Məlum olduğu kimi, Bakının Nəsimi Rayon İcra Hakimiyyətinin başçısı Elxan İbrahimov təyinatından 47 gün sonra tutduğu vəzifədən azad edilib. Sabiq icra başçısının hansı səbəbdən vəzifədən azad edildiyi ilə bağlı rəsmi açıqlama olmasa da, onun işində yol verdiyi ciddi nöqsanlara görə çıxarıldığı iddia olunur.
Aydındır ki, cəmi 47 gündür öz vəzifəsinin icrasını həyata keçirən məmurun tutduğu postdan azad edilməsi səbəbsiz ola bilməz və heç şübhəsiz ki, Elxan İbrahimovun da vəzifədən azad edilməsi hansısa kobud səhv və ya böyük nöqsanın nəticəsidir. Lakin burada maraq kəsb edən yeganə məqam icra başçısının öz “taxt-tacından” cəmi 47 gün sonra salınması deyil. Baş verənlər fonunda ən çox diqqət çəkən məqam ali siyasi hakimiyyətin məmurlar üzərində ciddi nəzarəti, vətəndaş müraciətinə həssaslığı, qanuna münasibətdə kimsəyə güzəştə getməməsidir. Bu, Prezident İlham Əliyevin “toxunulmaz insan yoxdur” ifadəsinin nə qədər doğru və praktiki baxımdan işlək olduğunu göstərir.
Heç kimə sirr deyil ki, Ramiz Mehdiyev vaxtiylə Prezident Apratının rəhbəri kimi icra başçılarının təyinatında, habelə, onların fəaliyyətinə nəzarətdə mühüm rol oynayırdı. Bir sıra icra başçıları məhz onun himayəsinə sığınaraq özlərini toxunulmaz hesab edir, ömürlərinin sonuna qədər icra başçısı kreslosunda əyləşəcəklərini düşünürdü. Fəqət Ramiz Mehdiyevin özünün məsuliyyətə cəlb edilməsi və bunun ardınca baş verənlər sabiq Aparat rəhbərinin əsasını qoyduğu “ömürlük icra başçısı” ənənəsinə son qoydu. Bir sıra icra başçısının rüşvət və korrupsiya ittihamı ilə həbs edilməsi, Ramiz Mehdiyevin özünün bəd əməllərinin de-şifrə olunması kimsənin toxunulmazlıq statusuna malik olmadığını isbatladı. Elxan İbrahimovla bağlı baş verənlər göstərdi ki, dövlət başçısı etimad göstərməklə yanaşı, həm də yoxlamağı, nəzarət etməyi bacarır və dövlətin etimadığını doğrultmayan, özünün qanunların fövqündə görən heç kimi əfv etmir.
Bəli, artıq Azərbaycan fərqli reallıqlar əsasında idarə olunur və bu reallıqlar qanunların aliliyinə, vətəndaşların məmnunluğuna, idarəetmənin şəffaflığına əsaslanır. Bu prinsiplərə əməl etməyən, Ulu Öndər Heydər Əliyevin təbirincə desək, özünü “balaca padşah” hesab edən hər kəsin gec-tez tutduğu vəzifə ilə vidalaşacağı, dünyanı həbsxananın dəmir barmaqlıqları arxasından izləyəcəyi gün uzaqda deyil.
Seymur ƏLİYEV - moderator.az
