüdür. 44 günük müharibədən sonra ordunun yenidən formalşdırılmasına cəhd göstərən rəsmi İrəvan, Qərb ölkələri ilə hərbi əməkdaşlığı genişləndirməkdə, yeni raket və artilleriya sistemləri almaqdadır. Ənənəvi Rusiya hərbi bazarından imtina edən Paşinyan rejimi, bu məsələdə Qərbdəki tərəfdaşlarına daha çox etibar edir ki, bu da Kremldə açıq narahatlıq və narazılıqla qarşılanır. Bu azmış kimi, Ermənistan ordusunun Qərb ölkələri ilə birgə təlimlərdə iştirakı Rusiya tərəfindən az qala açıq düşmənçilik cəhdi kimi dəyərləndirilməkdədir. Görünən odur ki, Kreml Ermənistanın NATO dövlətləri ilə birgə təlimlərdə iştirakını ilk növbədə mənəvi-psixoloji baxımdan həzm edə bilmir, bunu uzun illər, hətta əsrlərdir ki, sahib olduğu strateji üstünlüyü əldən verməsi kimi dəyərləndirir.
Tarixə nəzər salsaq görərik ki, Rusiyanın himayəsi sayəsində süni şəkildə meydana çıxan və qərinələr boyu onun dəstəyi ilə var olan Ermənistan indi açıq şəkildə Qərbyönlü siyasət yürütməsi Kreml üçün epizodik itki yox, strateji məğlubiyyətdir. Və Rusiya üçün ən pisi odur ki, Ukrayna müharibəsi fonunda özünün ən ağrılı dönəmlərindən birimi yaşayan Moskva üçün indiki şəraitdə bu məğlubiyyəti seyr etməkdən başqa bir yol görünmür.
Seymur ƏLİYEV - moderator.az
