“Azərbaycan Dəmir Yolları Naxçıvan Muxtar Respublikasında dəmir yolu infrastrukturunun yenidən qurulması və modernləşdirilməsi üçün layihələndirmə işlərini başa çatdırıb”.

Bunu "Azərbaycan Dəmir Yolları" QSC-nin sədr müavini Arif Ağayev deyib. O bildirib ki, hazırda olduğumuz məntəqədə – Ermənistanla sərhəddə, Ordubad rayonunun Salamməlik stansiyası ərazisində tikinti işlərinə start verilib:

"Tikinti işləri 188 km-lik dəmiryol xəttini əhatə edir. Məqsəd müasir tələblərə cavab verən yeni dəmiryolu şəbəkəsinin qurulmasıdır. Əsaslı təmir işləri başa çatdıqdan sonra dəmir yolunun illik yükötürmə qabiliyyəti 15 milyon ton təşkil edəcək.

Bildiyiniz kimi, 2025-ci ilin avqustun 8-də Vaşinqtonda cənab Prezident növbəti tarixi zəfərə imza ataraq “Beynəlxalq Sülh və Rifah naminə Tramp Marşrutu”nun (TRIPP) açılmasına dair razılaşmanın imzalanmasına nail olub.

Bu razılaşma çərçivəsində dəhliz boyunca dəmir yolu əlaqəsi bərpa olunacaq. Zəngəzur dəhlizi Orta dəhlizin mühüm tərkib hissəsi kimi Avropa və Asiya arasında yükdaşımalarda mühüm marşrut kimi qiymətləndirilir. Bu dəhliz həm də Şimal-Cənub dəhlizinin əsas halqalarından birini təşkil edəcək".

Göründüyü kimi, Azərbaycan öz öhdəliklərini mərhələli şəkildə yerinə yetirir. Bəs Ermənistan öz üzərinə düşən vəzifələrin icrası üçün addımları nə zaman atacaq?

“Cebheinfo.az”-a açıqlamasında Milli Məclisin deputatı Hikmət Babaoğlu bildirib ki, regional kommunikasiyaların açılması sülhə gedən yolun əsas komponentlərindən biridir. O qeyd edib ki, hazırda postmüharibə mərhələsinə qədəm qoymuşuq:

“2025-ci il avqustun 8-dən sonra Ermənistan və Azərbaycan Xarici İşlər nazirlikləri arasında paraflanan sənəd regional inteqrasiyanın təmin olunması üçün əsas yaradır. Azərbaycan bu istiqamətdə çox qətiyyətli addımlar atmaqdadır.

Artıq Horadiz-Ağbənd dəmir yolu və avtomobil nəqliyyat infrastrukturu inşa edilərək tamamlanıb. Hazırda isə Naxçıvan ərazisindən Ermənistan sərhədinədək olan 188 kilometrlik Naxçıvan dəmir yollarının bərpası və yenidən qurulması işləri həyata keçirilir”.

Hikmət Babaoğlu Ermənistanın regional inteqrasiyada və sülh prosesindəki gecikmələrini tənqid edib:

“Çox təəssüf ki, Ermənistan bir tərəfdən sülhdən və regional inteqrasiyanın bərpa olunmasından danışır. Başqa bir tərəfdən isə bu inteqarsiya və kommunikasiyaların əsas həlqəsinə çevriləcək olan 42 km-lik Zəngəzur dəhlizində hər hansı real iş görmür. Bu, bir neçə amillə əlaqələndirilə bilər. Birincisi, Ermənistanda hələ də sülhün əldə olunması ilə bağlı qənaət tam formalaşmayıb.

İkincisi, Ermənistan liderləri qəti qərar vermək üçün kifayət qədər cəsarət nümayiş elətdirə bilmirlər. Üçüncüsü daha münbit şərtlər formalaşsın deyə 2026-cı ildə keçiriləcək seçkilərin nəticələrinin gözləyirlər. Mənə elə gəlir ki, bu üç mümkün səbəbin içərisində ən realı seçkilərin keçirilməsidir”.

Deputatın sözlərinə görə, seçkidən sonra formalaşacaq yeni hakimiyyət artıq istəsə də, istəməsə də bununla bağlı qərar vermək məcburiyyətində qalacaq:

“Buna görə də hazırkı hakimiyyət parafladığı sənəddə üzərinə götürdüyü öhdəlikləri dərhal yerinə yetirməklə bağlı addımlar atmalıdır. Əks təqdirdə, seçkilərin nəticəsi və prosesin necə sonlanacağı bəlli deyil. Məncə, Paşinyan doğrudan da sülh tərəfdarıdırsa, o zaman mümkün addımları dərhal atmalıdır”.