Ermənistan Respublika Partiyasının sədr müavini Armen Aşotyan Belarus Prezidenti Aleksandr Lukaşenkonun həbsdə olan müxalifət nümayəndələrini əfv edərək azadlığa buraxmasından sonra təxribatçı bəyanatla çıxış edib.

Belarus rəhbərliyinin ABŞ Prezidenti Donald Trampın xahişi ilə 123 məhbusu azad etməsindən Azərbaycana qarşı düşmənçilik məqsədilə istifadə etməyə çalışıb.

Qeyd edək ki, Ermənistan Respuiblika Partiyasının sədri, sabiq prezident Serj Sarkisyandır. Armen Aşotyan ABŞ Prezidentinin xahişi ilə Azərbaycan ərazilərinin işğalında iştirak etmiş, kütləvi qətllər və digər ağır müharibə cinayətləri törətdiyinə görə Bakıda məhkəmə prosesi keçirilən erməni əsilli hərbi cinayətkarların azadlığa buraxılacağına inandığını bildirib.

Serj Sarkisyanın müavini hərbi cinayətkarları “məhbus” adlandırıb:

“Donald Trampın xahişi ilə Belarus Prezidenti siyasi məhbusları, o cümlədən uzunmüddətli həbs cəzasına məhkum edilmiş 123 nəfəri azadlığa buraxıb. Bu, bizi iki nəticəyə gətirib çıxarır. Birincisi, ABŞ Prezidentinə Bakı həbsxanalarından soydaşlarımızın azad edilməsi üçün aydın, məqsədyönlü və mərhəmətli xahiş təqdim edilsəydi uğur qazanmaq ehtimalı yüksək olardı.

İkincisi, əgər siyasi “məhbus”larımızın azad edilməsi məsələsi həm Ermənistan daxilində, həm də erməni-amerikan icması və digər diasporlar tərəfindən ABŞ Prezidentinə müraciət səviyyəsinə qaldırılarsa, onda bəzi, natamam olsa da, nəticələr əldə etmək ehtimalı yüksəkdir.

Armen Aşotyan ABŞ Prezidentinə müraciətin qəbul olunması üçün 30 min nəfərlik mitinqin keçirilməsini təklif edib. Revanşist müxalifətin nümayəndəsi olan Aşotyan göründüyü kimi, Azərbaycan xalqına qarşı müharibə cinayətləri, mülki əhaliyə qarşı soyqırım, etnik təmizləmə, qanunsuz silah gəzdirmə, terrorçuluq, dövlətin ərazi bütövlüyünə və suverenliynə qəsd kimi ən ağır cinayətlər törətmiş şəxsləri bu əməllərin heç birinə yol verməmiş insanlarla eyniləşdirir.

Hətta Belarusda əfv edilən məhbuslardan biri Nobel Sülh mükafatı laureatı olduğu halda, Armen Aşotyanın lideri Serj Sarkisyan Azərbaycan ərazilərinin işğalı zamanı yol verdiyi cinayətlərə, eləcə də Xocalıda dinc əhaliyə, o cümlədən uşaqların, qadınların, qocaların qətlini təşkil etdiyinə görə hazırda axtarışdadır.

Bu gün Bakı Hərbi Məhkəməsində mühakimə olunan Bako Saakyan, Arkadi Qukasyan, Arayik Harutyunyan, Levon Mnatsakanyan, Rəşid Beqlaryan, David İşxanyan, David Babayan kimi təhlükəli terrorçuların hamısı Serj Sarkisyanın əmri ilə Azərbaycana qarşı müharibəyə cəlb edilərək qətliyamlar törədib.

Belə canilərin və separatçıların yenidən azadlığa buraxılması regionda növbəti münaqişəyə gətirib çıxara bilər. ABŞ Prezidenti Donald Tramp isə Azərbaycanla Ermənistan arasında sülhə nail olmağa çalışır. Ona görə də Armen Aşotyan kimi şovinstlərin müraciəti ilə Prezident Trampın Bakıdakı hərbi cinayətkarların sərbəst buraxılmasına çağırış edəcəyi inandırıcı görünmür.

Millət vəkili Hikmət Babaoğlu “Cebheinfo.az”-a açıqlamasında bildirib ki, Donald Trampın müraciəti əsasında Prezident Aleksandr Lukaşenkonun azadlıqdan məhrum edilmiş 123 nəfəri əfv etməsi “məhbus” termini ilə əlaqələndirilə bilən və həmin şəxslərin Belarus Respublikasının Konstitusiyasında əfv edilməsi mümkün olanlar kateqoriyasına daxil edilməsi ilə bağlıdır:

“Hüquqi-humanitar nöqteyi nəzərdən şərh etdikdə, bütün ölkələrin, o cümlədən Azərbaycanın qanunvericiliyində cəzalandırılmış məhbusların əfv olunması məsələsi öz əksini tapıb. Ona görə də hüquqda xüsusi terminlərdən istifadə olunur və onların izahatı verilir.

Armen Aşotyanın açıqlaması isə onun hüquqi baxımdan savadsızlığını göstərir. Yəni hərbi cinayətkarlar, terrorçular, separatçılar heç bir ölkənin nə milli qanunvericiliyində, nə də beynəlxalq qanunvericilikdə əfv edilən cinayətkarlar sırasına daxil deyil. Ona görə də Armen Aşotyanın bu fikri absurddur və hüquqi baxımdan, heç bir şəkildə izah edilə bilməz”.