Ermənistan İstintaq Komitəsinin əməkdaşları Qarabağ separatçılarının İrəvandakı nümayəndəliyi barədə istintaq başladıb. Məlumata görə, İstintaq Komitəsi tərəfindən ləğv edilmiş separatçı rejimin İrəvandakı ofisində aparılan axtarış "müstəqillik referendumu günü" və "Dağlıq Qarabağın konstitusiyasının qəbulu" ilə bağlı müzakirələrə görədir. Separat iclasda "ermənilərin Qarabağa qayıdışı məsələsi" də müzakirə olunub. Separatçıların vəkili Roman Yeritsyan bildirib ki, axtarışlar separatçı ünsürlərə qarşı açılmış iqtisadi cinayət işi ilə əlaqəlidir. Ermənistan mediası məlumat yayıb ki, aparılan axtarışlardan sonra Qarabağ separatçılarının İrəvandakı ofisi ilin sonuna qədər bağlana və ya binası müsadirə edilə bilər. Məlumata görə, separatçıların özləri nümayəndəliyin bağlanması ehtimalını, eləcə də mümkün həbsləri istisna etmirlər. Onlar əmindirlər ki, təhlükəsizlik qüvvələrinin əsas hədəfi Qarabağdakı separatçı qalığın keçmiş lideri Samvel Şahramanyandır. Məlumat üçün bildirək ki, Avropa İttifaqı ilə Ermənistan arasında "Tərəfdaşlıq Gündəliyi" adlı sənəd imzalanıb. Sənəddə qeyd olunub ki, Aİ Ermənistanla tərəfdaşlıq çərçivəsində "Dağlıq Qarabağdan "didərgin düşmüş ermənilər"in ehtiyaclarının ödənilməsinə və sosial-iqtisadi inteqrasiyasının təşviq edilməsinə xüsusi diqqət yetirəcək".
Keçmiş xarici işlər naziri Tofiq Zülfüqarov "Şərq"ə İrəvanda çox maraqlı hadisələrin baş verdiyini deyib. Sabiq XİN başçısı qeyd edib ki, hətta Avropa İttifaqının Ermənistanla bağlı qəbul etdiyi sənəddə də "Qarabağ erməniləri" mövzusunu yenidən gündəmə gətiriblər: "Bunlar təsadüfi deyil. Əslində, Paşinyan administrasiyası çalışır ki, "Qarabağ erməniləri" məsələsi ilə Qərbi Azərbaycan mövzusunu eyniləşdirsin. Yəni gələcəkdə hansısa öhdəliklər götürməklə bu məsələlərdən qarşılıqlı şəkildə imtina edilməsi təklifini irəli sürürlər. Təbii ki, Ermənistan tərəfinin bununla bağlı öz öhdəliyini icra edəcəyinin qarantiyası yoxdur. Hökumət özü buna getməsə də, prosesi "müxalif hərəkat" adlandıra, ölkədə "demokratiya" olduğunu iddia edə bilər. Bunu bəhanə gətirərək rəsmi şəkildə imtina edə bilərlər. Düzdür, Paşinyan davamlı vurğulayır ki, Qarabağa ermənilərin qayıdışı mümkün deyil və bunu istəmir. Amma onun diplomatları Avropa İttifaqı ilə sənəd imzalayırlar və orada "Qarabağ erməniləri" məsələsi əksini tapır. Hətta həmin sənəddə "Dağlıq Qarabağ erməniləri" barədə 4-5 bənd əlavə edirlər. Bu, açıq-aşkar ziddiyyətdir. 2023-cü ilədək Azərbaycan dövləti Qarabağda yaşamaq istəyən ermənilərə şərait və imkan yaradıb, onlara vətəndaşlıq təklif edib. Amma özləri bunu qəbul etməyiblər. Yaxşı, bəs Ermənistan rəhbərliyindən Qərbi azərbaycanlılarla bağlı hansısa bəyanat səsləndirilibmi? Yox. Ancaq hay-həşir salıblar ki, "qoymayın, azərbaycanlılar gələcək, Ermənistan dağılacaq" və s".
T.Zülfüqarov əlavə edib ki, ermənilərin Qarabağa qayıdışı ilə Qərbi Azərbaycana geri dönüş məsələsinin eyniləşdirilməsi qətiyyən doğru deyil: "Çünki münaqişəni, müharibəni Ermənistan tərəfi başladıb, etnik təmizləməni ermənilər həyata keçirib. Ermənistan tərəfi siyasi məsuliyyətini dərk edəcəkmi? Digər tərəfdən, sovet dövründə bizdən alınmış torpaqlar da hələ gündəmdədir. İctimaiyyətimiz bu mövzuları diqqət mərkəzində saxlayır. Qərbi Azərbaycan məsələsi bizim gündəmimiz olacaq. Biz hələ gözləyirik ki, görək, Ermənistan tərəfi ərazi iddiaları ilə bağlı məqamları qanunvericiliyindən nə zaman təmizləyəcək".
