“Qara bazarda 50 manat dəyərində olan qeyri-standart (kustar) sobaların məktəblərə 350 manat qiymətlə sənədləşdirilməsi açıq-aşkar dövlət büdcəsindən sui-istifadə deməkdir.”
Bu sözləri Yenicag.az-a açıqlamasında təhsil eksperti Elşən Qafarov deyib. O, ölkə məktəblərində pellet sobaları ilə bağlı yaranmış vəziyyətin ciddi təhlükə mənbəyinə çevrildiyini bildirib.
Ekspert qeyd edib ki, ümumtəhsil müəssisələrində kombi, mərkəzi istilik, odun peçi və digər üsullarla yanaşı, son illər pellet sobaları da tətbiq olunur. “Sözügedən pellet sobaları ekoloji cəhətdən təmiz olsa da, gündəlik texniki qulluq tələb edir: kül iki dəfə, baca isə bir dəfə təmizlənməlidir. Bu sobalarda istifadə olunan pellet yanacağı xüsusi sıxlaşdırılmış ağac tozu olduğundan mütləq quru yerdə saxlanılmalıdır.”
Ekspert, Salyanda baş verən son hadisənin pellet sobalarının məktəblərə qeyri-standart şəkildə quraşdırıldığını üzə çıxardığını vurğulayıb.
Korrupsiya İddiaları: “Sobalar Elm və Təhsil Nazirliyinin yaxın adamlarının qeyri-rəsmi sexlərində (kustar sexlərdə) hazırlanır. Həmin sexlərdə hazırlanan və bazarda təxminən 50 manat dəyəri olan sobalar məktəblərə 350 manat qiymətlə sənədləşdirilərək quraşdırılıb. Sobaların texniki təhlükəsizlik baxımından ciddi problemlərə malik olması ilə yanaşı, istifadə olunan pellet yanacağı da keyfiyyətsizdir.”
Elşən Qafarov bildirib ki, bəzi məktəblərdə sobalar “çox acı tüstü və kəskin qoxu” yayaraq şagirdlər və müəllimlər üçün təhlükəli vəziyyət yaradıb. O, Fövqəladə Hallar Nazirliyinin (FHN) də bu məsələyə kifayət qədər reaksiya vermədiyini söyləyib.
Ekspertin Təklifi: “Əgər pellet sobalarından istifadə olunacaqsa, yalnız fabrik istehsalı olan və standartlara cavab verən sobalar alınmalıdır. Fabrik istehsalı sobaların qiyməti ilə kustar üsulla hazırlanan və məktəblərə 350 manata sənədləşdirilən sobalar arasında qiymət fərqi olduğu üçün burada “qazanc” əldə etmək istəyiblər. Dövlət Təhsil Naziri bu məsələ ilə bağlı ciddi açıqlama verməlidir.”
Ətraflı videomaterialda:
