"Bu gün gəldiyimiz tarixi mərhələdə artıq açıq şəkildə bəyan etmək lazımdır ki, akademik Ramiz Mehdiyev və onun illər boyu formalaşdırdığı, həm iqtidar daxilində, həm də müxalifət düşərgəsində kök salmış xəyanət şəbəkəsi sadəcə siyasi rəqib yox, həmdə dövlətə xəyanət etmiş mütəşəkkil qüvvədir. Ramiz Mehdiyev uzun illər Azərbaycan hakimiyyətində "ideoloji ata" rolunu oynayıb".
Bu sözləri Sherg.az-a Millət vəkili Ceyhun Məmmədov deyib.
Deputat qeyd edib ki, zaman və faktlar onun qurduğu sistem dövlətin inkişafına deyil, şəxsi ambisiyaların və korporativ maraqların qorunmasına xidmət etdiyini göstərdi:
"O, dövlət idarəçiliyində ona verilən etimad və sədaqəti məhv edərək, sədaqət adı altında itaətkarlığı təbliğ edən bir mühit yaradıb. Lakin onun ən böyük xəyanəti idarəetmə ilə məhdudlaşmayıb. Mehdiyev, dövlətin milli təhlükəsizlik maraqlarına zidd olaraq, dövlət hakimiyyətini ələ keçirməyə yönələn əməllər, dövlətə xəyanət, cinayət yolu ilə əldə edilmiş əmlakı leqallaşdırma ilə ittiham olunur. O, həmçinin ölkə daxilində süni siyasi gərginliklər yaratmaqda, islahatları bloklamaqda və Azərbaycanın beynəlxalq imicinə zərbə vurmaqla məşğul olurdu. Ramiz Mehdiyevin qurduğu bu çirkin oyunun ən təhlükəli hissəsi isə "müxalifət" adlanan cinahla gizli simbioz əlaqələrdir. Cəmiyyətə illərdir "barışmaz müxalifət" kimi təqdim olunan Əli Kərimli, Gültəkin Hacıbəyli və Cəmil Həsənli kimi fiqurlar, əslində, bu böyük ssenarinin aktyorlarıdır. Əli Kərimli uzun illərdir radikal ritorika ilə cəmiyyəti qütbləşdirməyə çalışsa da, real siyasi nəticə əldə edə bilməyib. Onun fəaliyyəti diqqətlə təhlil edildikdə və faktlar araşdırıldıqda, bu ritorikanın əslində Mehdiyevin “köhnə qvardiya”sının maraqlarına xidmət etdiyini anlamaq heç də çətin deyil. Onun radikallığı Mehdiyevə islahatçı qüvvələri zəiflətmək və sərt idarəçilik modelini əsaslandırmaq üçün lazım olan “xaos görüntüsü”nü təmin edirdi".
Deputat Gültəkin Hacıbəylinin və Cəmil Həsənlinin də bir zamanlar dövlət strukturlarında və ya ona yaxın mövqelərdə çalışıb sonradan qəfil “radikal demokrat” obrazına bürünmələrinin təsadüfi olmadığını vurğulayıb:
"Siyasi faktlar və analitik yanaşma göstərir ki, onların fəaliyyəti müstəqil iradəyə söykənmir. Bu fiqurlar, Ramiz Mehdiyevin siyasi sistemdə təsirini itirdiyi məqamlar üçün “xarici təzyiq” və “daxili narazılıq” görüntüsü yaratmaqda istifadə olunan alətlər kimi çıxış ediblər. Bu şəxslərin Ramiz Mehdiyevlə əlaqəsi təkcə siyasi taktika deyil, xalqın etimadına və dövlətin strateji hədəflərinə qarşı yönəlmiş bəlli bir koordinasiyanın və məqsədli fəaliyyətin nəticəsi olan birgə xəyanətdir. Bu gün Azərbaycan cəmiyyəti həqiqətlə üz-üzədir. Biz görürük ki, illərdir davam edən "iqtidar-müxalifət" qarşıdurmasının bir qismi, əslində, eyni mərkəzdən idarə olunan saxta bir oyun imiş. Ramiz Mehdiyev "boz kardinal" olaraq dövlətin resurslarını sümürərkən, adlarını çəkdiyim bu "müxalifətçilər" də həmin sistemin dolayısı ilə qoruyucuları olublar. Onlar xalqın enerjisini boş şüarlarla tükədərək, əsl demokratik inkişafa və milli birliyə mane olublar. Bu gün siyasi arenada gerçəklərin üzə çıxdığı bir zamanda aydın olur ki, Ramiz Mehdiyev, Əli Kərimli, Gültəkin Hacıbəyli və Cəmil Həsənli eyni zəncirin həlqələri kimi çıxış ediblər. Nəticədə onların hər biri, öz rollarına uyğun olaraq, Azərbaycan dövlətçiliyinə qarşı cinayət ortağıdırlar. Əlbəttə artıq tarix bu səhifəni bağlayır. İndi zaman, bu xəyanət şəbəkəsini tam ifşa etmək, onları siyasi tarixin arxivinə göndərmək və Azərbaycanın gələcəyini bu kölgələrdən təmizləmək zamanıdır. Hazırda hər birimiz fəxr hissi ilə ədalətin bərqərar olmasına, müasir Azərbaycanın öz tarixinin ən şərəfli və qüdrətli dövrünü yaşamasına şahidlik edirik. Ölkəmiz artıq dünyada söz sahibi olan, tam müstəqil, suveren və demokratik hüquqi dövlətdir. Bu uğurların təməlində isə Ulu Öndər Heydər Əliyevin ideyaları və bu ideyaları qətiyyətlə davam etdirən Prezident İlham Əliyevin uzaqgörən, müdrik və milli maraqlara söykənən siyasəti dayanır".
Parlamentari, Prezident İlham Əliyevin "Dəmir Yumruğu"nun təkcə işğalçı düşmənin başını əzmədiyini, eynu zamanda dövlətin daxilində kök salmağa çalışan, xalqın birliyinə qəsd edən xəyanətkar şəbəkələrin belini qırdığını söyləyib:
"Dövlət başçımızın hər zaman vurğuladığı kimi, "Azərbaycanın taleyini yalnız Azərbaycan xalqı həll edir". Bu gün Azərbaycan xalqı öz liderinin ətrafında sıx birləşərək əmindir ki, dövlətimizə uzanan hər bir xəyanət əlini liderimiz kəsəcək və Azərbaycanın inkişafına heç bir qüvvənin mane olmasına icazə verməyəcək. Uca Allah müstəqil Azərbaycanımızı, onun memarı olan dövlətimizi və Müzəffər Ali Baş Komandanımız Prezident İlham Əliyevi qorusun!".
