“Ermənistanın Azərbaycanla sülh müqaviləsi imzalamaqdan başqa çıxış yolu yoxdur”.

Bu sözləri politoloq Natiq Miri “Cümhuriyət”-ə açıqlamasında deyib.

O bildirib ki, artıq Ermənistanın Baş naziri Nikol Paşinyanın sülh prosesini pozmaq üçün hansısa manevr imkanları qalmayıb:

“Ortada 8 avqustda əldə olunan Vaşinqton razılaşması var. Ağ Evdə ABŞ Prezident Donald Trampın vasitəçiliyi ilə Azərbaycan Prezidenti İlham Əliyev və Ermənistanın Baş naziri Nikol Paşinyan arasında keçirilən görüş bir növ sülh prosesi üçün yol xəritəsi sayıla bilər. Çünki rəsmi sənəddə qeyd olunanlardan başqa bir də qeyri-rəsmi anlaşmaların da mövcud olduğu ehtimal olunur. Bu baxımdan, sülh prosesindən geri çəkilmək Nikol Paşinyan hökuməti üçün qeyri-mümkündür”.

Politoloq qeyd edib ki, sülh prosesi sadəcə yekun sülh müqaviləsini imzalamaqla bitmir:

“Bu kompleks məsələdir və içərisinə bütün nəqliyyat-kommunikasiya xətlərinin açılması, əməkdaşlıq və ticarət də daxildir. Bütün bunlar isə Ermənistan üçün həyati əhəmiyyət kəsb edir.

Eyni zamanda, sərhədlərin delimitasiya və demarkasiya prosesi var. Ona görə də bu məsələ hansısa sənədi imzalamaqla bitmir. Burada bir-birini şərtləndirən və sözün əsl mənasında sülhün regionda təşəkkül tapmasını şərtləndirən amillər var. Paşinyan manevr etməklə ilk növbədə özünə və Ermənistana zərbə vuracaq. Nikol Paşinyanın qəbul etdiyi yeni qayəyə görə, legitim hakimiyyətlə bərabər, həm də legitim ərazi konteksində real Ermənistan ideyasının təşəkkül tapmasının yolu məhz Azərbaycanla anlaşmadan keçir”.

Politoloqun sözlərinə görə, bura Ermənistanın gələcək inkişaf perspektivi də daxildir:

“Burada da əsas olan Avropaya inteqrasiyadır. Avropaya inteqrasiya da Azərbaycanla sülh müqaviləsi imzalamaqdan, Türkiyə ilə münasibətləri düzəldərək, sərhədləri açmaqdan keçir. Paşinyan sadəcə istəyi ilə hansısa məsələni əngəlləyə bilməz. Belə bir imkanı yoxdur”.

Natiq Miri hesab edir ki, sadəcə Paşinyanın seçkidə məğlub olması problem yarada bilər:

“Hazırkı şəraitdə yalnız bir problemin yaranma ehtimalı var. O da gələn il keçiriləcək parlament seçkilərində Nikol Paşinyanın partiyasının məğlubiyyəti ola bilər. Paşinyan hökumətinin növbəti parlament seçkilərində qalib gəlməsində maraqlıyıq. Sadəcə Azərbaycanın şərtlərini qəbul etmək yetməz. Paşinyan yeni qayələr uğrunda yaradılacaq “Dördüncü Ermənistan Respublikası”ndan dəm vurursa, yeni konstitusiya dövriyyəyə girir. Bu da “olmazsa olmaz”a çevrilib. Bu gün erməni ictimai rəyinə və şüuruna yeridilmək istənilən əsas məsələlərdən biri də budur”.

Həmsöhbətimiz diqqətə çatdırıb ki, rəsmi İrəvan konstitusiyanın dəyişilməsini sadəcə Azərbaycanın şərtlərinə bağlamır:

“Yeni konstitusiya yeni və suveren Ermənistan deməkdir. Paşinyan cəmiyyətə bunu aşılamaq istəyir. Bütün bu məsələlərə kompleks yanaşanda, hər hansısa bir manevrdən söhbət getmir. Çünki baş verən proseslər və inkişaf Ermənistanın ziyanına deyil, xeyrinədir.

Ermənistan bundan nə üçün imtina etməlidir ki? İrəvan hakimiyyətinin inteqrasiya etmək istədiyi əsas istiqamət Qərb dünyasıdırsa, yenə də Azərbaycanla sülh istiqaməti vacibdir. Çünki Azərbaycan və Türkiyə bunun əleyhinə deyil. Əksinə, bu böyük prosesin içindədirlər”.