Prezident İlham Əliyevin Özbəkistanın Milli İnformasiya Agentliyinə verdiyi geniş müsahibə bir daha göstərdi ki, Azərbaycan və Mərkəzi Asiya dövlətləri arasında dostluq, qardaşlıq və strateji tərəfdaşlıq ən yüksək səviyyədə inkişaf edir. Dövlət başçısının çıxışında vurğulanan məsələlər regionumuzun gələcək inkişaf xəttini müəyyən edən strateji istiqamətləri ehtiva edir.
Azərbaycan-Özbəkistan münasibətlərinin nümunəvi xarakter daşıdığını açıq şəkildə nümayiş etdirir. Prezidentin qeyd etdiyi kimi, Azərbaycan və Mərkəzi Asiya ölkələri tarixən, mədəniyyət, coğrafiya və ortaq dəyərlər baxımından bir-birinə sıx bağlıdır. İlk baxışda fiziki sərhədlər ayrı görünə bilər. Lakin Xəzər dənizi bizim xalqlarımız arasında körpü rolunu oynayan mühüm geosiyasi məkandır. Bu gün Xəzər yalnız su hövzəsi deyil, strateji birlik və əməkdaşlıq rəmzidir. Dövlət başçımızın Mərkəzi Asiya Dövlət Başçılarının Məşvərət görüşlərində ardıcıl iştirakı Azərbaycanla region ölkələri arasındakı siyasi dialoqun yüksək səviyyəsini göstərir. Xüsusilə, Azərbaycan-Özbəkistan münasibətləri dövlət başçılarının şəxsi dostluğuna, qarşılıqlı etimada və vahid tarixi-mədəni köklərə söykənir. Prezident İlham Əliyevin vurğuladığı kimi, son illərdə qarşılıqlı səfərlərin intensivliyi əlaqələrimizin rekord səviyyədə inkişaf etdiyini sübut edir. İmzalanan müttəfiqlik müqavilələri, yol xəritələri, çoxsaylı sazişlər dövlətlərimiz arasında münasibətləri strateji müttəfiqlik səviyyəsinə yüksəldib. Özbəkistanın Azərbaycanın ərazi bütövlüyünə ardıcıl dəstəyi, xüsusilə Qarabağın bərpasına göstərdiyi qardaş yardımı, Füzulidə Mirzə Uluqbəy adına məktəbin inşası bizim üçün böyük mənəvi əhəmiyyət daşıyır.
Politoloq Əli Oruclu Sherg.az-a deyib ki, Prezident İlham Əliyevin Özbəkistan Milli İnformasiya Agentliyinə verdiyi müsahibə qardaş və dost ölkədə də diqqətlə izlənilib. Ekspert vurğulayıb ki, dövlət başçısı müsahibəsində Özbəkistan-Azərbaycan əlaqələrinə bütün detalları ilə aydınlıq gətirib və qarşıda duran vəzifələr barədə müfəssəl məlumatlar verib:
"Müsahibədən də göründüyü kimi hər iki ölkədə arasında bütün sahələrdə əməkdaşlıq yüksək dinamika ilə davam edir. Və bunun da uğurlu nəticələrindən xalqlarımız bəhrələnir. Özbəkistanı ilk növbədə Azərbaycanla etnik, mənəvi və tarixi köklər, ortaq dəyərlər bağlayır. Bunlar ölkələrin yüksək münasibətlər və əməkdaşlığının perspektivində mühüm faktordur. Hazırkı qeyri-sabit və sürətli dəyişən dünyada Azərbaycan və Özbəkistan digər türk dövlətləri ilə birlikdə özlərinin təhlükəsizlik çətirini və iqtisadi müstəqilliklərini birlikdə təmin etməyə məcburdur. Bu tələbatı və çağırışı nəzərə alan liderlər Azərbaycanla Özbəkistan arasında strateji müttəfiqlik sənədini imzalayıblar. Özbəkistanın Mərkəzi Asiya ölkələri içərisində güclü mövqeyi və böyüyən iqtisadiyyatı var. Son dövrlərdə Avropa İttifaqı və Amerika Birləşmiş Ştatları ilə əlaqələr də xeyli irəliləyib".
Ə.Oruclu qeyd edib ki, Azərbaycan-Özbəkistan əlaqələrinin sürətli inkişafı özünü ticari və qarşılıqlı iqtisadi sahədə də göstərir: "Müsahibədə vurğulandığı kimi bu dinamika əvvəlki illərlə müqayisədə 80 faiz artıb. Özbəkistan işğaldan azad olunmuş ərazilərdə aparılan genişmiqyaslı tikinti-quruculuq işlərində və bir sıra layihələrdə fəal iştirak edir. Özbəkistan investisiyalı Uluqbəy adına 600 yerlik məktəb binası, Xankəndidə toxuculuq kombinatı istifadəyə verilib. Bunlar digər dost və müttəfiq dövlətlərin də sərmayə yatırılmasının təşviqinə töhfə deməkdir. Daşkəndlə Bakı beynəlxalq münasibətlər sistemində və təşkilatlarda bir-birilərini daima dəstəkləyiblər. Düşünürəm ki, bundan sonra da iki dövlətin əməkdaşlığı üzün güclü təməl, zəmin və potensial var. Odur ki, bunlar dəyərləndirilir, öyrənilir və uğurlu tətbiq edilir".
