Dövlət Təhlükəsizliyi Xidməti Balakən Rayon İcra Hakimiyyətinin sabiq başçısı İslam Rzayevin saxlanılmasını əks etdirən videogörüntülər yayıb. Təqdim olunan kadrlarda keçmiş başçının iş adamlarından, sahibkarlardan rüşvət almasını əks etdirən görüntülər yer alıb. Qeyd olunub ki, İslam Rzayev öz qulluq mövqeyindən istifadə etməklə, ona etibar edilmiş külli miqdarda özgə əmlakı mənimsəyib, çoxsaylı korrupsiya cinayətlərinə yol verib. Dövlət büdcəsindən işsiz və aztəminatlı şəxslərə, rayon ərazisində təmir-tikinti və abadlıq-quruculuq işlərinə ayrılmış maliyyə vəsaitlərini vəzifə səlahiyyətlərindən sui-istifadə edərək mənimsəyib. Belə vəsaitlərin təyinatı üzrə xərclənməsini təşkil etməyib, eləcə də vəzifəli şəxslərdən və iş adamlarından rüşvət alıb. Faktla bağlı DTX-nin İstintaq baş idarəsində başlanılmış cinayət işi üzrə İslam Rzayev saxlanılaraq Cinayət Məcəlləsinin 179.3.2 (külli miqdarda mənimsəmə) və 311.3.2-ci (təkrar rüşvət alma) maddələri ilə məsuliyyətə cəlb olunub. Məhkəmənin qərarı ilə barəsində həbs-qətimkan tədbiri seçilib. Hazırda cinayət işi üzrə istintaq-əməliyyat tədbirləri davam etdirilir. Məlumat üçün bildirək ki, hazırda 9 sabiq icra başçısı demək olar ki, eyni səbəblərdən həbsxanadadır. Əfsuslar olsun ki, bəzən həbslər, sərt cəzalar digərlərinə ibrət olmur. Bir çox icra başçısı eyni qanunsuz əməlləri israrla davam etdirirlər. Ona görə də zaman-zaman ictimaiyyətdə icra hakimiyyətləri strukturlarının ümumiyyətlə ləğvi, yaxud tamam yeni sistemlə əvəzlənməsi, hətta yerlərdə idarəetmənin bələdiyyələrə təhvil verilməsi kimi təkliflər səsləndirilir. 

"Alyans" Strateji Araşdırmalar Mərkəzinin rəhbəri Abutalıb Səmədov Sherg.az-a açıqlamasında deyib ki, icra başçılarının eyni cinayətlər üzrə həbs olunması bir daha göstərir ki, ciddi inzibati ərazi islahatına getmək lazımdır. Ekspert vurğulayıb ki, Azərbaycanda rayonların sayı 70-dən artıqdır: "Bəzi rayonlar ərazisinə, əhalisinə görə çox kiçikdir və həmin icra başçısının rəhbərlik etdiyi rayonda ciddi iş görməsi qeyri-mümkündür. Ona görə də icra başçılarının bir çoxu fermer təsərrüfatları yaradır, yanacaqdoldurma məntəqələri açır və digər iş sahələrinə yönəlirlər. Bunlar kifayət etmədikdə isə korrupsiyaya qurşanır, rüşvət yığırlar. Nəticədə həmin icra başçısının "biznesi" DTX əməliyyatı ilə yekunlaşır. Bu səbəbdən iri inzibati ərazi vahidlərinin yaradılmasına ehtiyac var. Azərbaycanda 14 iqtisadi rayon var, ancaq bunlar inzibati ərazi vahidi deyil. 14 iqtisadi rayonun ərazisində 14 vilayət təsis etmək olar. Rayonları vilayətlərin tərkibində birləşdirmək mümkündür. İri inzibati ərazi vahidlərində investisiyalar cəlb etmək, fəaliyyət sahələrini genişləndirmək imkanları daha çoxdur".

Lakin ekspert onu da diqqətə çatdırıb ki, müəyyən rəhbər şəxsləri inzibati ərazi islahatları da rüşvətdən, korrupsiyadan çəkindirməyəcək: "Hətta bəziləri korrupsiyanı daha geni miqyasda tətbiq etməyi düşünəcək. O səbəbdən rüşvətə, korrupsiyaya yönəlik sərt mübarizə davamlı olmalı, cəzalar artırılmalıdır. Ən əsası da yüksək vəzifələrə təyinat alan insanların, çiyinlərinə böyük məsuliyyət qoyulan şəxslərin əmək haqları da kifayət qədər çox olmalıdır ki, əllərində rüşvət üçün heç bir əsas, bəhanə qalmasın. Bütün hallarda inzibati ərazi islahatlarına ciddi ehtiyac olduğu qənaətindəyəm. Dünyanın heç bir ölkəsində kiçik ərazi vahidləri ilə dövlət idarə olunmur. Çünki bu, olduqca səmərəsiz sistemdir və göründüyü kimi özünü doğrultmur".