Ermənistanda müstəqilliyin ilk günündən bəri sülh olmayıb.

Modern.az xəbər verir ki, bunu Ermənistanın Baş naziri Nikol Paşinyan bildirib. O, 2018-ci ildə hazırkı hökumət hakimiyyətə gələnə qədər Ermənistanda sülhün olduğu, indiki hökumətin isə addımları ilə müharibə gətirdiyi barədə iddiaları şərh edib.

“Bizdə müharibə var idi, çünki hər il ölənlər və yaralananlar olurdu. Əsgərlərin öldüyü və yaralandığı yerdə siz harada sülh görmüsünüz? Bizdə sülh yox idi, daimi müharibə və müharibənin başlanmasının daimi təxirə salınması var idi. Bu təxirəsalmanın son müddəti isə 2016-cı ilin Aprel müharibəsi ilə elan olundu. Amma çox vacibdir ki, Aprel müharibəsindən əvvəl Qarabağ məsələsinin həlli ilə bağlı tamamilə yeni təkliflər paketi təqdim edilmişdi və bu paket artıq hamımıza məlumdur, həm də dərc olunub”, - deyə Paşinyan “Vətəndaş Müqaviləsi” Partiyasının seçkiqabağı kampaniyasının başlanğıcı ərəfəsində bildirib.

Onun sözlərinə görə, Qarabağ məsələsinin həlli çərçivəsi hələ 1996-cı ildə keçirilən Lissabon Sammiti zamanı müəyyənləşdirilmişdi və həmin vaxta qədər Qarabağ məsələsi artıq həll edilmiş hesab olunurdu.

Paşinyan bildirib ki, bütün bu gecikmələr və təxirəsalmalar ilk növbədə Ermənistan məsələsinin həllinə, yəni erməni dövlətinin yaranmasının qarşısını almağa yönəlmişdi.

“Biz də məhz bunu anladıq və çox tez başa düşdük ki, Ermənistan tələyə düşüb. Bizim vəzifəmiz Ermənistanı bu tələdən çıxarmaq idi. Verdiyimiz qurbanlar və itkilər bahasına Ermənistanı bu tələdən çıxardıq və əsas məsələ də budur. Qurbanların əbəs olduğunu deyənlər anlamırlar ki, bu tələdən çıxan erməni dövlətçiliyi olub”, - deyə Paşinyan bildirib.

Onun sözlərinə görə, 2018-ci ildə qarşılarında duran ssenari Ermənistan Respublikasının suveren dövlət olmaması idi; ən yaxşı halda müxtəlif yerlərdən “nəfəs almaq üçün icazə alan” banan dövləti statusunda qalması nəzərdə tutulurdu.